يا مل قلبً يسج وفيه دولاجه= من واهج ً بالضماير قام يدرجها
في معزلً عن جميع الخلق وازعاجه=ما سمع من الناس لو تكثر لجايجها
ماغير اهوجس تقول مضيعً حاجه=واخذ واسند على روحي واهرجها
وادوج لو ما كان مارجلي بدواجه=ادله النفس لين الله يفرجها
يالله ياللي بيدك الضيق وافراجه=ياخالق الخلق يا قاضي حوايجها
افرج لعينً اذا غطت بسوهاجه=تجهز عليها الطواري لين تزعجها
عليك ياللي بقلبي كن وهاجه=وهاج نارً هوى الغربي يسارجها
بالصدر ضيقه ونوم العين هملاجه=عينً من العام والسهر متولجها
نوبً سهرها شديد ونوب نهاجه=مر تكن الدموع ومر تزعجها
راعي ثمان كما الياقوت لعاجه=كن البرد يوم يضحك في مفالجها
ياروح روحي وزرع القلب وانتاجه=الطف بحالً عليك الهم ساهجها
قلبا يناجيك باسلوب الهوى ناجه=يشكي لك الحال داخلها وخارجها
اما التفت له وتم الوصل بمواجه=والا بلا عشرة ً هذي نتايجها
وش ينفعك في حنين القلب واخلاجه=وجروحي اسبابها وانت ولا تعالجها