شبيب يامشــكاي قرب وداعـــي!

السلام عليكم ورحمة الله وبركاته
هذه القصه يمكن البعض يعرفها، وانا من العاشقين لهذه القصه وابغي اقدمها لكم لو بتعجبكم مثل ما عجبتني
القصه تقول:فيه شيخ ينقاله عامر النشمي وعنده ولد واحد... وعامر النشمي ذبح واحد بالخطأ وأهل القتيل طلبوا بالثار ويحرمونه ولده مثل ما حرمهم ولدهم.
الشيخ عامر شد من القبيله وسكن في مكان ما فيه حد علشان يسلم على ولده من الذبح... وفي يوم من الايام جاورهم رجال ومرتـه وبنته ويوم سأل الشيخ الرجال عن اسمه قاله انه "زبن الماطر" وطلع الرجال اللي الشيخ عامر قاتل ولده ... الشيخ عامر ما عطي الرجال اسمه الصدقي وغير اسمه والرجال ما يعرف عامر شخصياً.
ورجع عامر لبيته وقال لمرتـه ان لو جاتها مرة جارهم تقولها ما عندها الا بنت وحده وخرسى... وطلب من ولده انه يلبس ملابس الحريم ... نشمي ما رضاها على نفسه ولما ترجاه ابوه لان ماعنده غيره وافق علشان يرضي ابوه.
عاشوا مع بعض فتره وهم ما يعرفون ان عند الرجال ولد ماهو بنت ... وكانت بنت زبن تحاول اتكلم مع البنت بس البنت تغطي وجهها واذا سألتها مرت زبن عن بنتها وتقولها ليه بنت تغطي وجهها تقولها لانها ما تحب حد يشوفها حتى الحريم.مرت الايام ونشمي يشوف قدامه هذي المزيونه اللي اسمها منوه وحبها مع الوقت وهي حســت وشكت فيه وفي يوم من الايام اعترف نشمي لمنوه بأنه رجال ماهو مره قالتله انها كانت حاسه بهذا الشئ ... البنت ما علمـت اهلها بهذا الشئ.وكبر حب نشمي ومنوه ... ابو نشمي وامه لاحظوا هذا الحب وكان عامر خايف على ولده .. لان زبن لو عرف من هو الرجال اللي مجاوره كان ما كان الحال كما هو عليه الحين... وفي يوم من الايام .. غاروا قوم على حلال ابو نشمي وجاره ... وقامت امه تنخاه يلحق القوم وتنادي بسمه وكانت حرمه الجار تسمعها ... وقام نشمي وخذ فرس ابوه ورد الحلال ونهزموا القوم.عرف زبن ان جاره خدعه وخل طول ذا الوقت بنته مع ولده وما قاله شئ ...وشافها كبيره في حقه ولكن علشان جيرة عامر اللي ينحلف بها خلت الرجال يفكر في الرحيل احسن من انه يخسر صديق مثل عامر ... وعامر اعترف لزبن بحقيقة الامر ...وانه ما قصد انه يقتل ولده وانه كان غلطان.... خطب عامر بنت زبن لولده ولكن زبن رفض الخطبه ورحل عن الديره علشان ماهي من المروه انه يقتل جاره اللي أكل معه وقضى كل هذا الوقت معه...ولكن يقدر انه يرحل وما يشوف عامر واهله مره ثانيه.طبعاً قلب نشـمي مات بهذا الرحيل ... ورجع عامر لأهله وقبيلته بس نشمي طلب من ابوه انه يرحل وراى منوه واهلها ووعده انه يرجع بعد ما يحصل اللي يبغيه.... نزل نشمى على قبيلة الشيخ شبيب وعرف ان أهل منوه نازلين في قبيلة الشيخ شبيب... وطلب من الشيخ شبيب انه يشتغل خادم يسوي القهوه ويقدمها للرجال في مجلس الشيخ وهو الشيخ نشمي ولد الشيخ عامر النشمي ..رضى كل ذا بس علشان يكون قريب من الانسانه اللي حبها.. وقال لشيخ شبيب ان اسمه فلاح ... منوه عرفت ان نشمــي في الديره وانه يشتغل عند الشيخ شبيب وكل ليله يتلاقون بالظلام ويسولفون وياخذ اخبارها ومتى يقدر يكلم ابوها وهي تقوله اصبر بعد ابوي ما برد غضبه.