يااغلى الملى ودي أضمك بس ماهي في يدي=اللي يصدن عن دروبك الفضيحة والحيا
أنا لي سنين آتعذب وانت حاديني حدي=على المفارق والتغلي والمجامل والريا
لا يابعد كل الصبايا .. ياغناتي .. يابعدي=لاتجحد اللي عاش عمره وانت شمسه والضيا
تصدق إن قلت إن حبك أنولد مع مولدي=وتصدق إني أخلصت له مثل الرجال الأوفيا
الغالي مثلك لو تغلى أفديه .. وش لي باالردي=عساك فدوة للي أسمه ريم أو شوق أو هيا
بس المصيبة فيك توّك باالمحبة مبتدي=ماتدري إن الحب كوكب من سكن به ماحيا
ماتذكر إني يوم جيتك وانت ياالغصن الندي=تنظر لي نظرة وانا جالس وسط موتر الكيا
ماكني إلا شعب وافي للمليك ومهتدي=وماكنك إلا مجرمٍ حرب أو عصابة مافيا
أسرتني وتامر علي وأنا أجي باالموعدي=أصبحت لك جندي وأنتا قايدٍ للألويا
مير البلاء إنك جهيلٍ باالمحبة ومبعدي=يطري علي أبعاد نجدٍ عن بحيرة طبريا
وإن الغلا من يمكم جافٍ وناشف أسودي=أشبّهه في ربعنا الخالي وصحاري ليبيا
مدري أحاكي الثريا وإلا أشكي للجدي=بإن حبك ورّد قليبي على حدود الغيا
بس المهم لأجلك سلكنا كل دربٍ جرهدي=ولأجلك سكتت .. إلا فعلت اللي فعلوه الأشقيا
كله عشان عيونك الخجله تراني مقتدي=بدربك اللي من مشيته كله حيودٍ و يا
أشهر حبٍ أحتضنته من عادني وسط مهدي=تأكد إنك نبض قلبي ومافيه غيرك أخويا

حسن ترى هالزين أذهل له عقول=وأنا لاشفته قمت أباري جنوني
خصٍ لامن ضمّـت حلاها مع الطول=وردوف تبهر ساطيات العيوني
لاتلوم عقلي لاسرى تالي ليول=اللي بجماله يطربن اللحوني
من شاف حالي والعنى قال يحّول=وجرح الهوى حطّم مفاهيم كوني
قلبي من اسباب الغضي صار معلول=مابين واقع حب وايضا ضنوني
يذكر حياةٍ عاشه بنفد وسهول=ويذكر حياةٍ عاشها باالمزوني
ويذكر غرامٍ عايشه حول مع حول=ويذكر غرامٍ عايشه باالطعوني
متكسفٍ في صفحة العشق مذهول=مهمل وحاله مثل حال البدوني
وانا على رجم الغلا دوم محبول=للي على نحره تفل القروني
ماقدر اقاوم سكرة الحب مع ذول=الفاتنات اللي بحياتي دمروني
اتوه مع ملاخس العين وأقول=عز الله انه قربوا يدفنوني
هذي طبيعة حالتي دوم منقول=بين الحياة وبين لحد الكفوني
واشيب عيني كل ماشفت لي زول=قمت اتذكر هاالغنج والفتوني
فاقد حنان .. وعبرتي تثقل القول ؟=هذي الحقيقة وانت من يفهموني !!

يابو فهد لاتلومنـي لامنّـي شديـت الرحـال=ماعاد لي فـي ديـرةٍ اهـل الحسـد ياطونهـا
قومٍ غثيـثٍ مذهبَـه والحـال مافيهـا مجـال=ابحث خوافي سيّئـة وابـوح عـن مكنونهـا
باطنها خبث ومصلحه ، ظاهرها رزّة ارتجـال=بالعيـن تبـدي حبهـا بـس البلـى بعيونهـا
تعجب بزين اخلاقهـا وتقـول مامثلَـه مثـال=واليا عرفت لشونها ، مبطـي مْخبـور لونهـا
مالي ومال الطامنـه وانـا انتمائـي للطـوال=اشفق على نيل الثقه من قـوم الهـا وزونهـا
ودي رجالٍ صادقـه ماهـو كـلامٍ فـي مقـال=عزاز نفـسٍ ترخـص الغالـي للـي يبونهـا
مثْل الشيوخ اللي تذرّي مثْل ماتـذرّي الجبـال=صميدعيّـه تعـجـز الفـرّيـس لاياتونـهـا
ومثْل الرجال اللي خذت جود وفراسه وطيب فال=رجال موقف كسْبت السمعـه بقـوّ حصونهـا
سيرة بطل / قصة صبر / كتب وآلت للـزوال=ماعـاد إلا قلـةٍ .. امـن البشـر يقرونـهـا
راحت علوم المرجله مع وقت صعبين المنـال=وجاتك علوم المصلحه في وقت مـن يبغونهـا
يابو فهد خذ هالعبـاره واقبلَـه يابـن الحـلال=وان كان ماهي وافيه اشره على اللي يصونهـا
(لو فيه ميزه نايفـه ماياصلَـه كـود الرجـال=بتْشوف ياكثر العرب اللي تْهفي مـن دونهـا)
هذي الرساله وْصلت من غيـر لاقيـلٍ وقـال=وان كان تجهل قصته يكفي تـرى مضمونهـا

