قصيده بعنوان حي النسيم الشرقي
دوبك عليّه يا حمام الورقي=مالي على كثر النوايح طاقه
.
أمّا أستمع لي لين أغنيّ طرقي=وألا اكفخ بجنحانك الخفاقه
.
البارحه بان الشبه والفرقي=وسرّيتها بين الجمل والناقه
.
اللي وصلني من رعودي برقي=واللي بقالي من ورودي باقه
.
يا حبيّ لحيّ النسيم الشرقي=حبّ ٍ جديد ولا كشفت أوراقه
.
جيته وأنا بين الحواري طرقي=لين أطرقتني نظرة ٍ طراّقه
.
عسى فداك أم العيون الزرقي= اللي في سوق المكيجه سوّاقه
.
تسنّدي بي وأحدري بي وأرقي=وأخذي من القلب الشقي ميثاقه
.
على النقا .. شبـنا من اهل الدرقي=والوقت علّـقنا على معلاقه
.
تخاطفونا بالوجيه البرقي=واللفلفه والصحبه البراّقه
.
جيت البلد للي زرقني زرقي=وعوّدت أشيل من الهموم إطباقه
.
أحد ٍ ذكرني واستلذ بسرقي=وأحد ٍ نساني والعوض بفراقه
.
يا أم النمايم ولّعي وأحترقي=ماني من اللي يقطعون الساقه
.
والله ما يحفظ دميّ ألاّ عرقي=مالي ومال العالم البواقه
.
تعيش يا حيّ النسيم الشرقي=ولا يرفع الأنسان غير أخلاقه