قصة وقصيده لشاعر \محمد القاضي قصة جميلة جدا

بسم الله الرحمن الرحيم

هذا الشاعر القاضي طول الله أعماركم كان هو وجيرانه كل ليله القهوة عند فلان المهم في يوم من الأيام وهم جالسين صار الرهن بينهم وبين القاضي على أنهم قالوا يا أبو عبد الله كل القصيد اللي نسمعه منك أكثره غزل هل أنت ما تقدر تجيب ؟ قال إلا اقدر أجيب؟ لكن وشو من عليه حتى إني أجيب؟ قالوا

ابدآ( يقول راعي البيت عشا الجماعة القابلة علي)أن جبت قصيده مافيها طاري غزل لا تقل عن ثلاثين بيتاً وإلا يصير عشاهم عليك إذا تعرضت للغزل قال تم ما يخالف اتفقوا على هالموضوع. قعد القاضي معه السبحه يومي بها ويونون بينه وبين روحه يتكلم ويومي بالسبحه

ويهوجس,عاد راعي البيت خاف ان القاضي ياكلهم في الرهن

المهم انه اخذ هاك الغضاره وخذها يبي يجيب فيها ماء من داخل الا يوم دخل وإلا البيت فيه الحريم الكبيرات في السن دائماً يصيرن في جهة منعزلين وفي جهة ثانيه البنات عاد تخبرون البنات لعوبات يدورن مكان يقعدن فيه يا أما في راس الدرجه والا في اسفل الدرجه يجتمعن, الحاصل يوم دخل هو وتلاقيه وحده من هالحريم الكبار والأوالله ان صوتهم طالع ,قالت سليمان كن حسكم طالع شوي قال : إيه والله عندنا القاضي وقاعدين نتجادل في كلام متراهنين حنا وياه انه يجيب قصيدة ما يجيب فيها طاري غزل وان حنا خايفين يا أم عبد الله انه ياكلنا بالرهن

قالت: لا ماياكلكم

قال:وش لون

قالت:نشوف له دبره خل الماء ويسهل الله

قال: زين وراح.وتقوم وحده من هالحريم ودور وحده من هالبنات دورت أجملهن وقالت تعالي يا فلانه راسك خليه جديلتين وهي تقوم فعلاً تعمل الجديلتين وتخليهن يتلامعن عاد الشعر اسود وزين ولبسوها هاك الثوب وقالوا نبيك لآمن القاضي بدأ في القصيدة وجا في نص القصيدة ادخلي وعاد هي رافعة ثوبها ملبسينها حجول وشايله الغضاره في يدها وطبعاً متخيرين اجملهن الحمره والبياض يتهاوش فيها وعليها عيون وجهه وهم القصد من هذا أنهم يبون يخلون القاضي (يطلع الرصيف) ولا يستمر في قصيدته هذا قصدهم حتى انه يخل بالرهن,عاد هي ماسكه الغضاره وموقفه عند الباب والحريم جنبها واقفات بس يبي يدخلونها ويخلونها تحط الغضاره وتمشي,جاء الرجال اللي هو راعي البيت وجلس وقعدوا يسولفون والجماعه قاعدين يقدعون وهذولا هم حاضبين من عنده وهو قاعد قال هاه

يا أبو عبد الله وش تقول في الرهن اللي بينا وبينك تبي تجيب قصيدة ما فيها طاري غزل قال:إيه أبجيب في معاميلكم ودلا لكم قالوا توكل على الله قال القاضي:

