(((ماهي بشارة للعرب .. طيحة الثور ..!!)))
ماهي بشاره .. لو زعل .. عارف سرور
. شوفة عزيز .. ذل .. بيدين .. كافر
:
:
معذور ابو طارق .. ولا هو .. بمعذور
حنا العرب ... مبطي نعيش .. بتنافر
:
:
مهما بلغ صدام .. من مبلغ الجور
ياناس .. لاتنسون .. للذنب .. غافر
:
:
صدام مسلم .. إيه مسلم .. ومكسور !!!
وجه الفضيحه .. ياهل العرف سافر
:
:
والله .. مايدرى على منهو .. الدور
اللي وقع .. في حفرته .. كان حافر
:
:
أكبر مصيبه .. للعرب طيحة الثور
على الأقل ..ينطح .. ويقدر .. يعافر
:
:
وماهي بشاره .. لو زعل .. عارف سرور
شوفة عزيز .. ذل .. بيدين .. كافر
{ ( .. المواقف .. الرمضانية .. ) }
الموقف الأول
البارحه رحت .. اتقضى من .. السوق
// .. هل رمضان ورحت اجيب المقاضي
لقيت لي واحد .. من الربع مطفوق
// .. اسمه اذا ماني بغلطان .. راضي
سلم علي .. وصار يطلبني .. حقوق
// .. تقول انا مذنب وهالأخ .. قاضي
جلس يسمعني .. من الشعر .. طاروق
// .. وانا ورايه شغل .. مانيب فاضي
يقول هذا البيت : .. ماهو بمسروق :
// .. يانوض قلبي نوض براق ناضي ؟
حاولت اجيه بذوق .. مافاد به .. ذوق
// .. ولا فاد به .. تلميحتي واعتراضي
قلت العفو !! ياخوك انا الحين مزنوق
// .. والشعر كله .. صارلي فعل ماضي
صدري على وجه الشهر صار به ضوق
.. // .. رغم ان خلقي .. كان جدا رياضي
الا انه اجبرني .. اخلي له .. السوق
// .. جانا رمضان ولا شريت المقاضي
الموقف الثاني :
كم لي شهر.. ماشفت .. حامد .. وفرحان
// .. ربع .. لياغاب الخوي .. يفقدونه
رغم انهم .. ماهم .. بعيدين .. جيران
// .. حامد ورى المسجد .. وفرحان دونه
إلا ان هالدنيا .. خذت .. عقل الانسان
. // .. ونابت أذانه .. عن مهمة عيونه
أصبح فلان .. اليوم .. يسمع عن فلان
// .. وكل سعى في هالحياة .. بشؤونه
دنيا المشاغل .. فرقت .. بين الاخوان
// .. يموت ابوهم .. والعزى .. مايجونه
رحماك .. ياربي ونسألك .. الاحسان
// .. نطلبك .. عن هول الزمان .. المعونه
اليوم ( صدفه ) شفت حامد .. وفرحان
// .. بالمسجد .. اللي توهم .. يدخلونه
قبل رمضان .. تشوف به خمس شيبان
// .. واليوم كل الحي .. صاروا يجونه
الموقف الثالث :
قبل الفطور بربع ساعه اتخبرون
// .. كل .. ببيته .. للفطور .. يتولم
وانا تورطت بهديفه ,, ومجنون
// .. تصادموا .. والكل قام .. يتظلم
هذا يقول أنت آعمى مالك عيون
// .. وهذاك .. من هول الفجيعه تبلم
قدام بيتي .. قلت يالربع تدرون
// .. تفضلوا بعد الفطور .. نتكلم
عيا الهديفه قلت له : طيب شلون
// .. نبقى هنا ؟؟ قال ايه ، قلت اتحلم
لو ننتظر لين الحكومة يمرون
// .. كد للإمام من التراويح .. سلم
قلت اسمعوا .. وش رايكم لو تطسون
// .. مدري متى .. شعب الخليج يتعلم
الموقف الرابع
محد بهالعالم من الذنب معصوم
// .. نسألك .. يارب العباد .. السلامه
بعض البشر بوزه على الصبح ملموم
// .. نفسه بخشمه .. لا اقعدوه .. لدوامه
تلقى فرامل خلقه الصبح معدوم
.. // .. وعاجز لسانه .. لا يربط .. حزامه
وبعض البشر لا نام ماوده يقوم
// .. يقضي عبادات .. الصيام بمنامه ..!!
