_سحاب الغرام__
لايطول غيابك خافقي مله
والرجاء فيك لاتنسى وتجفانا
أذكر الليل والمركاز والدله
وأذكر العُمر لاعدّا وخلانا
أزرع الحب واهدي لك شذى فله
وأنظر الشوق لك أشر وحيانا
ماتصورت اشيل السيف واسله
لين دار الزمان ولاح هجرانا
ياسحاب الغرام الدرب لي بلّه
بلّ درب الشقاء عجاجه اعمانا
طيفك اتخيله وأقول ذا طله
والحقيقة تقول أقفى ولا جانا
هو صحيح المحبه طبعها عله
ومن غلاتك حبيبي بعدك أشقانا
هيّن الحِمل لك والصعب لي خله
من يثق في زمان ابكى وبكانا
هاج ذاك الغرام وتلني تله
واطلب الله عن الزلات غفرانا
عادة الصقر مايهتم من ظله
والرخم نظرته في ظله احيانا
جاد حظ الليالي بالسهر كله
من عطاها تردى الشوف واردانا
لايطول غيابك خافقي مله
كن ذا الكون مايدرج به انسانا