رقيت رجما

السلام عليكم ورحمة الله وبركاته




الشاعر علي بن قعود من القمصة ذهب الى سوريا
قبل اربع سنوات . وقد رحل منها منذ اكثر من اربعين عام,
وعندما شاهد ديار السبعة هناك من وادي المياه الى سلاحيب
الى جبل بربر و قديم والعلقانه ووادي العزيب والحماد السوري
وغيرها فتذكر زمان كانوا به. القصيدة اكثر من كلماتي ستعبر
عن الزمان الذي كانوا فيه. فبينما هو يبني رجم فبكى وقال هذه القصيدة:

رقيت رجما من اطـوال المراقيـب=وشفت الرسوم وشفت دارن خرايب

ولجت ضلوعي بالحشا لجة الذيـب=لجت ولاجـت والتجـت باللزايـب

وقلت السلام ومرحبا والف ترحيب=تحيـة المشتـاق ياصـار غـايـب

وهلت دموع العين مثل المزاريـب=هلت دموع العين من غيـر طايـب

من شوفتي دارن ولوها الاجانيـب=وذكرت ربعا تحت عجز النصايـب

يادار علمي بك قبل يطلـع الشيـب=رحنا شباب وجيتك اليـوم شايـب

علمي بشوفك يـوم كنـا معازيـب=واليوم صرنا ضيوف وعندك غرايب

وين اهلك يادار حصـن المطاليـب=وين اهلك يادار حصـن الطلايـب

راحوا مع الجناب مثـل الذواهيـب=كل ديرتن يذكر بهـا مـن قرايـب

يادار صيحي وشقي عالي الجيـب=صيحي وحطي فوق راسك ترايـب

من عقبنا كثرت عليـك الخواطيـب=اقفوا اهلك يادار ورحتـي نهايـب

صرتي هميلت قيس ونعيم ولهيـب=وصاروا هلك من كل صوب وحايب

مثل الدنوع اللي يخـون المعازيـب=ويفرح ليا صارت عليهـم مصايـب

حنا اهلك يادار مافيـه مـن ريـب=فوق المهار وفوق عوص النجايـب

يادار هـذي مراحنـا والملاعيـب=هـذي مرابـط خيلنـا والركايـب

ياما جيناك من المشاتـي تغاريـب=مثل الجموع اللي تريـد الحرايـب

بين الغراب وبيـن وادي سلاحيـب=اسلافنـا تثـدا ثقيـل السحـايـب

نشتي على حمـدا وخبراالمواهيـب=يامايـزل شبـاط حلـو الهبـايـب

نوب على خرجا ونوب على السيب=بيـن البريـم والولـج والخبايـب

نجيك قـلات علـى شمـخ النيـب=يقودنا راكـان عطـب الضرايـب

ينزل بنا القفر الخلاوي ليـا هيـب=ترعى به العليا علـى كـل طايـب

واليوم صرنا لانهيـب ولاننتهيـب=ياقربنـا مـن لابسـات العصايـب

الله يعز اللـي عطونـا المطاليـب=ال السعـود مطوعيـن الصعايـب

اللي عطونا صافيـات المشاريـب=الله يصلطهـم علـى كـل خايـب

يابعدهـم عـن الرديـات والعيـب=وياقربهـم للطيـب عنـد النوايـب

خلو قطيع الضان يسرح مع الذيـب=وخلو صحاري نجد تنبت عجايـب

بايمانهم يازيـن قضـب المحاديـب=ستر العـذارى ناقضـات الذوايـب

لو شافهم حاتم تعذر عـن الطيـب=ولو شافهم عنتر عـاف الحرايـب

وختامها يالله ياعالم الغيبعفوك وانا يارب للذنب تايب

قيس ونعيم ولهيب : قبائل في سوريا و نسميهم نحن ( الرعيه )
حمدا وخبرا المواهيب وخرجا وادي سلاحيب و وادي الامياه و و والولج و جبل الغراب والبريم والسيب والخبايب اسماء الديار هناك




منقـــــــــــــــــــــــــــــــــــــــول

</b></i>

 

 

 

 

صالح العريف..

رااااائعه وأكثر من رائعه
تسلم يمناك اخوي
تسلم ويسلم ذوقك المميز في الأختيار
لاتحرمنا اخوي من هالقصايد النادره
يعطيك ربي الف عافيه
لك ودي واحترامي..

 

 

 

 

صالح العريف

شاكر لك اهتمامك بهذا الطرح

قصيدة رائعه ابدع الشاعر بصياغتها بما يخالج نفسه

لك تحيتي وتقديري

 

 

 

 

قصيدة رائعة.. واختيار جميل
واقتبست ما راق لي بها

وهلت دموع العين مثل المزاريـب=هلت دموع العين من غيـر طايـب

من شوفتي دارن ولوها الاجانيـب=وذكرت ربعا تحت عجز النصايـب