ضاقت حروف القصيده واكتست ثوب الحداد=وأعتصر هم القوافي بعد ماذاب الحديد
قمت أشايع للمعاني وابدع حروفٍ جداد=وأنتخي بعيال فكري وانتظر منها الجديد
قمت أحايلها بلطفي واحتضنها بالوداد=وارتجيها تبتكرني بعد ماجف الوريد
قالت أعلنت أعتزالي واكتساني أضطهاد=يوم راح الشايب اللي كان من جنسه فريد
وآترجى في حروفي يعلنن الأنقياد=يسعفني أرثي اللي راح في دربٍ بعيد
يايبه بعدك جفوني عافهن حلو الرقاد=من رحلت وكل مجد من عقب موتك بليد
ياماجفني في كنفك وفي حماية يدك ناد=وياما خدي من حنانك استزاد ويستزيد
يايبه سكر حنينك ذقته بسن المهاد=واندفن بعروق قلبٍ من صفاتك مستفيد
ياشموخٍ رغم فقره أغتنى بذاته وساد=واشهد أنه في عروش القلب عندي سيد سيد
من رحل وطريف وجهه شاحبٍ مثل الرماد=تبكي الريشه وتنعى للحفر أغلى فقيد
كل شريانٍ بفقدك ضاقت أحلامه وباد=وكل شبرٍ من ضلوعي لك بجوفه ألف ميد
رحت يارمز الرجوله رحت ياأغلى العباد=رحت لكن كل خصله من صفاتك لي رصيد
ياكبر هاك الفراغ اللي تركته بالفؤاد=وياصغر هاك الفضا اللي كان بوجودك مديد
قلبٍ أجتاح البياض ولا تعفر بالسواد=ينبض بحب القريب ويحمل هموم البعيد
يايبه من ثقل همي صرت أهيم بكل واد=وانقض جروحٍ سطت بي وآتعزوى بالقصيد
يايبه باصبر واباصبر وانتظر يوم التناد=عل ربي في جنانه يجمعن بك من جديد
حكمة الله في عباده قدر وشاء وأراد=بالقضا نؤمن ولله مايشاء ومايريد