يا النوى من ذا الذي جاد بفراق ٍ ما بغيته =جاد في معروف تسهيدة ولا ينشد سواها
انتقصت الود يوم انك على الطيب ارتجيته =و النفوس رحابها النية , و جوهرها بصفاها
جيتك أسرابٍ تواعدني على حلم ٍ نهيته =ما بقى من دفتري الا: لكم خالص وفاها
عاذلك عاف السجايا و كل ما فيها ازدريته =لا غدت مثل المثالب, للأسف منهو ارتضاها
أمس , يا عمري تخايلته حنينك و أرتويته =بالمحاجر صار مرباع الحكايا , و اكتساها
أمس كان الفجر له شارق ضياه و لا غفيته =يسرق أنظار الغمامه لا نثرها في فضاها
وان غفيت الشمس يولجها نعاسك ثم ريته =وارفن يرتج بفصوله ,,, و عينك ما هياها
ألتمس عذر الشفق لما توارى ما سليته =حين جال الليل خفقاته , يحس ولا قواها
بي تلاشى ظلي العابر , هزيل ٍ لو خفيته =انشد عطاش الحنايا , ظني الرعّاد جاها
من جهامه , للرهام اللي تباطا و انتخيته =أسأل الله باذخ "الصرفه" ,, و يتلالا بهاها
تاضي أنفاس "الوكيذب" للهبايب في مبيته =و الطيور حيام للديمة ,, الى قاصي فلاها
ينتشي جود "الوحيمر" أبلجه يامن سريته =و المسا بذهون خّطاره عنان ٍ في مداها
ل "الغفر" في جنح ديجوره اذا مرة طريته =بين ريح ٍ تحشد اشواقي و تتبعها وراها
قل : هلا بالليلة القمرا , وذا همي عنيته =اشتياق النور و الهاجس و اشلائي معاها
قل : هلا بالليلة القمرا , و طارقها طويته =بين طيات الطعون اللي يسامرها لظاها
قل: هلا بالليلة القمرا , و طالعها احتريته =في الليالي البيض يتناثر حديث ٍ من شذاها
يسبق النسمات هوجاسي وبالخافي لقيته =كالصحاري الجرد بضلوعي و يشعلني ظماها
لو نهل من سفحها الاجرد بعد طاري يا ليته =في مساها تغرف الذكرى و داعيها دعاها
خبر اللي داج في همه يا ويش اللي جنيته =حزمة الساري , تباريحه و في صدره جفاها
يمتثل في حضرة ارسومه , حنين ٍ ما نسيته =و الجفون الفاترة , باتت يّعن ابها نداها
يوم دربي اللي تثاقلته , تجاهلته و جيته =الرسوم الداثرة , باحت ذواريها ل ثراها
صرت أشاغب طيفه الغايب إذا حلمي ضويته =شدوا ظعان الطيوف ادري تعذرت بنباها
لو على كل اصطباري قلت والله ما تليته =ولو على هذي الاماني ما أتل اللي تلاها
غاية اللي ما تناساها , لها أمر ٍ نويته =ما تبرر غاية الفرقا سوى شي احتواها
يمكن ان البعد يبكيها وانا يمكن بكيته =باقي التذكار تنهيدة على ردهة دجاها
قم توّلم للشجون اللي لها همي رقيته =لين يستأثر بها حتى يرضّف من عناها
ارتحل في عينك الولهى , ويا شي ٍ خذيته =دوك معنى التيه بأهدابك يبلل سيل ماها
دوك غربة هالزمان اللي شكيته ثم شكيته =الخطاوي توثب ل جرحي , و نالت مبتغاها
بشّره هالجرح , من عمري من الآهة عطيته =النوايب مّرها ذقته,,و لاذت في حماها
وان بغيت بشارتك فيني , ترى لك ما بغيته =السهر عيدانة اغصونك , يا جرحن بي تباها