ياشوق حبك شي ومقابلـك شـي=وأغلى من الشيئين عندي عيونك
اليا نظرتي دنيتي تنقلـب ضـي=من عقب ماهي مظلمه دوم دونك
بعدك شقاوة وأقترابك لـي الفـي=ودي بعطفك والمصيبـة جنونـك
لاتتركين النكـادة والغثـى بـي=وأنـا أحبـك خايـفٍ يبعدونـك
حبي تجاهك مثل ماتعشقـي مـي=اللي قبل عرفي هي اللي تعونـك
يامن غرامك طاوي الحال بي طي=تلعبّي الذكرى في معمعـة كونـك
كتبت لك من روعة الدلعنـة فـي=أحلى كلام الحب وتسمعه أذونـك
وانا لك الله خطوتـي زي ماهـي=قلبـي لقلبـك حالـفٍ مااخونـك
اشوف موتي في عيونك وانا حي=دخيل ربك ارحمي مـن يصونـك
والحاسدين الكثّر أغلبهـم العـي=الناقصين اللي احسدوني يبونـك
حتى الكلام اللي يجي بسيرتك سي=اعلـم بأنـه قصدهـم يظلمونـك
ملاك بعيوني واليا زادوا شـوي=يكبر غلاك اللي دمرني شجونـك
لا لا تقطعي عن زهر حبنا المـي=أخاف يذبل والسبايـب ظنونـك
وختامها قد قيل آخر دواء الكـي=وأنا دوايا يوم تهطل مزونـك

مريت صدفة وبالي دالهٍ مسرور=على بيوت الحبيـّب ناحل الخصري
أثر الغلا بالمحاني مستحيلِ يبور=اللي يبور الوليفه لاعلنت حصري
على التواصل معاها والجفى والزور=وعلى المواعيد عقب قهْوة العصري
يامنعشة قلبي كِفى لايجيني الجور=ياعل يفداك ابلاد الشامي والمصري
تدرين إني على مواصلْك أنا مجبور=لكن أشوفك كذا بالود تقتصري
متى على الله أجيلك والبخت مبهور=وتقولي أرحب هلا بك نوّر القصري
هاذي أماني ولكن مالفاها النور=أصبح بها الحب أعمى فاقد البصري
ليش التبادل معاكم دايمٍ محظور=أبي خُلاصة غرام الكذب واختصري
قالت أنا كذا طبعي أكشف المستور=وأقفت تضحـّك وترفع راية النصري
وقعدت أواسي واقول لقلبي المكسور=البيض قبلك عذبن محسن وبصري

على قطار أهل المحبة قلت أبزور الحبيب=ودي اجيله واسئله وانا لي مدّه تاركه
هل الغلا اللي نذكره باقي على الوقت الصعيب=من شان أثبت جيّتي وأعاهده وأباركه
وإن كان بعدي عنّهم نسّاه من كان الطبيب=حسبي على دولتهْ أول من بعد جماركه
غروٍ سبا قلبي سنه وأصبحت منّه مستصيب=أدركت مافي خاطري ومثلي بعد هو داركه
والعزة فيني تمنعن تقول مالك به نصيب=والشوق يشكي لهفتي لأجل الحنين يعاركه
ياما حشمت محبته ورافعه عن كل عيب=وياما دفنته باالهدايا كلها أفضل ماركه
وياما رقى في دنيتي واشوفه بعيني لبيب=كنّه ترأس له عرب والخدم قدمه باركه
علـّي أحقق مهجتي واعالج القلب الصويب=ابيه يبقى جانبي حتى باالعمر اشاركه
جيته وأثرْها ليلته ويدّه بيدّين الخطيب=ومن حر ماشفته انا ماتت شعوري الحاركه
أقبلت يمه وانتثر دمعه على خدّه صبيب=قلته واقفيت بحزن (عساه ليله مباركه)

