محاوره مخلف عنيزان وهلال الشمري

الاديب مخلف عنيزان الشمري
يقول
محد كشف علاج السرطان ياهلال
اما كوي ولا الاطراف أقطعوها
،
كشفت علاج الكذب وعلاج الانذال
الي تاريخ جدودهم زيفوها
،
حصنيتن يقعد مقاعيد الابطال
يزوع مر المرجله لزعلوها
،
اعلاجهم كشف الحقايق بالافعال
في ساعةً صم القلوب افحصوها
،
ردي على الاديب مخلف

يامخلف عنيزان مبدع بالامثال
انت القصايد عمها وانت ابوها
،
دايم قوافيك سمينات واجزال
السوق غالي والنشامى شروها
،
واليوم تشكي فاقدن كل الآمال
تقول شفت امراض ما عالجوها
،
امراض جابوها غزت فكر الاجيال
شافوها تصلح لارضنا وازرعوها
،
ونشوف ناس احثال ويقودهم ضال
صورة عظيم اسلامنا شووهوها
،
والمجتمع ماشي على راي جهال
واهل النصايح عالخطا جاملوها
،
شفت المنافق والحرامي ودجال
لو قال كلمه كلهم صدقوها
،
واشوف ناس مشوربه لكن ازوال
واشوف بنت ارجال وقفت لخوها
،
واشوف فاسد ماتحاسب ولازال
واشوف ناس ً صالحه واتهموها
،
واهل الخنادق للوطن دمهم سال
واهل الفنادق باسمهم جيروها
،
واشوف ناسً بسمنا تجمع اموال
وشفت العوايل بالعرا شردوها
،
وناسً بطولاته كذب مامن افعال
ماغير لقطة كامره صوروها
،
وياما على سور الوطن راحو ارجال
واليذكرون اهل المواقف نسوها
،
وياما نشوف من الارامل والاطفال
جوعا.. ومن خير البلد ماعطوها
،
تدري الامانه اشفقت منها الاجبال
والناس خانو ربهم واحملوها

هلال الصلفيج الشمري