يابدر انا شف ميقافي ومجلاسي ------ في روضة من سحاب الوسم ممطوره
فيها ام سالم تلاعب كل نسناسي------ في ديرةً يابدر بالعشب مبذوره
والمزن يبني كما ماتبن الاطعاسي------- والعين لمشاهد البراق مسروره
يازين رمي الفراش بجو مشماسي------- في روضةً عن حلال البدو محضوره
مع دلةً بنها يحمس بمحماسي---------- يدور فنجالها ماهي بمقصوره
في وادياً مخضراً خالي من الناسي-------- ودك لياجيت إله تاخذ به الصوره
معك نشاماً تروف بك عن الباسي -------- يضحك حجاجك لوإن النفس معسوره
هذا طراة العمر يابدر ووناسي -------- والنفس يابدر منهيه وماموره
ماهي على الكيف يابدر الزمن قاسي------ والناس في فعلها ماهي بمعذوره
اخير من مجلساً مافيه نوماسي --------- مجلس هلا النمنمه ومتابع العوره
اللي سواليفهم يملن الاكياسي ---------- والفعل مامن فعل لكن مغروره
لاخير فالرفقه اللي مالها ساسي -------- يابدر كتبة قلم في عرض سبوره
اموت يابدر وانا مانحنى راسي --------- مادام لي رايةً بالطيب منشوره
منقولة
رشيد الذيابي