بينك .. و بين المطر يا كبر وجه .. الشّبه=كنه .. هطولك نهار أمطر وهلّ .. السحاب
شف .. رشّه يرشّ الارض و يغسل .. الأتربه=وأنت .. إتغسلني من الأحزان .. و الإكتئاب
أظنّ .. مانيب مخطي يوم أشبّهك .. به=حتّى .. البرد فيه من لون الثمان .. العِذاب
وأكبر .. دليل إن خدّك دائماً .. يصحبه=لا لاح .. برقه و همّال السّحاب .. إستجاب
هذا .. أنت وأقرب مثال ٍ حيّ .. تستوجبه=ما قلته .. أستعرض أمامك بفنّ .. الخطاب
أمطرتني .. حب و أسقيت أرضي .. المجدبه=حتى .. امتلا خافقي و اخضرّ منك .. الجناب
ناهيك .. عن صوتك اللي كلّ .. ما تسكبه=يصبّ .. في اذني و ياخذني معه .. بإنسياب
ما قد .. سمع منك في شيّ إسمه .. الذبذبه=ألاّ .. ليا ذبت من نار المشاعر .. و ذاب
يا كم .. نهمني و أنا غافل و قال .. انتبه=الحب .. في ظاهره رحمه و بطنه .. عذاب
ماهوب .. عن علم بل من واقع .. التجربه=اللّي .. مضت لي معك و أصدرت فيها .. كتاب
و اقول .. ما شفت أجل وش صابني .. بسببه=ما أومى .. على جارحه ما بان فيها .. الصواب
مير .. أشرب الصبر فوق الجرح .. و استعذبه=لعيونك .. السود لو الصبر مرّ .. الشراب
لإنّك .. اللي عيونه تصقل .. الموهبه=ولا تجد .. في صفاته كلّها .. ما يعاب
خذ .. كلّ ما أملك من كنوز المشاعر .. هبه=بلا .. مقابل ولا أرجي من وراها .. ثواب
إطلب .. و يفدا عيونك كلّ .. ما تطلبه=لا يمنعك .. شيّ و عيونك طلبها .. مجاب
((رحيم الغنامي ))