الصيد
أمس العصر شدّيت في موتر عبيد=وهوّ معي راع الوفاء والكرامه
ابي أتقنّص من جديد البواريد=ازنادها فن العقل والفهامه
وشديت أزري محتري زبدة الصيد=اللي ذبحنا من قديمٍ هيامه
مره محاديرٍ ومره مسانيد=نبحث عليهن باالجبل والعدامه
ياما لقينا واحدٍ سيّد السيد=غزال يمشي في هدو واستقامه
قام يتزهّب صاحبي ناوي الكيد=وصاد الغزال اللي يغنّج قوامه
واصبح يجيه الصيد زود إنه يجيد=في قنص شيٍ زاد عندي مقامه
وقلت ابتعد عنّي يانسل الأجاويد=الدور جاني ، قال جتك الزعامه
قلت اعطني مهله ولافيها تمديد=أقل شيٍ لو تجي لي حمامه
هي بس ساعه وانقلب وضع تنكيد=مره تجي قدمي ومره أمامه
اكايز الصياد وارمي ولا اصيد=مدري جهالة عرف وإلا غشامه
والله لولا شمت هرج المناقيد=لأدعسْه باالموتر واحضنه سلامه
وبالآخر صدت وصيدتي كنها العيد=يوم اقتربت وشفته إلا نعامه