من اجمل قصائد النصح والحكمة

من اجمل قصائد النصح والحكمه


للشاعر راشد زميع القحطاني:

من زمرة الطاغوت حذراك حذراك***لاتـبتلي بجـروح يصعـب دواهـا
وإلى مشيت اعرف دروبك وممشاك***احرص على نفسـك وخالف هواهـا
أمّارةٍ بالسـوء مـا هـي بتنهـاك***إقبض عليها لــين يجلى صــداها
اقطـع نواياهـا بدينـك وتـقـواك*** هلّـل وعنـد الله سريـعٍ شفـاهـا
والعين لا تنظر بهـا مـن تعـدّاك*** المحصنه لو تلتفـت لـك وراهـا
اصبر على همّك وغمّـك وبلـواك*** عـف وتعفـف لا يغـرّك حلاهـا
واترك حرام القوت ما هو بيمـلاك*** كل البطـون الجايعـه مـا ملاهـا
رشفةحلال اتسد جوعك ومضمـاك*** تسوى مشاريـب الحـرام وغثاهـا
النار في جوفك وتصلـى حنايـاك*** نار الجحيـم تزيـد للـي وطاهـا
واحفظ لسانك لا يجـرك ويبـلاك*** اخذ الثمينـه لـو غلـى مشتراهـا
الهرج ميزانـك ويكشـف خفايـاك*** كلمـة تعيبـك لا تبـيّـن نبـاهـا
صون الكلام وصون نفسك ومبداك*** للنفس حشمـة لا تفصّـم عراهـا
اصمت مدامك عارفٍ سير مجراك*** لا تنقـل النّمـة وتبحـث خفاهـا
يزول قدرك عنـد أقـرب دنايـاك*** لو هو ولد عمّـك حياتـك جفاهـا
واحلم تراه الحلـم يرفـع مزايـاك*** هـو سيّـد الأخـلاق هومبتداهـا
وصّى به المبعوث ما هو بيخفـاك*** شفيعنـا يــوم المـلاقـاة طــه
خل الجهل لاتجعل الغيـظ ياطـاك*** ترى الجهل سم القلـوب وعماهـا
وإلى ابتليت ارفع إلى الله شكـواك*** لا بدّهـا الأيـام تكشـف غطاهـا
اصبر يزين الحظ ويزيـن مرمـاك*** الله يفرجـهـا ويـدفـع بـلاهـا
لا تمنع المحروم لا مـن تنصّـاك*** الناس لأجل الناس وأحسن عطاهـا
ابـذل لوجـه الله والله يـجـزاك*** مثل الغروس اتطيب للـي سقاهـا
لا ضاع معروفك ولا ضاع حسناك*** إن كانـهـا لله تلـقـى جـزاهـا
جارك ولوهو جار تسقيه من مـاك*** عليـه لا ترفـع يدينـك عصاهـا
أحسن جوار الجار لو كان يشنـاك*** ترى العرب تحشم كلاب اقصراهـا
بكـره يشـد ويكتـب الله فرقـاك*** عسـاه يذكـر جيرتـك مانسـاهـا
الظلم شين ويجعـل النـار مثـواك*** راع الظليمـه عيشتـه مـا هناهـا
فوقك إله العـرش عالـم نوايـاك*** ينظر قلوب النـاس وش محتواهـا
يسمع بما تجهر وعـارف خفايـاك*** بأمره شروق الشمس ترسل ضياها
هو عالمٍ غيبـك وركّـب خلايـاك*** هو خالقٍ فيـك العـروق ورواهـا
والضيف له حقٍ إلى حـل بحمـاك*** قلّط ضيـوف الله وأكـرم لحاهـا
لا تحقر الضيفان واتشـح بغـذاك*** من مـا عطـاك الله قلّـط عشاهـا
وعليك باللي حزة الضيـق يفـداك*** لا شانـت الدنيـا ودارت رحاهـا
لا من زهمته لو على الموت لبّـاك*** عيني لجل عينك وروحـي فداهـا
ترى الخوي نبراس روحك وملْجاك*** لا كلّـحت بقـعـا وزادت غثـاهـا
حذراك من بعض المخاليق حذراك*** بعض العرب ما تفرقه من نساهـا
تايه وضايـع بيـن ذولا .. وذولاك*** فيـه الجهالـة واصـلٍ منتهـاهـا