علوم البدو

علوم البدو

بسم الله الرحمن الرحيم

السلام عليكم ورحمة الله وبركاته


امًي وابٍوي مالهًم غِير ظٌلِي..~ وّلا اّّلغضي لادوٍر الظًل يلٍقآهـ.


تقول جدتتي دايم هالبيت وفي مواقف معينه ..سالتها عن سالفته بحكم اني هاليومين جالس انبش معها السوالف القديمه


تقول جدتتي :

كان فيه رجال متزوج له مره معروفه بالزين ..وكانت ساكنه عند امه المهم في مره من المرات كان فيه زي العزيمه ويوم راح لها الرجال وتعشى وخلص خذا معه قطعه لحم وحطها بجيبه وراح للبيت


ولما دخل الشق كانت امه وزوجته نايمات راح لزوجته وصحاها وقالها قومه جبت لك هاللحيمه ابيك تذوقينه المهم حرمته قامت وقالت: عطيت امك ..قال هو لا ..قالت طيب وكلتها..


قام الصبح مالقي زوجته ..
راح لاهلها يبي يرجعها قالت مارجع مع اللي مايبر بامه ..مارجع معه ..
وبعد الوسايط والزحمه ..مانفع ..طلقها


وصار يجيها خطاب كثيير وكان شرطها تبي بيت لحالها وان مايكون له ام وابو ..او ماتسكن معهم
وكان لما يقبل هالشرط ترجع تهون تقول لا ..
لين جاها واحد كان وحيد اهله ويوم شرطت عليه قال هالقصيده ..



أشوف مسلوب الحشا مرسلٍ لـي/ رسالةٍ تجعلنـي أصخـي بفَرقـاه
إن كان ما صيـد الحبيّـب تغِلّـي/ ما أقبلك يالمرسول لا أنت ولا ايّاه

أمّي ليـا شافَـت زولـي تهَلّـي /وألاّ الغضي لا شاف غيري تَحَلاّه !
ما أنسى سِنينٍ ديدَها سِقمـةٍ لـي/ وأركب على المَتنَين وأقول يا يـاه

دَور السِنة وبطنَهـا حِجـرةٍ لـي/ البَرْد ما أشوفه والحَر مـا أدنـاه
أمّي وأبوي ما لهـم غيـر ظِلّـي /ومِن دَوّر الظِل يـا تـرف يلقـاه

الوالدَيـن لهـم بقلبـي مَحَـلّـي/مَعروفهم طول الأيّام مـا أنسـاه

\\\\

ويوم سمعت هالقصيده وافقت على طول وقالت ان هالشرط مجرد اختبار ..





حظ الملايح بالارض طايح وحظ القبايح بالسماء لايح..

من السوالف بعد سالفه وحده شينه بالحيل وتزوجت لها رجال طيب ووسيم ..

وسبحان الله تعلق هالرجال بزوجته على شينها

كانت لزوجته

جاره مزيونه جميله بشكل لايوصف

وكانت تغار منها وتخاف زوجها لايشوفها ويتزوجها ويخليها..

وفي مره من المرات كانت هالزوجه وجارتها ببركه قريبه يغسلون فيها ملابسهم ..
وخذتهم السوالف واللعب وقررن انهن يتسبحن بالبركه
وهن يتسبحن مر زوج الشينه وخافت يشوف الجاره المزيونه ويعجب فيها

وسوت نفسها مغمى
عليها وراح تغرق وجاك الرجال طاير لا يمين ولا يسار
همه بس ينقذ زوجته وياخذها معه ..

ولا حتى عطى المزيونه نظره ..

استغربت المزيونه اهتمام هالرجال بزوجته مع انها شينه وهي احلى

وقالت صدق ..

حظ الملايح بالارض طايح وحظ القبايح بالسماء لايح ..




وِصِيِــــه.

تقول جدتتي كان فيه شيخ كبير وله ولد يوم حس بقرب منيته وصى ولده بوصايآآ..

قاله ..ياولدي لا تعطي سرك للحرمه ..ولا تخاوي امير..ولا تزوج العفن (الردي)..
وتوفى الشايب ..


واحتار الولد بوصيه ابوه ..مافهم وش الحكمه من هالوصيه ..

قال في نفسه بجرب العكس ..كود اني اعرف الحكمه ..

وفعلا زوج خواته وحده زوجها طيب والثانيه زوجها لعفن ..


وخاوى له امير ..
وكان للامير نعامه ..
جاء اخونا بالله واخذ هالنعامه اللي غاليه جدا على الامير وخباها عنده ..
وراح لأمه ومعه قطعه لحم


وقال يمه انا ذبحت نعامة الامير وهذه قطعه من لحمها
وتكفين لا تعلمين احد هذا سر بيننا
المهم امه أكلت من هاللحم اللي ماهوب اصلا لحم النعام


وراحت عند جارتها وقالت لها بقولك سر وعلمتها بالسالفه لين انتشر الخبر

وعرف الامير ان نعامته مذبوحه

وقلب قلبه على اخونا وطلب منه ديه هالنعامه وقال ابي 100 ناقه

راح اخونا لزوج اخته (العفن ) وقاله ابي فزعتك ابي 100
الرجال هنا تعذر وقال ماعندي الا هالتيس ..وعطاه هالتيس

ثم راح عند زوج اخته الثانيه (الطيب )


وقال ابي فزعتك ابي 100
الرجال هنا وقف وقفه مع نسيبه وجمع منه ومن ربعه 100 ناقه

المهم اخونا راح للامير ومعه الـ100 ناقه والتيس والنعامه ..وقاله انه ماذبح النعام بس كان يجرب وصيه ابوه

وقال له الوصيه المهم الامير سامحه ورجع له الـ100 ناقه محمله بالهدايا والقماش والزاد ..
اخونا رجع الحلال والهدايا لنسيبه الطيب ورجع التيس لنسيبه الثاني ..
وانقهر العفن وقال لو كنت ادري كان عطيته اللي عندي ورجعن لي محملات بالهدايا..



هنا عرف قصد ابوه من الوصيه
ان الحريم من النوع اللي مايكتم السر ..
لاتخاوي منهو اعلى منك لانه يستغني عنك بسرعه
واحرص على قربته الطيب ..

/


وسلامتكم

منقول

 

 

 

 

متواضع..

شاكره لك كل الشكرلروعة طروحتك وتواجدك المستمر
ويعطيك ربي الف عافيه على القصه
لك ودي واحترمي..

 

 

 

 

متوآضع

شاكر لك طرحك يعطيك العافيه

مــــودتـــــي

 

 

 

 

الأخت سحر الغرام
الأخ أحمد موسى

وتقبلوا تحياتي وتقديري

 

 

 

 

متواضع اصدق تنفع هالقصص قبل النوم


ههههههههه


كل الشكر ماقصرت

 

 

 

 

الأخت حروف

وتقبلي تحياتي وتقديري