صوت الغضب

صوت الغضب

ضمني الليل وطلب للشعر بيت
قال انا مجروح ابي لجرحي ضماد

وقال سمعني من الشعر اش حكيت
من قديم الشعر وابيات جداد

قلت يا ليل المعاني انا شقيت
لا عرفت الدرب ولا نلت المراد

وش تبي فيني انا والله انتهيت
ما بقى من نار روحي الا الرماد

وليش تسألني هويت او ماهويت
لا افدت العشق ولا مني استفاد

مافي حد يمسح دموعي لا بكيت
ومافي حد يشتاق لي وقت البعاد

دامني لنفسي انا لا ما لقيت
كيف بأ لقى خل يبادلني الوداد

انا تايه لا عرفت ولا دريت
من انا او وين انا بايه بلاد

انا عارف لا زرعت ولارويت
وكيف جاي اطلب نصيبي من الحصاد

اصلا انا لا انزرعت ولا انسقيت
ولا استفاد الطير مني ولا الجراد

انا من يوم على الدنيا وعيت
ادمي في شرب ماي واكل زاد

اما باقي الدنيا منها ما حويت
يمكن الدنيا تحسبني جماد

اشتكت روحي عليها انا اعتديت
واشتكى من حيرتي نبض الفؤاد

كيف بابني بيت وانا ما انبنيت
كيف اصلح نفسي يسكني الفساد

وانت ياللي تسال اش فيك اختفيت
انت ياللي لا بس ثوب السواد

ليش ما داويتني حتى شفيت
والا انصفني على عدل وحياد

ولا شع الفجر ويا ليل استحيت
ارتحلت ولي معك بكره معاد

ماني شاعر لا مدحت ولا هجيت
بس ذا مثل الشريط اللي يعاد

من بقايا انسان حي مستميت
لا نقص عمره يحسب العمر زاد

بس يا حروفي انا منك اكتفيت
اسكتي يا حروف يالله بس عاد



[/color][/font][/size]