قصة بداح العنقري

بداح العنقري(الروايه الاكيده)
(منقولة كما هي وحسب مفرداتها)

السلام عليكم ورحمة الله وبركاته .

ومساكم او صبحكم الله بالخير جميع ......

القصه والله ياجماعه الخير هي قصة بداح العنقري ؟

بداح العنقري هو امير ثرمدا وعلى ماذكر عنه انه امير وفارس وشجاع وكريم والكريم وجه الله .

وبداح العنقري كان معروف عنه انه (طراد هوى)وقلبه مايبي له شي
المهم ولا لكم باطواله ذكر احد جماعة بداح العنقري انه فيه بنت امير من امرآ الباديه جميله ومزيونه


ومثل ماتعرفون بداح قلبه مايبي له شي

قرر بداح انه يروح لاهل البنت ويخطبها منهم وفعلا راح لهم بداح لكن؟؟؟؟؟؟؟
من اول سلوم الناس (سلوم تعني تقاليد) تختلف عن الحين من اول الناس الي يجيه ضيف ماينشده عن لزومه او طلبه الا بعد مرور ثلاثة ايام وقعد العنقري عندهم الثلاثة ايام ذي وصار يلعب مع اخوان البنت (على الخيل اللعب لاحد يحسبه على سياكل)وكان مثل ماقلت لكم مشهود له بالفروسيه واعجبو به جماعة البنت وجاز لهم

بعد مرور ثلاثة ايام راح بداح لابو البنت وقاله عن طلبه وغرضه ومير يقوله ابو البنت والله ونعم بس خلنا نشاور البنت
(وعلى فكره ترى ماهوب كل البوادي واحد لاحد يجي يقول اصلا البدو مايشاورون حريمهم)

البنت ياجماعه ردت على ابوه بعد ماشاوره بالرد ذا
(افا يبه غرك الحضري ذا خيال القري ترى حيث انه لعب والا لو انه هوش ماهاش خيال القري زين تصفيح)

ومعنى كلامه انه الحضري او خيال القري الي هي جمع قرى خيال بالسلام والا بالحرب والجد مايسوي شي.

يوم قالت البنت ذي الكلمه ومير يشوم بداح العنقري عن البنت


وقال يافلانه قولي يالله ؟

قالت يالله

قال ان الله يعجل باليوم الي اوريتس فعلي به




والحين لو تلاحظون فيه مثل يقال الي هو
(شيمه عنقريه)

وهي ماخوذه من بداح العنقري يوم يشوم عن البنت


يوم اصبح الصبح وهو يركب فرسه يبي يرجع لاهله

البنت واهله صار الشي الي محد توقعه

صبحوهم الفضول من بني خالد

وتدور المعركه لكن الكثره تغلب الشجاعه ومير يقول ابو البنت انت يافلان ابيك تروح للعنقري ويمكن تمكنه او ماتمكنه واطلب منه الفزعه العنقري يوم سمع كلام الرسول الي مرسله ابو البنت قال

ماافزع الين تجين فلانه وتنخاني ثلانين نخوه

يوم قالو للبنت قالت وش لون بس ابي انخاه ثلاثين نخوه ؟

قالت له امه روحي وقولي له
العنقري يارجالي انخاك عشر ويتبع العشر عشرين وذولي الثلاثين

يوم جت وقالت له ومير يفزع وينصره الله ويرد حلال البنت وحلال القوم
يوم قضت المعركه ومير يجيب معه بداح العنقري الاعنه حقت الخيول (وهي مثل الدليل فاذا كان معه خمس اعنه معناه ذبح خمس فرسان) العنقري جاب الاعنه الي لاتعد ولاتحصى .....

يوم انهم شبو نار العز اهل البنت وقعد الشيخ الي هو ابو البنت ينشد جماعته انت كم ذبحت وانت كم جدعت ؟؟؟؟؟؟؟

وقامو يكذبون الي يقول انا ذبحت عشر والي يقول انا ذبحت خمسين


البنت يوم سمعت الكذب والنصب ومير تقوم وتقول لابوه الي ذبح فارس يجيب عنان الفرس

وهي جابت الصفريه الي مليانه اعنه وحطتهن قدام الرجال وقالت ذولي من بداح معطيني اياهن امانه اثناء المعركه

