فلسفة العقول

على رتم العقول اللي تعالج وضعها بهْبال= سرى ليل القلوب اللي تهاوت في مساحاتي وانا ماعاد لي قلب ٍ ايلا من قال , قال وطال= ولالي غير زفرات القصيد وطيب هقواتي أتابع فيك مفرود القصايد وافتخر واخْتال=وأحس احيان بحْروق الحروف وحر جمراتي أنا لو جيت لك مجنون قولي فلسفة عقال= واجِبْري كسر تنويني معاك ابْرفع ضمّاتي اباغيّر مفاهيم النحو والصرف والاهمال= وقانون البلاغه والعروض ابْكل كلماتي أبا اخلق نون للنّسوه , وبافتح باب للإحلال= وابدّل جمعكم مفرد وبَارفع كل كسراتي أبا انصب مبتداك بْكاف وامسح منْه حرف الدال=واحط اللام في وسطه يبيّن سر مأساتي ابا الْعن خامس الفاعل , وأغيّر صيغة الافعال=واحطه في خبر كانَ , واجدّد شكل صفحاتي ابا الغي سيْبويه ابْحرفْ , واصْنع بالنّقاط اجيال= وبَاشْطب طرْح أبو الأسود مع خالص تحياتي أبيك انتي اجابة منْ , وعطف الواو , واسم الحال= وابيك الفعل والفاعل , وكل أهداف نظراتي أبيك انتي قواعد صرف , وحزم الجد واستهبال= وابيك اعْقول تفكيري , وصوت الكذب بسكاتي أبا اعقد مؤتمر قمه , وبافْرض حظر للتجوال= وبَامْنع رجة ( امعمّر ) , من الغاء إجْتماعاتي ابادعي قلبي وعقلي , وكل احساس صال وجال= واباجْمع كل احزابي , نقرّر ماهو آتي : بما أنّ الظروف الآن , لاتسمح بأيّة حال= بأي اجراء روتيني , على سائر دويلاتي عليه الآن , فلْيعْلنْ , طوارىء والحمول اثْقال= ومنْك انتي , ايصير اول , ظهوري وانتصاراتي أبي كفْ , وهدبْ عينْ , ونقاوةْ قلب واستبسال= وابيك القائد الاعلى , لكل اجْيوش قواتي ابي وقفه , من اعْيونك , تكفّي عن مية رجّال=أبي فزعه , وابي نزعه , وأغيّر كل نزعاتي وانا اخترتك لأن اسمك , يسرّي بي شجون ٍ طال= يشجعني على العليا , واحقّق كل طموحاتي لانّك رحمة الكافل , بعين ايتام وام اعْيال= ولانّك سطوة القاسي , بعين ادْموع وجناتي ولانّي كل ماشفتك , عطيت الحمْل والحمّال=أهابك هيبة العالم , لحزني وانفعالاتي أناظر عينك اليمنى , واشوف الليل والموال= وأناظر عينك اليسرى , أشوف ابشع نهاياتي واضيع اهناك مابين الرموش وبين حبّة خال= واحب الموت لعيونك , وكنْه اجمل محطاتي أنا جيتك ولع عاشق , يدوّر فيك راحة بال= ولا فكرت لو لحظه , بجرحك لو بأبياتي أنا الدمعه وهي دمعه , اذا طاحت وهي اذلال= أمد الْها هدب عيني , والحّفها عباياتي واخلّي رمش يحظنها , ورمش الْْها يصير اظلال= حرام اتموت في عيني , وهي رمز لمعاناتي وبعد هذا تجين انتي , تسوقين الجروح أشكال ؟= وأنا اللي كنْت احِسْب انّك , حلاة الروح في ذاتي ؟ أما تخْشينَ أنْ يفْنى , بِفعْلُك ِ شاعرٌ قد آل= بجرحِكِ للْهَلاك امسى , طريح الإلتفاتاتي ألا ويحَ القُلوبْ اللي , تِهِدْ ابْصَدْ صُمْ اجِبال=والا ويحي اذا بارضى , هواني أو مذلاتي تراني ساكت ابْكيفي , واذا شفت المعدّل مال=ابا اغْسل كل مافيني , من احساسي بزفراتي وابا حرّم على نفسي , لو اسْتسلمت لبس اعقال= ولو ما الغيت طاريِّك , نهائي من سجلاتي وترى اللي فات ذا كلّه , مجرد فلسفة عقال= وانا عاقل واموت ابْرك , ولاترخص قناعاتي

الشاعر:جميل بن زريع