يجمع صلاته يوم يقعد من النوم
// .. ويطلب لقا ربه .. بيوم القيامه ..!!
لاصار صومه نوم .. وشوله يصوم
. // .. ربه .. ترى ماهو .. بحاجة صيامه
وبعض البشر عن ماذكرناه محشوم
// .. يتعب على صوم رمضان .. وقيامه
الموقف الخامس
السالفه .. ماهي بحاجة .. لتصعيد
// .. موقفك .. جاهز .. منتهي .. ما يبيله
لاتجيب فينا العيد .. بدري على العيد
. // .. .. قدامنا .. سته وعشرين .... ليله ..!!
ياصاحبي سرعتك كل مالها .. اتزيد
// .. خفف .. ترى كل .. تحراه .. عيله
كانك تدور صيد .. ماعاد به صيد ..!!
// .. فرطت .. في شهر فضيل .. بفضيله ..!!
من قالك ؟؟ تسهر .. وتعطي .. مواعيد ؟؟
// .. حتى لو انك .. مانت راعي .. طويله
والله لو بيدنا .. عطيناك .. تم ديد ..
// .. لكنه .. اذن .. مالنا فيه .. حي له
بس ه د .. تكفى .. لا تحضر بنا العيد
// .. .. قدامنا .. سته وعشرين .... ليله .. !!
الموقف السادس
...................
الموقف السابع :
الموقف .. السابع .. عن انسان مسكين
// .. ربى يتيم .. وكان .. رابع خواته
أبوه مات .. وماترك .. لامهم .. شين ..!!
// .. ماغير .. رحمة ربهم .. في وصاته
عاشوا على .. شغل امهم .. بالفساتين
// .. وياحسين ود الثوب .. ياحسين هاته
باول حياته .. جرب الشين .. والشين ..!!
// .. هو فيه .. زين يجربه .. في حياته !!
ان راح يلعب .. عيروه الوراعين ..!!
// .. واذا .. رجع للبيت .. مو .. من .. حلاته
يسمع كلام امه .. عن الفقر والدين ..!!
// .. ويضيق فيه الكون .. باربع .. جهاته
يعني بنت مستقبله .. دمعة .. العين ...!!
// .. ماعاد .. تفرق .. عن حياته .. مماته .. !!
كبر .. وصار .. اكبر حرامي .. دكاكين ..!!
// .. يسمع .. بفقر الذيب .. والا .. غناته ....!!
لين اكفشوه .. وصارله .. أربع سنين .....!!
// .. يدعي ... لرب البيت .. بآخر .. صلاته :
يارب .. تشملني .. (( بعفو .. المساجين .. .. ))
.. وتفرج عن اللي .. يرتجنه .. خواته ..!!
الموقف الثامن :
في ليلة الثامن .. بدينا بالاهمال .......
// .. وصار الشهر .. عند الكثيرين عادي
مدري !! بدينا ننتظر شهر شوال ......!!
// .. والا شهر شوال بالفعل بادي .. ؟؟
يعني بدال نصير نخلص بالاعمال ........!!
.. نزداد عن رب العباد .. ابتعادي ..؟؟
عن التراويح .. نتعذر .. بالاشغال .......!!
// .. واشغالنا مابين ... سوق ونوادي
غزل .. اتمشي .. مشترى .. كذب .. تفصال
. // .. حراء طبعا غير .. سوق البوادي
غزل .. ( على ودنه ) .. وترقيم .. واهبال
// .. ومحاضرة .. للشيخ .. جوهر .. عبادي
استغفر الله .. وأسأله .. يرحم الحال
// .. صرنا بوادي .. والعباده .. بوادي ..!!
الموقف التاسع :
دايم .. الياقالوا : (( شباب .. وعلى الدين )) ..!!
// .. أسكت .. على بالي .. فهمت العباره ..!!
أدري بها .. زينه .. !! .. ومفهومها .. زين .....!!
// .. واكيد .. واضح .. مايبيله .. شطاره .. !!
( واحد رقم )..( زايد ) .. ( رقم واحد ).... ( اثنين )
// .. لكن .. مهو كل .. الكلام .. استعاره .. !!
يعني .. مثل : لا قلت لك .../ ... صل .. هالحين ..!!
// .. هي نفسها .. لا قلت : .. ولع زقاره .. ؟؟
وش دخل .. اهل الدين .. ب ( محمد .............. )
// .. اللي .. فقع .. في .. كبد ابوه .. المراره !!