ومير يقوم بداح ويقول القصيده التاليه الي تجمع بين الحكم والفخر والغزل

وراك تزهد ياريش العين فينا
وتقول خيال القري زين تصفيح
والله لحد ياما غزينا جينا
وياما ركبناهن عصير مراويح
وياما غزيناهم وياماغزينا
وياما تقاسمنا حلال المصاليح
ويوم الفضول بحلتك شارعينا
والخيل باخوانك سواة الزنانيح
اذا انكسر رمحي جذبت السنينا
وخليت عنك الخيل صم مدابيح
وترا الظفر ماهوب للظاعنينا
مجسم بين الوجيه المفاليح
البدو والي بالقري ساكنينا
كلن عطاه الله من هبة الريح
والصدق عندك مير هيا عطينا
هيا عطينا الصدق يازينة الريح
هيا عطينا الصدق هيا عطينا
وان ماعطيتينيه والله لاصيح
والله لاصيح صيحه من غداله جنينا
والا خلوج ضيعوها السراريح
ولي صاحب...كما طلع تينا
عنهن جديد الثوب غادي تشاليح
صخف بلطف باعتدال بلينا
ولا مش مش البصره ولاهن تفافيح
ياعود ريحانا بجال البطينا
من وين ماهب الهوى بان له ريح

وهو يركب حصانه ويروح يبي ديرته وميرتقوم البنت وتقول يبه يحرمون علي الرجال غير بداح قال له الابو وانتي تحرمين عليه من بد بنات ادم

وتقوم البنت من غير شعور وتلحقه يوم انهم مشو وراها يبون يردونه ومير يلقونه ميته المهم جاء ابو البنت ودفنها ......


البنت الي توفت له اخت اجمل منه والاخت ذي قالت لابوه يابه الي ذبح اختي ابي اذبحه


قال الابو ابوك وش تذبحينه به ذا محد ينطحه تبين تذبحينه انتي؟؟؟؟؟؟؟


قالت لا مالك دخل انت حطني في بيت قدام قصر العنقري بثرمدا .

وافق الابو وفعلا سكنو قدامه

العنقري صار كل ماطلع مع قصره تجي البنت وتكشف له محاسنها ويوم بعد يوم العنقري حب البنت وعلى قولهم (دقر عنه) لكن هي له مقصد ثاني الي هو تبي تولعه وبعدين تتركه وتجحده



العنقري جاه مرض الحب الله يكفينا شره

واشتد عليه المرض الين ماجاء احد جماعته يقاله علي .

واخذه لراس ضلع ماهوب بعيد عن الديره يوم بدآ العنقري يونس الموت وعلي حمى المخاطر يبي يكويه يحسب الي به الوثاب والوثاب مرض معروف .

ومير يقوم العنقري ويقول البيتين ذولي الي هن اخر ماقال بالدنيا


ياعلي هذا الموت ماهوب وثاب
مير الله الله على الكفن والرهابه
ولياحملتوني على اللوح والباب
بالك تحرمن وقفتن عند بابه
وذا توايق الزين وضاح الانياب
قله توفى العنقري ياسفبا به
ذا صاحبي ماهو لغيري بعجاب
وليا شافني قامت تلاعج عذابه
وليا شاف احد تغبى ورى الباب
وليا شافني مافوق راسه رمى به

الله يرحمه ويغفر له ويتوب عنه
وبعد ماقضى العنقري من قصيدته مات فعلا ومير ياخذه علي ويدور به بثرمدا ويصيح ويقول

صلو على الجنازه يالمسلمين ...


مر من عند بيت البنت ومير تساله من الي مات قال العنقري يطلبك الحل
قالت قل عليه الله
قال عليه الله

ومير تقول اصبر وان مت انا فادفنوني معه

ومير تجدع روحه من فوق السطح وتموت

<<<< مولود ذا بمجزره ماعنده الا موت وذبح

وسلامتكم وارجو انها حازت على رضاكم واعجابكم واني اكون ماطولت عليكم

مع تحياتي

 

 

 

 

متواضع..

شاكره لك كل الشكر لروعة طرحك
وماقصرت على القصه والأبيات الرئعه
لاهنت ياخوي على المجهود الرائ
تسلم اناااملك على النقل
يعطيك ربي الف عافيه اخوي
لك كل الود والإحترم..

 

 

 

 

الأخت سحر الغرام
أشكرك كل الشكر
على مرورك الطيب
وتقبلي تحياتي وتقديري