لاتازن الرجال لاشفت زوله

بدر الحويفي رحمه الله


لا تازن الرجّـال لا شفـت زولـه
وزن الرجال اعقولها يافتـى الجـود
دلايـل الرجـال فعـلـه وقـولـه
تحكم عليـه بمنطقـه علـم موكـود
ماينفـع الرجـال جسمـه وطولـه
لا صار مايدري عن النقص والـزود
كسب المعالـي مايجـي بالسهولـه
يصعب على اللي مايجامل على الكود
المجـد عشـاق الكسـل ماينـولـه
دربه على اللي يجهل الطيب مسدود
وحفظ الشرف مبدا صفات الرجولـه
والمتزن ماهـو علـى درب منقـود
ومرافـق الجهـال يابـن الحمولـه
نقصٍ على السمعه وتعقيـد وعقـود
كـلٍ جليسـه يقتـدي فـي فعولـه
المعتدل واللي عن الخيـر مصـدود
ومع الأسف بعض العقول معزولـه
ماتقـل بالدنيـا لهـم رب معـبـود
ماخافوا المولى وطاعـوا رسولهـا
للـي لـه العبّـاد خشّـاع وسجـود
ماحسّبـوا يـومٍ حسابـه وهـولـه
يشيب رأس اللـي هكاليـوم مولـود
يطـرق منافيـذ الخوافـق ذهـولـه
يوم الحساب اللي به العبـد موعـود
بأخر نفـس لا نوخـت بـه ذلولـه
التفاهـم بـيـن نـاشـد ومنـشـود
عند الضريح أخـر محطـه نزولـه
النفس تصعد والجسد مرتـع الـدود
يأهل العقول المبصـرات أحسبولـه
ترى الحياة بـلا عمـل مابهـا فـود
اعمل عمل واطلب مـن الله قبولـه
منهج طريق الخير واضح ومحمـود
دامـك نشيـط وكـل شـئٍ تنولـه
ترى السفر له حد والعمـر محـدود