___ ( ورق محروق ) ___
على غير عاده والليالي مطر وبروق
زرعتي زهور الكذب بارضٍ نبت فيها
على غير عاده صرت تهوى فنون البوق
هدمتي قصور الحب بعد كنت بانيها
رسمتي على الكذب ولا كنت لي اشفوق
ونبرات صوتك بينت لي خوافيها
لقيتك جسد والحب منك غدى مسروق
لقيتك ضباب وريح وسموم ترميها
بعد كل جرحٍ منك حسيت ضياع احقوق
جمعت الحطب بيدي وبيدك تشبيها
بعد كنت صاحب حق اصبحت لي محقوق
ملك الغرور وقسوتك ما تخليها
حملتك في الرحله بقايا ورق محروق
نثرتك في ارضٍ ماحد(ن)قد سكن فيها
على دربك التايه لك اثار وقع احروق
جهلتي الدروب وعلتك ما عرفتيها
تعانق هجوسي هاجس الليل عند الشوق
تناجي النجوم ونجم مره يناجيها
غلاتك تموت اليوم مثل موت اي مخلوق
وبنساك دام ان المحبه نسيتيها