الولد وان طاب طيبه من خواله....

31-07-2009, 08:36 AM

الولد وان طاب طيبه من خواله... وان تردى فـعلم انهم خايبينـي
أشرب الفنجـال واكـب البيالـة... طيـبٍ واحـب سلـم الطيبينـي

السلام عليكم ورحمة الله وبركاته

من لا يعرف .. هذين البيتين .. بيتين اشهر من نار على علم ..

قد يجهل البعض قائلهما .. ولكن اكيد سمع بالبيتين من قبل ..

حتى اصبح مضرب مثل يتداوله كثير من الناس ..

قائل هذين البيتين ..

الشاعر / راشد بن حسن بن مانع بن رحيان الضاعني الملقب بــ ( ابن الذيب ) ..والد الشاعر محمد ابن الذيب

وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم

حادث وتوفي رحمه الله ..

راشد بن حسن .. كان يشتغل في شركة ارامكوا السعوديه .. وكان يملك سيارة الشركه ( جمس ارامكوا ) ..

وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل .. على سيارة

الشركه ..

حتى اشتهر عند البدو .. لا جا احد يبي يروح مكان ولا عنده مطيه والا موتر .. يمشي في طريقه ويقول عسا

يلقاني ( ابن الذيب ) على الطريق والا انا القاه ..

ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا شافوه ..

جاء يوم من الايام الى عجوز وعندها غنم تعد على الاصابع .. و ( راشد بن حسن ) .. كان مشغول ومتأخر على

الدوام ..

وشاف العجوز وشاف معها غنم تعداها وتركها .. عقب حزت في خاطره واستحى وراعي الطيب ما يجوز عن طيبه

وقف الموتر ورجع للعجوز ..

يوم جاها قالها يا مره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك

تأخرني زياده ..

قالت له العجوز .. خلاص رح الله يستر عليك يا ولدي ..

انا جالسه هنا انتظر ( ابن الذيب ) ..

هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه ( ابن الذيب ) .. هو

نفسه اللي هي تكلمه ..

يوم انصدم ( راشد بن حسن ) بقولها .. وتعجب !!

قال اركبي يا خاله انا ( ابن الذيب ) وابشري بعزك ..

ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم ..

وشلون توصيل الغنم ؟؟؟؟؟

حتى وصل علم .. للشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤساءه يأسوا

من المحاوله معه .. واعجبتهم شهامته ..

وصل العجوز إلى منصاها والمكان اللي تبيه ..

وقال هذى القصيده .

قالها ابن الذيب من هاجـوس بالـه=كلمـةٍ يلعـب بهـا والبـال زينـي
قالهـا يومـه طرالـه ماطـرالـه=من هواجيـسٍ تشيـب المرضعينـي
حالفٍ ماخذ علـى الطرقـي ريالـه=وبالثـلاث محـرم أنـه مايجيـنـي
لالقيت اللي على ( السكه ) لحالـه=يلتفـت ويقـول ويـن المستحينـي
أوقف الموتر حيـا وأبـي الجمالـه=يوم ولـد الـلاش وجهـه مايلينـي
الطمع في كـروة الرجلـي رذالـة=خص وان جابـه مجـال الغانمينـي
والردي فـي حالـةٍ ماهـي بحالـه=واعوينـه مـن كـلام الطيبيـنـي
الـردي لـو بـان مايذكـر عمالـه=مايعـد الـلاش مقصـور اليمينـي
أركبـه لعيـون مـن زيـنٍ دلالـه=ماتحاكـوا فـي قفـاه الرامسينـي
مابغى غيـري وانـا مابغـى بدالـه=قاعـدٍ لـي بالرجـا مـدة سنينـي
الولد وان طاب طيبه مـن خوالـه=بالخـوال يسـال قبـل الوالديـنـي
أشـرب الفنجـال واكـب البيـالـة=تابـعٍ سلمـي سـلـوم الأوليـنـي
ولاقعدنـا بالعمـل بنـا الـرزالـة=ناخـذ العليـا طريـق الفايزيـنـي
غرني بعض الرجـال بكثـر مالـه=مادرى ان الموت في حبل الوتينـي
كيف ينفعني وابا(..........) خالـه=مايقوم البيـت دام السـاس طينـي
ماش وين اللـي عوايـده الجمالـة=مثل ابن ظافر حمـد ليتـه يجينـي
الثنـا والجـود دايـم فـي خيالـه=علمـه ظافـر سـلـوم الطيبيـنـي
جـوّد العليـا ولزمّـهـا عيـالـه=وادركوا مـن علمتـه دنيـا ودينـي
واهني من باع حظه واشتـرى لـه=وسار في درب النبي وأخزى اللعيني
موقفـه مـاكـل رجــال ينـالـه=مـن بغـى ممشـاه يقعـد مرتينـي
كم ذبح من حايـلٍ مـن حـر مالـه=وعادتـه لطمـة خشـوم العايلينـي

وسلامتكم

31-07-2009, 10:32 AM

مابغى غيـري وانـا مابغـى بدالـه=قاعـدٍ لـي بالرجـا مـدة سنينـي
الولد وان طاب طيبه مـن خوالـه=بالخـوال يسـال قبـل الوالديـنـي

موفق بإذن الله ... لك مني أجمل تحية .

تقبلي مروري اختي شماليه والله لايحرمنا من جديدك

31-07-2009, 10:46 AM

كاكا

نوورت الصفحه

اسعدني تواجدك

ربي لا يحرمني طلتك

دمت برعاية الله

31-07-2009, 02:24 PM

بنت ابوهاا
قصه رائعه عن رجل شهم يملك كل مقومات الطيب وفعله

وفعل الطيب لايمكن أن يأتي تصنع وهذه خصله بطبع الأنسان

لايمكن ان يبدلها او يتصنعهااا

ابدعتي بأختيارك وروعة تواجدك الطيب

لكِ تحيتي وتقديري

01-08-2009, 06:19 AM

بدر الشمال

اسعدني تواجدك

نوورت الصفحه

ربي لا يحرمني طلتك العطره

دمت برعاية الله

01-08-2009, 01:09 PM

بنت ابوها
شكرا لك على القصه الرائعه والابيات الجميله
اللتي تعبر عن طيب الرجال وان الطيب ليسى بسهل مطلبه
ولا كل شخص يستطيع ان يكون طيب
واهني من باع حظه واشتـرى لـه=وسار في درب النبي وأخزى اللعيني
موقفـه مـاكـل رجــال ينـالـه=مـن بغـى ممشـاه يقعـد مرتينـي
كم ذبح من حايـلٍ مـن حـر مالـه=وعادتـه لطمـة خشـوم العايلينـي
شكرا لك وننتظر جديدك