عـــشق بــدويه !

قصيدة اعجبتني واحببت انقلها لكم ..

اليكم النص ..





لا تبتعد إقرب و خل العين تروى منك شوف
يكفي ترى بعدك ضما و من دون قربك ما أرتوي

عطشانه لشوفك و من دونك وقف عسر الظروف
حالت و خلت نازح الأبعاد يطويني طوي

عليك سالت دمعة الحسرة و فركت الكفوف
من يوم رحت و كل دقه مع جلاله مستوي

ما جابك إلا جهد من دونك نسى معنى الوقوف
يمشي بطوع اللي لقربك دوم قلبه مهتوي

و يوم إستنرت بشمس قربك عاودت بي للكسوف
أظلم نهاري و الضعيُف دوم في حكم القوي

ويوم إلتقيتك ناف حالي فوق كل الناس نوف
عشق بدويه حالها نشوة سبب عشق بدوي

متميز و لا لك شبيه بالمزايا و الوصوف
ترقى سناد و غيرك بقعر العميقات يهوي

ما يلتقي بك غير من رتب له الحظ الصفوف
و غنا أنا لك يا خويي كنت لك نعم الخوي

و غنا بها له سامرية لحنه ضرب الدفوف
يقول يا ذيب الفلا رديت يوم أنت تعوي

و ردت نجوم الليل صوتك و أنت بالصوت معروف
جيتك أدرج خطوتي و الدرب دونك ملتوي

يا سعد حظ اللي له أطيافك غطت كل الطيوف
كل الطيوف السبع لا طيفك تبين تنزوي

يا نعم حظ قربك و أسعد خفوق بك شغوف
قلب سبب حبك رجف دقات يدوي به دوي

مير البلا إن الوقت أقفى بك و عيا لا يروف
في حال من صدره بدونك عرق خفاقه ذوي

و ما ظنتي حبك لجا و إلا سكن في وسط جوف
كثر الذي جوفي حوي و القلب وسطه محتوي

حقي عليك إسفط عذابي و إجدعه فوق الرفوف
ذكرى لعلك تذكر اللي من صدودك منكوي

وحقك علي إني أكف العين لا يمكن تشوف
غيرك و لا ظني ضماه بشوف غيرك يرتوي