يابدر عين لايهيدن عيوني

هذه قصيدة للشاعر جزا بن صالح مسندها على الشاعر بدر الحويفي ..

يقول جزا:

يابـدر عيّـن لا يهيـدن عيونـي=يبكن لهن ناسٍ علي امـس يبكـون
وعندك خبر لولا الغلـى مابكونـي=لكن عزيـز وهـم عليـه يعـزون
وانـا ابتليـت بحبهـم وابتلـونـي=وحبيتهم حيث انهـم لـي يحبـون
وعطيتهم قلبـي مثـل ماعطونـي=وانا وفيـت وهـم يقلـون يافـون
وطال انتظـاري لينهـم عذبونـي=وصبري نفذ ماعاد لي باقـيٍ لـون
وباح العزا من ضامري واذهبونـي=ولا كن في تعذيب حالـي يشوفـون
وان قلت ماهو حـق لا تذبحونـي=عيّـو بحـال المبتلـي لا يرفـون
وقلبـي خـذوه وبالهـوى ولعونـي=وبيحت سدٍ بين الاضـلاع مكنـون
واحبـهـم وافراقـهـم مايهـونـي=يابدر فرقاهم على القلـب ماتهـون
وان جيت اباشكي حالتـي بعدونـي=وان قلت ابا اقفي بالتـودد يهلـون
واليـوم منهـم يابسـاتٍ شنـونـي=يبست شنون الكبد والقلب مشطـون
اشنـون كبـدي يابسـه واتعبونـي=كما شنون اللي للأطمـاع يسعـون
يبست شنون اركاب من يطمعونـي=اشنون ركبـن للطـوارف يويقـون
ركبٍ على تال الدبـش يسبرونـي=وفاجتهم الغاره على غيـر يـدرون
وراحن بهـم هـرّاب مايسمعونـي=وشجعانهم في تالي الجيش يرمـون
على الذي فـي حبهـم جرحونـي=وليا ا شتكيت الحال عيّو يروفـون
يابـدر منهـم طايـلاتٍ شطونـي=والقلب منهم صايـرٍ فيـه شاطـون
يسوقني سيف الهـوى وافضحونـي=وسيفٍ على قلوب المحبين مسنـون
الله يجزاهـم مـثـل ماجـزونـي=وما ذقت من هجر النيالـه يذوقـون
اقفـو وانـا ماظنتـي يرجعـونـي=وانا نحيل الحال من دون فـي دون
واليـوم عنهـم مقفيـات ظعونـي=ولا ظنتي عقب المفـارق يـردون
بـدوٍ علـى نـو الحيـا يتبعونـي=وان لاح براق الحيـا لـه يشـدون
لاشك انا بوصيـك وانتـه تمونـي=وصيـةٍ وانتـم علـيّـه تمـنـون
اوصيـك يامشكـاي لاتذخـرونـي=واحفظ وصاةٍ راعيه منـك ممنـون
اليا مت في راس الطويل ادفنونـي=اغدي شديد البـدو يمـي يمـرون
اظنهـم فـي ديرتـي ينزلـونـي=يمكن تجي ناسٍ على القبر يقفـون
وان شفت جني رادعات الوجونـي=انته من اللي فـي طلبنـا يثـارون
لاترحم اللي بالهـوى مارحمونـي=ترى الجروح اقصاص وانتم تعرفون
يامسنـدي لا تقبـل العـذر دونـي=ولا تطيعهم لو كان عنـي يحلفـون
هذا وانـا ادري والمقـدر يكونـي=بامرٍ من الله كان بالكـاف والنـون
ومن لا شرب ياصاحبي بالحفونـي=شربه على ذرعـان ذولاك مغبـون
وتم الجـواب وبآخـره سامحونـي=وانتم من اللـي بالمهمـات يشفـون
واهدي سلامـي جعلكـم تسلمونـي=عداد من فـي طاعـة الله يصلـون
وصلاة ربي عـد وبـل المزونـي=وعداد من في بيـت مكـه يلبـون


ورد عليه الشاعر الكبير بدر الحويفي .. يقول بدر:


يامرحبـا عـداد وبـل المـزونـي=نو الجبـاه وناوتـه ديـم وغشـون
ذعذع له الشرقـي وجـوّه اسكونـي=ساق وتساقى بيـن وديـان وبطـون
وطيّر حشاط القاع نـدف الغشونـي=واستبشـروا نـاسٍ لنـوه يخيلـون
هـذا وانـا ممنـون للـي نصونـي=بابيات دافع هيضها حـب وشجـون
جـزاء شكالـي مخلفـات الذهونـي=وانا مسكـر دونهـن بـاب كيلـون
يشكـي غـرام معسـلات العيونـي=احيا زمان الباهلـي وابـن لعبـون
يوم الهـوى مالـه دخـل بالفنونـي=والنـاس بالعـشـاق مايستشـكـون
واليـوم بالعشـاق تشيـن الظنونـي=الدور غير الدور له سبـر وعيـون
النـاس باقـرب نـاس ماياثقـونـي=من كثر مايهـرج عليهـم ويوحـون
وعكـر مـزاج منسعـات القرونـي=اللي لهن وزر المشاعيـف صابـون
خشوف الصحاري هافيات البطونـي=ليا لايعن راع الهوى كونهـن كـون
قبلـك شكولـي حبهـن وازعجونـي=واقنعتهـم باسلـوب مهمـا يحلفـون
نـاسٍ عليهـن ياجـزاء ينحبـونـي=لولاي اهـدّي جوهّـم كـان يبكـون
واما انت موضوعك دمجتـه بشونـي=عسى السبب ينفع وبـدوك يطيعـون
ليا جيتهـم قلـت الخـوال جلبونـي=وانا وقفت بسوقهـم كـان يشـرون
وان كـان هـم بالجـاه ماقدرونـي=ولا صار للشيمـه ملافـي وماعـون
مع باب ثانـي جيتهـم لـو شنونـي=واغريتهم بالمـال مهمـا يصـرون
قلت افرضـوا يالربـع لا تستحونـي=اللـي تبونـه لـو تقلـون ملـيـون
وتشـاوروا فـي رايهـم وفهقونـي=وانا اتحـرا ياجـزاء وش يـردون
وطال انتظاري ياجـزاء وبحلونـي=وخليتني جمرة علـى راس غليـون
وسمعت مدري قيـل نـاس ابلغونـي=ان الغضي حبلـه معقـد ومشطـون
ولا هو وكاد العلم مصـدر اظنونـي=واليا كربـت العلـم قالـوا يقولـون
صريح مـار النـاس ماصارحونـي=نوب افتهم منهـم ونـوب ايتناجـون
وازريـت اميـز رايهـم واشغلونـي=وقالوا بشرط ان كان بالشرط ترضون
قالـوا نبـي مـع نجعنـا تنجعونـي=ودام النسب من بيننـا ماتحضـرون
وانـا بحكـم المرتضـي وكلـونـي=ان كان حكم الشرع وان كان قانـون
ابا اجتهد في واجـب اللـي نخونـي=عسى يوافقنـي بهـا حـظ وتهـون
ثنتيـن فيهـن ياجـزاء لزمـونـي=بالجاه والا المال حاضـر وممنـون
وزودٍ علـى الثنتيـن لا تشرهونـي=مافرض على طوق العرب حد مسنون
وانت المخيـر ياجـزاء واخبرونـي=والبـدو مطلبهـم عليكـم تـبـدوون
اما امتثـل للشـرط والا اعذرونـي=البـدو عيّـو ياجـزاء لا يليـنـون
هذا وسامـح كـان هسـت لحونـي=وعلى جوابـي ياجـزاء لا تقصـون
انا ابتحلت بـراي نـاس احرجونـي=ناسٍ شكولي ياجـزاء قبـل تشكـون
حيران باحـراج الشقيـق الحنونـي=اللـي مراسيلـه علـيّـه يطـقـون
واجهدت لكـن بالقصـور اتهمونـي=وقامـوا عليـه بالملامـه يحضـون
واحتار فكـري بامرهـم والهدونـي=لكـن مـاودي علـيـه يضيـقـون
وقلت افلحوا ياهل الهوى واتركونـي=باذني صقه ياهل الهوى لـو تنـادون
من يوم شفـت امفلجـات السنونـي=اللي تنـوع كـل ساعـة لهـا لـون
اللـي شعرهـا مايطـول المتونـي=وتزوي شمايل ثديهـا تقـل سيفـون
دايم على صـوت المسجـل تنونـي=وعلى صداه تطق الاصباع بالحـون
والله ماكـذب شـي شافـت عيونـي=ناسٍ على حيد الرصيـف يتمشـون
عقبتهـم مالـي بـهـم واعقبـونـي=من شكلهم يلقـون نـاسٍ يهوسـون
مانـي مخاطبهـم ولا خاطبـونـي=ولاني مقارن بين صاحـي ومجنـون
لـو ان عشـاق الهـوى عاتبونـي=انا احتمـل منهـم قناطيـر وطنـون
........
مماراق لي

 

 

 

 

متواضع..

شاكره لك كل الشكر لروعة طرحك وجماله
قصيده رااائعه وجميله
صح السان الشاعرين
وتسلم انااااااملك على الطرح
يعطيك ربي الف عافيه اخوي
لك ودي واحترامي..

 

 

 

 

الأخت سحر الغرام
شكرالمرورك الطيب
وتقبلي تحياتي وتقديري