مدخل //
يابوي جعل الغيث يمطر ويسقيك
يرش قبرك لين يربع جنابه
ما عنك خافي كل ما حل طاريك
يهل دمعي مثل وبل السحابه
.. أنا اليتيم ..
تدري وش اللي يجرح القلب جرحين
ويمد حبل الحزن فيك ويشدّه
انك تناظر طفل من غير ابوين
يمشي ودمعه سايلٍ فوق خدّه
منظر صعيب ويقسم القلب قسمين
لا قام يمسح دمعه بكف يدّه
يمشي ولا يدري طريقه على وين!
لين التعب من كثر ما تاه هدّه
اثقل حروف يشيلها فيه حرفين
لا أب يدري به ولا أم تردّه
في خطوته رحله ودمعه وسكين
وحظٍ توسد بالمراسي مخدّه
جيت اسأله بالله قللي ولد مين؟
وبغى يجاوب واختنق صوت ردّه!
أنا يتيم وما لدربي عناوين
وجزر الحزن فيني يساوي لمدّه
وطعم الطفولة ما عرفته لها لحين
وثوب السعادة صرت ما نيب قدّه
أبكي إلى من شفت غيري سعيدين
لين البكا فيني يوصْل لحدّه
واقفى ورحت امسح دموعي من العين
وعيني تناظر دمعته فوق خدّه
وهذا هو اللي يجرح القلب جرحين
ويمد حبل الحزن غصب ويشدّه
مخرج //
لو طالت الايام ما نيب ناسيك
وشلون ابنسى من عطاني شبابه
كلٍ يغيب ورجعته لك تسليك
الا طريح الموت يبطي غيابه