مرة شبيب لاحظة ان فلاح كل ليله يسري عن افراشه وشكت انه يسوي شئ يضر الديره وخبرة الشيخ بهذا الشئ والشيخ عصب من هذا الشئ وقال لو هو يسوي شئ خطأ بيذبحه في وقتها... وانتظر الشيخ حتى انتصف الليل وشاف نشمي يرتب فراشه على اساس ان حد راقد مكانه وطلع من الخيمه ووطلع الشيخ شبيب وراه وسمع نشمي وهو يعوي مثل الذيب علشان تطلعله منوه ... وكل هذا والشيخ يرقبهم من بعيد وقال لازم يقرب على الخيمه علشان يعرف اللي يقولون... ولم اقترب من الخيمه سمع منوه وهي تكلم نشمي وتقوله يصبر لين تنفرج مشكلتهم وتكلمه عن الشيخ شبيب ونشمي يشكر في الشيخ شبيب والشيخ شبيب يسمعهم ... وطلبت منه منوه انه يقولها قصه تعارفهم من اولها وكأنها ما تعرفها وقعد نشمي يقولها والشيخ شبيب يسمع .. وبعد ما خلص من القصه تم يطالعها كأنه يوادعها وكأنه اخر مره اتشوفها اعيونه طلبت منوه انه يكلم الشيخ نشمي في سالفتهم وهو راعي نخوه وما بيقصر وما بيرتاح لين ايجوزهم من بعض وقالها انشاء الله بكره اقوله....رجع نشمـي للخيمه اللي هـوفيها وهي في نفس الوقت مجلس الشيخ ورجع الشيخ لخيمة زوجته وقالها على اللي شافه وطلبت منه انه يساعدهم وقال انه بيساعدهم وبيزوجهم غصبن عن ابوها بغى او ما بغى وهو يقول هذا الكلام سمع نشمي يقول هذي القصيده ينخى فيها الشيخ شبيب ويقوله عن حاله:
شبيب يا مشكاي وقتي جرحنى
...........................شبيب يا مشكاي قرب وداعي
طلبت منه منوتي ما منحني
..........................ليت الزمن لمعذب القلب طاعي
صبرت صبراً في حياتي ذبحني
.........................قبلت أهين النفس عقب ارتفاعي
من اولاً من شاف فعلي مدحني
.........................واليوم كني باوسط الناس راعي
في غربتي حزني ودمعي فضحني
.........................ماعاد لي بالناس عيناً تراعي
حاربت وقتي مير وقتي طرحني
..........................واسباب موتي رغبتي ومتناعي
شبيب يامشكاي وإن مت صحني
...........................شبيب يا مشكاي قرب وداعي
الشيخ شبيب سمع القصيده وقال وهو في خيمته انا لعيناك يا نشمي وما ياخذ منوه الا انت وكان بيطلع لنشمي وبيقوله ولكن مرته منعته وقالتله خله اينام الليله وبكره مع طلعت الفجر كلمه في الموضوع... الشيخ ما جاه نوم وهو يبغي الفجر يطلع ... ومع طلعت الفجر راح مجلسـه علشان يشوف القهوه وشاف ان نشمي نايم وما رضي يصحيه وجوا الرجاجيل للمجلس .. وبين هذيلا الرجاجيل واحد من ربع نشمي وقاله يا فلان صحي فلاح من نومه وناده بسمه الصدقي ... ارجال ما عرف شو يقول قاله سو اللي اقولك عليه وراح يصحي نشمي ولكن نشمي ما صحى.... قتل الحب نشمي والشيخ يصيح عليه ويقول قتل الحب نشمي ياويلاه يوليدي وطلب من واحد من الربع انه يروح لخيمه زبن الماطر ويقول بصوت عالي نبغي الفاس من عندكم ولو سألتك مرة زبن لويش ودك الفاس قولهم راعي القهوه فلاح مات ونبغي ندفنه.راح الرجال بيت زبن وقال اللي قاله له الشيخ ... منوه من سمعت كلمة مات صرخت بأعلى صوتها وطلعت تركض من الخيمه لين وصلت خيمة الشيخ ويوم شافت جثة نشمي قدامها طاحت عليها ميته.
وأمرالشيخ انهم يندفنون قريب من بعض .... فرقتهم الدنيا وجمعهم الموت.