الشيب .. وما أدراك ما الشيب وأجمل ماقيل

السلام عليكم


الشيب .. وما أدراك ما الشيب ، هو ذلك البياض الذي يلوح في الرؤوس والأشناب واللحى كنذير أقتراب العمر من آخر مراحله ـ والأعمار بيد الله .

هنا سأورد لكم بعض ما قاله بعض شعراء النبط في الشيب :


فيقول الشاعر / مرشد البذال :


من يوم بان الشيب في عارضلي = والكبر بين في عظامي فعوله
اليوم جزت من الجهالة لعلي = مثل الذي في توبته باركوله
أيامي اللي من قديم ضحكن لي = أقفت كما نشر بعيد محوله

ويقول عبدالكريم المزروعي :


والشيب جاني قبل وقت المشيبـي = والراس من كثر التهاويل شابـي
وقدمت شكوايه على اكبر طبيبـي = وابديت له شكواي بايـن وغابـي
ومـا فادنـي بعـلاج الله حسيبـي = مثله كثير من العرب ما درا بـي

ويقول شاعر آخر :


الشيب جاني وانا جيته = ونفسي من الشيب مستحيه
لو هو على الراس غطيته = مير البلا صار في اللحيه


ويقول عبدالله بن سبيّل :


أخذت لي في ماضي العمر سجات = يوم الهوى قايم وأنا أتبع هوايه
يوم إن لي مع تلع الأقارب حرفات = أبيع وأشرب بينهن بالسّعايه
واليوم شبت وتبت عن كل ما فات = وطويت عن كل الموارد رشايه

ويقول سلطان الأدغم السبيعي :


يا بنت والله ما بهرجك خمالي = وما انحاس بالي يوم طرّيتي الشيب
والشيب هو قبله وجيه الرجالي = وجيه الرجال اللي شمو على الطيب
كم أشمط لاهاب بعض العيالي = يارد على حوض المنايا إليا هيب
وخطو الغليم لو بوجهه جمالي = يصير دعبول هروجه ربابيب

ويقول الشاعر عبدالله بن فرج الشمري :


الشيب يتعب شمّخ النيب والذيب = وحتى النبات أليا كبر قيل عاسي
وإن شبت تجفاك البني الرعابيب = ومن عقب ما انت جنيه ترجع نحاسي

ويقول طلال السعيد :


الشيب ياعايض غزا عارضي شيب = طفت اربعين وقرّب الشيب منّا
شبنا يا بو ثامر حصان الاطاليب = ياليـت مـرسـوله لنا ما تعنّا
الشيب مابه عيب مابه عذاريب = لا شك عيبه يطرد البيض عنّا

ويقول أيضاً :


يا علي لو تشوف الشيب ماني بشايب = لابسات البراقع يا علي شيّبني

ويقول ذيب الشمري :


قالت تعذر قول حان المشيبي = والشيب ما به للنشاما عذاريب
قلت أعتقد ما هو لجيلي قريبي = ولا داعي أبدي للقضى شارة الريب
الوقت شيب بي قبل وقت شيبي = حسبي على سود الليال المعاطيب
والناس قالوا للفتى ما يعيبي = العيب باللي ما سلك منهج الطيب
وإن شبت ما ينقص وقاري وطيبي = عند الرجال اللي تعرف المواجيب


ويقول الشاعر جمل القحطاني :


الشيب ماهو عيب يابنت الأجنـاب=الشيـب للرجـال عـز وحشيمـه
الشيب له معنى ومدلول وأسبـاب=يعرف بها عنـد العقـول الفهيمـه
الأوله شيب العوارض والأشنـاب=فـلاح للـي سكـتـه مستقيـمـه
والثانيه شيب الحواجب والأهـداب=هذاك رجلٍ تاعبٍ مع حريمـه
والثالثه شيب النواصي ليا صـاب=يصيب من وقته غدا لـه غريمـه


ويقول فلاح بن حثلين :


الشيب يا خالد بدا قبل حلّه = وإن كان ذا كبر ف لاني إبجزاّع
مدري بلاي أمفارق الخل خله = وإلا البنادق يوم تاتي لها أنصاع


كما أورد أبن عمّار الشيب في ألفيته الشهيره عندما قال :


واللام .. ليـت العمـر ينكـس لحلّـه = قيمـة ثلاثيـن السنـه فـي محلـه
الرجـل قبـل الشيـب واحلـو دلـه = وأن لاح فيه الشيـب مافيـه لـذات

ويقول ماجد بن ربيعان :


من لا تعب قبل حل الشيب = دروب المشاكيل فاتنه
ومن مات ما ادرك علوم الطيب = عميت عيونٍ ينوحنه

ويقول محمد خلف الخس :


الشيب يا راع التماثيل سنّه = ما عذرب اللي ينطحون الطوابير
الشيب ما به عيب لا تحسبنّه = العيب من جنب طريق المناعير
من شبّ شاب ولو سنينه عطنّه = والشيب في وجه الرجل زود توقير


ويقول شنوف العريفج :


لا والله إلا شبت والشيب بـي لاح = راح السواد وجا بدالـه وضاحـي
الشيب دوك بعارضي بيـن وفـاح = اضفي عليه وبان من كـل ناحـي
حدا الثنايا هالزمان ارقـل وطـاح = بغيت الزّه ميـر حـب المطاحـي
أهب يا عصر الصبا ما اسرعه راح = ياسرع مازلّت عصـوره وراحـي

ويقول الشاعر علي بن محمد القحطاني :


صبغت الراس مرة بعد مرّه = وعاد الشيب الاول في مقره
اثار العمر للمخلوق مرهّ = ولو جدد شبابه ما تجدد


غير أن بعض الشعراء انتقد صبغ الشيب ، كقول الشاعر هذال ابراهيم العتيبي :


أشوف ناس تصبغ الشعر بالعود = شايب وعمره قد توسد وساده
يحسب شبابه لا صبغ شعره أيعود = والعمر ينقص ما يجي في زياده

وقول الشاعر بدر الحويفي :


ماني بصابغ لحيتي لو غدت شيب = ماني مسود بأسود الصبغ شيبي
لا صرت لا عاشق .. ولاني بخطـّيب = وحقي من الخفرات حاشه نصيبي

...


أعطاكم الله طولة العمر .. وعساكم تشيبون على العز والطيب والعمل الصالح

دمتم بود

أخوكم .. عبداللــــــه الجــــلــــوي

.
.
.

ملاحظة :
حقوق الشيب محفوظة

 

 

 

 

عبدالله الله يعطيك العافية على الباقة من اشعار الشيب ، .

 

 

 

 

يعطيك العافية

اللهم أطل أعمارنا بطاعتك

 

 

 

 

اخوي ابو فهد شاكرلك مرورك العطر والجميل

 

 

 

 

اخوي الرحال شاكر لك مرورك ودعوتك الطيبه

 

 

 

 

هلا بالشايب
يخوي سبحان الله من طلع براسك ,,, وفي لحيتك ,, وفي ركبك ,, وأكواعك
كم شيبه بديت ابو فيصل تقول شعر عن الشيب ..

وسع صدرك اخذت زمانك وزمان غيرك ,,,
الغريبة يا ابو فيصل اني اوووول مررره اشوووف واحد في حواجبه شيب ..

الشيب مابه عيب مابه عذاريب
ـــــــــــــــــــ لا شك عيبه يطرد البيض عناا