هذي ديار اللي لها الفعل دستور
اهل الوفا ساس الفخر والبطولات
(جعـــافره) تــاريخها عــز مخبـور
و(بيضاء النثايل) شاهدٍ حي وثبات
تاريخــها ســطر التاريخ بسـطـور
وافعولهم بالـي ذكرته جسيمات
ربعي( اهل الجدعاء) ليا ردد الشور
مـا للــعمر يــوم الحـرايب امدارات
عدوهم يــــوم الـقوامـات مدحور
تـاريخهم وبـالمجد ماهـو روايــات
عدونـــا من فـعــلــنا دوم مــثبـور
وامجــــادنا متــعليه كـــل رايــات
(عقاب) خصمه دايم الدوم مقهور
و(حجاب)مع(لــزام)وقت القوامات
حنا كسبنا المجد والصيت مذكور
في وقت فعله بالسيوف الرهيفات
امدّلهينٍ بالـخطر فــطـــرٍ خــور
في ضفّــنا يرعن فياضٍ عذيــات
واليوم في حكم الذي للوطن سور
(اخوان نـوره)عزّهــم حـي مامات
في حكمهم ننعم بخيرات وقصور
ومعزّهــم رفـــاع سبـع السموات
#
سعود بن معزي العواجي
⚡⚡⚡⚡⚡⚡⚡⚡⚡
صدقت ياللي يمنا مرسل اسطور
جزل البيوت الطيبات النظيفات
تاريخكم ياطيب الساس مخبور
ابيضا نثايل له دلايل وبصمات
(عواجيةً) عند العشاير لهم دور
تاريخهم معروف مافيه شكات
وانصاح صياح الضحى براس مزبور
ركبو على قب المهار الاصيلات
وعدوهم يرجع ذليلٍ ومقهور
بضرب السيوف المرهفات الصقيلات
(وعقاب.) فعله واضحٍ كنه النور
(وحجاب ) في يمناه عند الملمات
(جعافره) وفعالهم مابها اقصور
اهل الفعايل بالسنين القديمات
تاريخكم (ياسعود) واضح مذكور
في صفحت التاريخ ماهي روايات
وصلاة ربي عد ما طارت اطيور
وعداد ماسارت انجوم السماوات
#
عبدالرزاق المطرفي
⚡⚡⚡⚡⚡⚡⚡⚡⚡