خليل لايحج وانامهموم

خليــل لايج وانامهمــوم
مبطــي وانا ادور الطاسـه
من كثر ماني بهـم ملـزوم
الـراس تايـــه بلــولاســـه
طير الحديه طغى بالحوم
وداس النداوي ورى داسه
لا عـاش فـايز ولا مهــزوم
والصيــد صيده ولا قاسـه
البيـت بيتـه يجي معـزوم
والبــن يســويه محماسـه
من كل عقلي وانا مصدوم
ولا زاد ثـوبــي عن قياسـه
النفس ذاقت عذاب اللوم
والبال طـــول به عماسـه
لاتمتحنـــي وانـا مكلـــوم
ياخـوك الاوضاع منحاسـه
احاول اجمع شتات القـوم
والقــوم كلـن على راســـه
وحرمت نفسي لذيذ النـوم
كنــي غريبن يبــي ناســـه
من موق عيني ازيد السـوم
واستنكــر القـــدر ملاّسـه
اقدم وسيفــي غدا مثلـوم
والــروح للخيــر عسّاســه
عذب السوالف غـدا زيزوم
خرب الحباري نسى ساسه
الحلــم راحت وراه حلــوم
والفـرخ غـادي وقرناســـه
الــزود عنـدي وانا محـروم
هـوجاس تايه بهوجاســـه
ماهي هقاوي ولاهي عـزوم
كلن لــه طبــوع وسياســه
ماكـل جــولة لها شغمــوم
ولا غيّــر الجـــوخ ، لبّاســه
موت الخــلايق لها محتـوم
والمــوت يكفيك وسواسـه
ماهــو بعادة ولاهــو سلوم
ولايمنعـه جنــد وحراسـه
ياصـل غريقن يجيد العـوم
من غيــر تنبيــه وسلاســه
لا قال حاكــم ولا محكــوم
ولا فــك راعيــه متراســـه
والمرجلـــة ماتبي دبلـــوم
لــكنّـــها فــــنّ ورياســــه
وراعي الشهــادة يبي تعلـوم
قبــل القلـم ضـاع كرّاســه
فدعــان يا كعبـة المضيــوم
صكــو على اللي قضى باسـه
لافــرّق اللـــه لنــا ملمـــوم
ولا شـك الايـام دسّــاســــه
لا خيـــر في جمعنا مقسـوم
من غيـــر تحليــل ودراســه
جيــلن ورانـا يجـي مظلــوم
يجنــي محاصيــل حسّاسـه
اركـض وراهم غـلا وحشـوم
واجنـــب رخــــوم بلّاســـه
ماجبت غامـض ولا ملغــوم
المجـــد عنــدي ونوماســه
مجدن تليدن مهو مزعـــوم
جبنـاه بالطيـــب وشراســه
متعب القاعد