من روائع /خلف المشعان

26-08-2008, 05:51 PM

((((من روائع الشاعر الجميل والرائع// خلف المشعان))))
ان كنت تنشد يالمسيكي عن الحال =
مالي على كتمانها عنك حيله
الصبر عن بوح الاحاسيس قتال =
والبوح في بعض المواقف فشيله
لو كل مايطري على البال ينقال=
ماكان شفت ان الثقيله ثقيله
ابطيت اكافح ضيقة البال بالبال=
وادفع بلا هاجوسها كل ليله
لين اقبلت مثل السحابه بهمال=
تشفي غليل اللي تزايد غليله
طاحت ولاوفق من حناياك منزال=
وابطلبك يابدر تكمى المخيله
ان قيل ترعد قلهم صوت زلزال=
وان قيل تبرق شف لها ادناة حيله
مابي تناقلها هل القيل والقال=
وتصير من بعد القصيره طويله
يابدر ماني عال لو صحتي عال=
شفني من الصدمات نفسي عليله
اشيل حملن لو يشيلنه جبال=
الله وامانه غير تصبح نثيله
ارمي من هموم الزمن واسحب ادبال=
وانزل عن الجوكر وغيري يشيله
(من كثر ماشفت بحياتي من انذال=
بديت احس ان النذاله فضيله)
ماطاح من عيني رجل طاحوا رجال=
ورجال يابن حنيف ماهي قليله
اقرب من اللي قالهم ضمن ماقال=
راكان بن حثلين راعي الجزيله
هذا ولد عمن وهذا ولد خال=
وهذا رفيقن مالقينا بديله
سبحان منهو يابدر بدل الحال=
وحط الجفا بين الخليل وخليله
هذا الزمن يبغاله لسان دلال=
من يستحي هالوقت واعزتي له
وقتن به الراعي غدا راعي دلال=
وكلن على طاريه ينفض شليله
ومن كان ساسه للردى مضرب امثال=
اليوم يحسب من كبار القبيله
المال يابن حنيف ملعون ابو المال=
ذل العزيز وعز ناسن ذليله