-_-_-_-_-_-_-_-_-_-_-_-_-_-_-_-_-_-_-_-_-

وهذي هي القصيدة

-_-_-_-_-_-_-_-_-_-_-_-_-_-_-_-_-_-_-_-_-

يامل قلب كل مالتم الأشفاق

منة عام الأول به دواكيك وخفوق

يجاهد جنود في سواهيج الأطراق

ويكشف له اسرار كتمها بصندوق

إلا عن له تذكار الأحباب واشتاق

باله وطاف بخاطره طاري الشوق

قربت له من صافي البن مالاق

بالكف ناقيها من العذق منسوق

احمس ثلاث يانديمي على ساق

ريحه على جمر الغضا يفضح السوق

حذراك والنيه وبالك والأحراق

واصحا تصير بحمسة البن مطفوق

لا أصفر لونه ثم بشت بالأعراق

صفرا كما الياقوت يطرب له السوق
وعطت بريح فاخر فاضح فاق

ريحه كما العنبر بالأنفاس منشوق
دقه بنجر يسمعه كل مشتاق

راع الهوى يطرب إلا دق بخفوق

ولقم بدله مولع كنها ساق

مصبوبة مربوبة تقل غرنوق

خله تفوح وراعي الكيف يشتاق

إلا طفح له جوهر صح له ذوق

اصغر قموره كالزمرد بألا شعاق

وكبار هالطافح كما صافي الموق

وزله على وضحا بها خمسة ارناق

هيل ومسمار بألا سباب مسحوق

مع زعفران والشمطري إلا انساق

والعنبر الغالي على الطاق مطبوق
فالا اجتمع هذا وهذا بتيفاق

صبه كفيت العوق عن كل مخلوق

بفنجال صين زاهي عند الأرماق

يغضى بكرسيه كما اغضاي غرنوق

إلا انطلق من ثعبته تقل شبراق

رنق تصور بالحمامه على الطوق

شكل على الفنجال لونه إلا راق

دم الغزال إلا أنمزع منه معلوق

ذوقه الا منه تسلسل بالأرياق

عليه ماء من صافي الورد مذلوق

كاس الطرب وسرور من ذاق لهذوق

-------------------------------------

::وإلا يوم مرت الـبــنـت:: قـال:

_-_-_-_-_-_-_-_-_-_-_-_-_-_-_-_-_-_

يحتاج من بيض العذرى الا فاق

غرو يمز شفاه والعنق مفهوق
عبث يعيل بحبته ما بعد ماق

وهو يضاهي زاهي البدر بشعوق

في وجنتيه إلا غنج ضوح براق

عجل رفيفه بالطها مزنة طبوق

سحرً كتب من جبر عينيه بأوراق

خديه صادين ونونيـن من فوق

كن العرق بخدودها حص الأرناق

نشر على صفحات بـلورة الشوق

إلا تبسم شع واشراق بالأفاق

نوره يفوق البدرسحر منطوق

بالعنق كن المسك والورس براق

ما مشخص في صدري الشاخ مدفوق

أبو دليق كن بأطرافه حــلا ق

حدر البريم وهافي الوسط مسروق

يمشي برفق خايف مدمج الساق

ويفصم حجول ضامها الثقل منفوق

اظن لو يمشـي بالا سـواق

من الملا ما يمطخ الخمس مخلوق

إلا حصل لك ساعه وانت مشتاق

فاقطف زهر مالاق والعمرملحوق

فايلا حضر ماقلت عندي فالارزاق

في يد كريمً كافل كل مخلوق

هــذا وصلوا عـدد مانض براق

على النبي الهاشمي خـيـرمخـلـوق

-_-_-_-_-_-_-_-_-_-_-_-_-_-_-_-_-_-

وطبعاً يوم انتهت القصيدة قالوا عليك الرهن انت اللي اخليت به عليك يا أبو عبد الله

قال: لا وش علي

قالوا نعم

فقالوا احلف ماتحلف يقوله لراعي البيت

قال : لا أجل إلا صارت المسأله وعودت لحلف لا والله الحق علينا حنا انت كريم وتستاهل ياأبو عبد الله ذبيحتين الأولى عن هالقصيده العصماء والثانيه حنا اللي اخلينا بالرهن وسوينا الحركه هذي

:::ملاحظه:::

اختلفت الروايات في القصة ويقال ان البنت ليست بنتهم وإنما خادمتهم

وإنها لم تضع الغضاره وإنما مرت من أمامهم وكأنها لا تعلم بوجودهم هذا والله اعلم

والسلام عليكم ورحمة الله وبركاته

 

 

 

 

شكرا ابو ماجد اتحفتنا بهذه القصه و القصيده نتمنا لك التوفيق

 

 

 

 

وحيد

شاكر لك روعة تواجدك وجمال ورقي

ما تقدمه هنا من المواضيع والقصص الجميله

لك تحيتي وتقديري

 

 

 

 

مشكور وماقصرت

 

 

 

 

شـكــ وبارك الله فيكم ـــرا لكم ... لكم مني أجمل تحية على مروركم الكريم .

 

 

 

 

مشكور وماقصرت على الطرح

 

 

 

 

وحيد الهليل

مشكوووووووور اخووووووووي الكريم

على هذا الابداع والنقل المميّز لهذه

 

 

 

 

وحيد هليل..

شاكره لك كل الشكر لروعة طرحك
قصه وقصيده رائعه
يعطيك العافيه اخوي
لك ودي واحترامي..