[[[(رشَّة عطر )]]]
قصتي تحكي ألم
عن الحبيب اللي هدى قلبه عطر
عن الحبيب اللي مشى دربه عمر
عن الغدر
عن قصةٍ تبكي دهر .. غابت بها الحان السفر
يومٍ كبر حجم العذاب .. زادت مساحات الخراب
وصار كل الكون كلَّه .. في غياب
سافر الصمت بسماها
وحيدةٍ ما أحدٍ معاها
قالوا زمان
لا تهدي يالغالي حبيبك
حتى ولو رشَّة عطر
الخوف في يومٍ يسيبك
ويضيع في درب العمر
****
اتقابلوا .. دوم السَّعادة دربهم
اتقابلوا .. والكون يشهد حبهم
كانوا مثل .. .. زهر نشر ريحة عبير
كانوا مثل .. .. نهرٍ تغنَّى به غدير
كانت أميرة .. وكان عاشقها أمير
كانوا أمل
كانوا مساحات الهوى .. كانوا دوى
*****
وأهداها في يومٍ عطر .. تحت المطر
في أوَّل أوقات السَّحر
هاجت بداخلها العبر .. .. وقالت :
حبيبي أعتذر .. ما أقوى على قبوله
حبي ترى مثل الزهر .. ما أبغي ذبوله
كم واحدٍ غيري عشق .. وأهدى حبيبه مثلها
وأصبح على همس الهوى .. وأمسى يدوِّر وينها
لا يا حبيبي أعتذر ..!!
*****
وقال في جوف الكلام .. يا بنت ذا كله كذب
وايش دخل العطر بحكاية عشقنا
وايش دخَّله يا بنت .. هذا حبنا
هذي يميني .. لا ترديها أبد
و العطر مني هديَّة .. ما يغيِّرنا أحد
*****
قالت : خلاص .. حبنا ما ينتهي
هات العطر
وبعدها..! .. مرت ليال
وبعدها كل الفرح .. كل الأمل أصبح خيال
وسابها
وباع برخيص ترابها
استباحت بالقصيد أحزانها .. الألم ويَّا الدُّموع أوزانها
وكلٍ درى بالسالفة
وصارت مدينة بالحزن متوالفة
وابتدت في دربها رحلة عذاب
وأدركت صدق المثل وإنَّه هو الكذَّاب
*****
هذي حكاية قلب ما ملِّ السَّهر
كانت بدايتها أمل
وختامها
رشَّة عطر
صفـ القلوب آل جميل ــاء |