أنا على المقناص

بسم الله الرحمن الرحيم
السلام عليكم ورحمة الله وبركاته
إخواني
أكثرنا سمع هذه الأبيات الرائعة
ولايعرف قائلها
وهي للشاعرالكبير
بدر الحويفي الحربي
.
.
أنا على المقنـاص قلبـي يرفـي

فترة ونرجع يم اهلنـا منـا كيـف

بديـار لفـروق الحبـارى تلفـى

جنوب من حزم الجلاميد وطريـف

الطير هو غايـة غرامـي وشفـي

اقـدره تقديـر الاجـواد للضيـف

من كبر قدره حاملـه فـوق كفـي

وارعاه تسع شهور بالقيظ والصيف

ودهلـه لاشفـت ريشـه مصفـي

على الدعو واخفف النسر تخفيـف

نقلـه يشرفنـي وشوفـه يكـفـي

عن شوف ناس ما تعرف المعاريف

لاشفـت لـي نـو بروقـه ترفـي

نويت اجهـز موتـري للتكاليـف

القيـظ كلـه جالـس(ن) ومتعفـي

وبرد المكيف نشف الـدم تنشيـف

متى سمـوم القيـظ عنـا تقفـي

وسهيل قبل يعمد الفجر قد شيـف

والنـار يصلـح شبهـا للتـدفـي

والبرد نوجس من نسيمه هفاهيـف

وقمنـا لعزبتنـا نشيـل ونضفـي

ونكمل الناقص ونمـلا المطاريـف

واللي نشيل مـن اللـوازم مكفـي

ومكتفين العفـش بالحبـل تكتيـف

ويمكن اليا جينـا البقالـة نوفـي

حاجات نشريها كمالـة مصاريـف

والصبح من حـزم ابرقيـه مقفـي

صوب المعظم والهضاب المقاييـف

بديار جعل اشجارهـا مـا تجفـي

تعلهـا غـر المـزون المراديـف

في رفقة اللي نارهـم مـا تطفـي

على الشرف والجود ربع مواليـف

مجلاس طلقين الشـوارب بصفـي

على الدلال اللي بهن ساخن الكيف

خويهم مـا اوجـس كـلامٍ يحفـي

غير المزوح الطيبـة والسواليـف

عقـال وزن عقولهـم مـا يخفـي

ولاهم على الفاضي خفاف وملاقيف



وسلامتكم