[ ياصاحبي ]
ياصاحبي لايسري الليل بدري
خلك بوسط الدار لاتجرح الليل
الليل توه وان تجليت يسري
ولليل ناس ماتمل التعاليل
خلك على تجريح الأحباب حذري
ماتدري إن الليل ستر المواصيل
ياحبي اللي بين عيني وصدري
يافرحة الماضي وخوف المقابيل
شوفك هناي وانت والله تدري
والله انا مشتاق ياصاح بالحيل
للقلب عين وانت للعين مغري
يامجرح القمرا بسود المظاليل
الدم يجري في عروقي وتجري
انا الصحاري وانت معشوقها السيل
يضيع في وصفك كلامي وشعري
اشبهك بالريم واوصفك بالخيل