نويت ابدا الكلام وكل ما قبل الكـلام شعور
يموت بداخلي واخفـي عن اللوعة تعابيره
بنيت من الغلا قصرٍ ومديت القصيد جسور
وقلت أنت الحبيب وكل ما فـ الكون لمنيره
عطيته كفي اليمنى وقلت آمـر وانا بالشور
فداك العمر لو كثرت علـى دربك مخاسيره
نسيت إن الحكي ياصاحبي في خافقٍ مهجور
خلّيٍ مابـه احساسٍ ولا ذرة مــن الغيرة
مثل من يزرع الصبخـا شجر ويبثها ببذور
يناظر زرعه ويرجـي متى تظهر تباشيره
عرفته قاسي جبّـار ومـع هذا بعد مغرور
جبل لا هـزه الاعصار ولا حرّك معاذيره
واظن اللي جذبنـي له كرامة عاشق مقهور
خذا منه الزمـن واجـد..ولا فكّـر بتقديره
تجاهل قلبي الشاري وهو في صدته معذور
قليل الحظ خانت به بهــا الدنيا مشاويره
نوى يثأر لمجنون الهوى في داخـله ويثور
على ذلٍ ملك نفســـه وسيّـرها بتدبيره
نعم لا كانت الدنيــا وهو فيها ذليل شعور
بيعلنها فراق وجعــل بالفرقى مية خيره.
/
\