من ياكل لحوم المخاليق ماعاش

من ياكل لحوم المخاليق ماعاش
دام اكثر هروجه نميمه وغيبه

كنه موكل للسواليف مطراش
خبل ً يودي فالكلام ويجيبه

لكن على ماقيل مايفلح اللاش
ولا كل مرضان ً بتلقى طبيبه

سكر اذانك عن سواليف الاوباش
عشان مايلحقك شك ٍ و ريبه

الرجل لامنه غدت سمعته ماش
ماراح يلقى غير شرهه وخيبه

مايستره لو يرتدي قطعة قماش
دامه تبيّن للمخاليق .. عيبه

كم راس لو تصفعه الايام ينداش
ويطيح في وجه الظروف الصعيبه

وكم راس لا هوش عليه القدر هاش
يثبت ولو تكبر عليه المصيبه

ماكل منهو يسهر الليل خفاش
كم ذيب تسمع فالليالي قنيبه

الطيّب افرش له وسط صدرك فراش
واغدق عليه من العذوق الرطيبه

لا صار قلبه سمح و أبيض من الشاش
ولا يحرجك الا على زود طيبه

من كثر ماهي وقفته تبرد الجاش
وودك تكون اخوه والا قريبه

واللي تردى معك لو حاش ماحاش
من العلوم الغانمه والنجيبه

يبقى بنظرك انسان خايب وغشاش
لو كان له عندك معزه وهيبه

دور عن اللي لاسمع نخوتك شاش
اللي يقدر صدق قيمة صحيبه

والا الذي لا شافك بضيق وانحاش
هذا لاتسأل ليش طوّل مغيبه

عمر الردي ماعزه المال والكاش
ولاعذرب الطيب مع الوقت جيبه

من لايحسب حساب عقله اليا طاش
لازم يجي له يوم يردم قليبه

ومن لا خذا حقه من الناس لوعاش
باكر ليا من مات ياخذ نصيبه

سعود بن صالح ابن عقاب العواجي