أرجوك يلي تسألن وش بلايا=أبعد تراني من غثى الهم مجروح
أبعد .. أبدفن لي همومٍ خفايا=اللي خطرها هدّد القلب والروح
وإلا أقولك أستمع هاالحكايا=عيشة تعاسة مع تنهّات والنوح
عجزت أقاوم ضيقةٍ في حشايا=تروح وترجع تاخذ أيام وتروح
ماقدر أصدّه لادخلت في حمايا=تقلب حياتي كله أحزان وجروح
تخرّب لي جوي ويتعكّر هوايا=وبأسبابه كبدي من قهرها تبي تفوح
أكره مقابل طيبين السجايا=وأجنّب سمراتٍ بها ضحك ومزوح
تلقاني جالس في هذيك الزوايا=كني صويبٍ بين الاعداء ومطروح
ماغير أتمتم وأتأمل سمايا=إلا وهي عجّ وعواصيف وشحوح
مدري خطأ منهو أو إنه خطايا=اللي جعلني منـّها صرت مذبوح
ياليت جيّتها بفراق الصبايا=إن كان أفتح باب الأسرار وأبوح
بس المصيبة لأمرحت بالحنايا=تصدح بي الضيقة وأنا أجيك مفضوح
أبطلب اللي مايخيّب رجايا=وأبرفع يديني مع الصوت مبحوح
إنه يبعّد عن طريقي شقايا=اللي بجبروته تستسلم له الروح
وأرجع أقول أنا بلاي بحشايا=اللي تجيني تمرح أيام وتروح

سلام الله على بو حزام أقوله وافتخر به حيل=سلامٍ في شموخه يستحقه نسل شهراني
سلامٍ مثل نقوة الفريّس وحصانٍ أصيل=عسفـْه ومايكمّل هيبته ياكود الحصاني
سلامٍ أرفع / أرفع أرفع من نجم الجدي وسهيل=معانق للسماء دايم ولا يقبل للطماني
بعدْها ياعريب الساس اسمع وخل الأقاويل=هرج الصحيح اللي يلطم كل حاسد وفتاني
لأجلك جبرت القاف من قبل ماشرب لي فنيجيل=أخاف إني لو شربته تجي لك فوهـ بركاني
منها يقول الناقص اللي كل حياته ميل بميل=يبالغ بمدحه وانت أكبر من المدح بلساني
بالأصل / نعم بااللابه نعم في ركابة الخيل=شهران لادق الخطر كعام العدو شجعاني
باالخوّة / عضيدٍ ترتكي للثقيلات وتشيل=ياسعد والله منهو تعزوى بإسم شعلاني
باالكرم / فاتح بابك تهلّي وتذبح من الحيل=لامن لفوك رجال من بني عمك وضيفاني
باالشعر / جزل ومحنـّك ولايجي منك الهزيل=لانك دكتوره كذا ترتبك منـّك القيفاني
وعن المكانه لاتحدّث وانت ياراعي الجميل=تعرف مدى قدرك بصدري مايحتاج برهاني
وانا كانه علي اعجز على تنقـّي قول وقيل=لكن تبي شعوري تجاهك ياعالي الشاني
(البدو تستدلّ بنجم لامن سرت تالي ليل=وانا استدل بك لاذكر للجود أسمٍ وعنواني)
هذا واقبل تحياتي وكلامي مايجي تمثيل=وصلاة الله على محمد عدد ماهلت امزاني

ياقلب خلك مصطدم باالغرابيل=توك على زين الحياة وسعدها
وياعين هلي دمعك بتالي الليل=ترى دموع العشق ماحدٍ نقدها
عشقي وجرحي واكتئاب ولاويل=هموم أضفت فوق حالي نكدها
وزودن على هم النكادة بهاذيل=وادهى وامر منها وامر وادهى
البال ضايق ياعساها تساهيل=والحال عيت تلتئم مع جسدها
حسبي علي من غيرتني عن الجيل=الروح ذابت لين ربي قردها
ارقى على راس الجبل واقعد آخيل=عساه تاتي وتلتزم في وعدها
لإنه كما غيمه مطرها هماليل=تضفي على الدار الجريحه سعدها
وإن ماجتن واقبل علي ظلمة الليل=اقول يمكن حظها اللي جحدها
ماقدر اقول انه علي تقسي بحيل=لإنه هوى روحي وهيّ رغدها
ابعد علي من الثريا مع سهيل=واقرب لي من قلب المره لاولدها
اشفق عليها شفقة البدو للسيل=تبغى الربيع بس ماهوب يدها
ديارها ماتت من القحط والويل=وراحت مطاياها وزادت ضهدها
وانا علي اكتب واجاذب مواويل=واسهر لـ طيف الغاليه هي وحدها
رغم اني من صلب الرجال الحلاحيل=ارداهم اللي للطويله صعدها
إلا اني شخصٍ مانفع فيه تحليل=حمّى المحبة ضمّها ماطردها
لاتنتقد ياراعي القال والقيل=عيش الحكايه قبل ماتنتقدها
ولـ طاري هروج العشق ماني امطيل=خذ الحقيقة ياولد واعتمدها
دامي بذرت الحب وهذي محاصيل=الله يعين الروح ويّا جسدها