بسم الله الرحمن الرحيم
قصيدة مبارك بن حمود بن بقشه ((رحمه الله ))
في الملك فيصل بن عبد العزيز آل سعود (( طيب الله ثراه ))
عندما زار القصيم
يقول من هـو فـي كلامـه بـادي
يبـدى بذكـر الله علـى مارودهـا
يالله يالمعبـود يالـفـرد الصـمـد
يا عالم نقـص السنيـن وزودهـا
تنصـر قايدنـا الحكيـم الـعـادل
ابن الاكارم مـن مجانـي فهودهـا
فيصـل سعدنـا ساعـد الله نــوه
هو نصرة الدنيـا وهـو عمودهـا
حامي حمى الاسلام والبيت والحـرم
والمملكـة امـن جميـع حدودهـا
من عاصمة بغداد للشـرق لليمـن
المملكـة فـازت وفـاز سعودهـا
انشى المعاهد والمصانـع والعمـل
والطرق مهدهـا وزفلـت نفودهـا
واهل المزارع عانهم فـي شغلهـم
والباديـة حـط المكايـن عدودهـا
والشعـب كلـه فـي نعيـم كامـل
وكل بخيـر ونعمتـه فـي زودهـا
وعبدالله القايـد لقـوات الحـرس
في نهضة الاسـلام قايـد جنودهـا
قايـد هـل التوحيـد لا رد البـراء
يمشون والبـارود مثـل رعودهـا
لاكبـرت القولـة ردوا لـه الخبـر
يضرب مخافيها ويرقـى سنودهـا
وسلطان زيـزوم الدفـاع ومقدمـه
وسلطان حاميهـا لا هتـز عودهـا
قايد دفـاع الجـو والبـر والبحـر
يسود المعـارك لاشتبـك بارودهـا
لاما غدا قـدح اللهب مثـل الذهـب
وحس المدافع مثل قصف رعودهـا
تقدم الجيـش السعـودي بفخرهـا
جيوش فخرها من اوائـل جدودهـا
حنا العرب وابناء العرب مقدم العرب
ومقدسة الاوطـان حنـا جنودهـا
فيصل امام الديـن قايـد نهضتـه
مقدم هل العوجاء حمـاة حدودهـا
خيالـة العوجـاء مـورث مقـرن
نعم الشباب ونعم ماضـي جدودهـا
هل كلمة التوحيد ماهي مـن كفـر
فضل من البادي وخلقـة شهودهـا
يشهد لهم التاريخ بالمجـد والثنـاء
وعبـد العزيـز مصـدق مارودهـا
لعـل عـود جابهـم فـي الجنـة
يسكن منارلهـا ويشـرب برودهـا
في جنة الفـردوس عنـد المنتهـى
في ضل بستـان النعيـم يرودهـا
جيشه يحق الديـن قـوم نصرنـا
سنـة رسـول الله يقـوم حدودهـا
اللي يعـادي الديـن عـاداه اكثـر
ارخـى عليـه السيـف بمحدودهـا
لين استطاع وحكم الشـرع بالعـدل
وجنب حكايا الشرك هي وورودهـا
حق على اهل الدين للسلم والعـرب
في واجب الاسلام تبـذل جهودهـا
حنا هل التوحيـد يامعشـر العـرب
شبانـا تمشـي مماشـي جدودهـا
وحنا هل التوحيد من عصر الجهـل
نفخر بحكـم الله ونفخـر بزودهـا
هذا جوابي والصـلاة علـى النبـي
اعـداد ماهـبـت ذواري نـودهـا