خذ علومي يالسنافي وحطها مثل العقال
أصغ للي ينحكى لك مانبي هاته ورده
الكرامة عندي ارفع من شخانيب الجبال
وعزة النفس أغلى من ذهب تجار جده
وقلبي لو شفته يساوم أمرغه تحت النعال
لا أبو قلبٍ يساوم بالكرامة لنده
والريال ان زاد سعره وان نقص هو هو ريال
وكل واحد يستره ثوبه الى من صار قده
قدرة الله نافذة وكل الأنفس للزوال
والأجل لا حل وقته ما اعترض له ما يلده
آه من شيٍ بقلبي خالط الدق الجلال
وسبحتك لا جت بيدك الخرز فيها تعده