عزب هتيم .. ( ........................................ )
// .. لا دك .. في غزوه .. ولا فك .. غاره ...!!
مافيه شي .. اسمه / .. شباب .. على .. الدين ..!!
// .. إلا .. شباب .. يستحق .. .. العباره ..!!
شفهم .. !! .. الي ذ ن .. ينقلون .. الكراتين
// .. ويفطرون .. الناس .. عند .. الإشاره ..!!
الموقف العاشر :
ثلث .. الشهر .. عدى .. وعدت .. لياليه
// .. مسكين .. يامن في معاصيه .. لاهي
كل م الشهر .. ينقص .. يزيدن .. معاصيه
.. ويزداد .. مع زود المعاصي .. تباهي
من لا هداه الله .. وسمح .. خطاويه ....!!
// .. مايردعه .. عن منكر الفعل .. ناهي
ليل الشهر .. بين البرامج .. يقضيه ...!!
// .. متحطم .. ( بهيفا ) .. ومعجب ( بزاهي )
محتار .. مايدري وش اللي .. ينقيه ..!!
// .. مثل .. اليتيم .. اليادخل .. بالملاهي
من مهزلة طاش .. لسخافة .. دق د يه
// .. لقريقعان .. وغانيات .. المقاهي ...!!
صارت .. تردد بينهم .. كلمة أ و مبيه
// .. يالله تحفظ .. عقولنا .. مثل ماهي ..!!
كن الشهر .. موسم .. برامج .. وترفيه ..!!
// .. من فاهية وجه .. إلى وجه .. فاهي
ويالله .. تثبتنا .. فباقي .. // .. لياليه ..!!
// .. وتذكر اللي .. عن عبادتك .. ساهي
الموقف 11 :
ايوالله .. اذكر طلته .. ياحليله ..!!
// .. كان الشهر .. مع طلته .. متخاوي
يطلع على وقت اجتماع العيله ..!!
// .. يروي لنا .. والله .... ونعم الراوي ..!!
لا من طلع برنامجه .. نصغيله ..!!
// .. شيخ عن امراض القلوب يداوي !!
اذكر بنان الياحكى ,, تطريله ..!!
// .. واذكر .. بعد في وقتها .. شي ساوي
ينسى .. يحسب غتيرته .. منديله ..!!
// .. يمسح بها دمع العيون .. الهاوي
اذكر .. كثير .. وجيتكم .. داعيله ..!!
الله يرحم .. شيخنا .. الطنطاوي .. !!
الموقف 12 :
خلو ملاك تصلي .. لا تحرموها الجنه ..!!
ياويلكم .. من ربي .. ياهل الحسد .. خلوها ..
حتى الصلاة لربي .. صارت بعد .. بالمنه
// .. مو زين يطلع منها ؟؟ .. بعض العرب نسيوها
تحجبت .. من بدري .. تبي مع اهل السنه
// .. تلحق صلاة المسجد .. واخوانها .. ردوها
وهي عادة .. لا قالت : تنه .. ف يعني .. تنه
// .. لامن .. بغتهم .. شغله .. تسابقوا .. جابوها
البارحه .. مانامت .. وبعذرها .. منجنه ......!!
// .. عيو عليها تصلي .. جت تشتكي .. ل بوها
يبه .. يبه .. !!
وش علمك ..؟؟
يبا .. احسدوني .. الجنه ..
.. منهم .. ؟؟ هذولا شفهم .. وجع .. وجع .. خلوها
ودو ملاك المسجد .. لا تحرموها منه ..!!
ياويلكم .. من ربي .. ياهل الحسد .. ودوها ..
الموقف 13 :
ماكنت ابكشف عن خفا عارف سرور
لكن هو اللي .. قام .. يبحث خفايه
يعني على كشف الورق صرت مجبور
وهذا جزى اللي .. .. لف ذيله معايه
على الفطور البارحه .. جاني .. الدور
وبلغت ابو طارق .. وكل .. خويايه
سلطان يشهد .. ماحصل مني قصور
والحر .. كزه .. مايبيله .. وصايه
انا اشهد انه ماهو بشاهد زور
افطر معاي .. وشاف كل .. الحكايه ..!!
ماحد حظر غيره .. وسلطان مخبور
.. اما يجي .. أو يعتذر .. بالبدايه .. !!
بس البلا اللي .. داخل البيت .. محصور
ان مسمحت له .. عاد ماهو خطايه
الموقف 14 :
الناس .. من تصبح .. يقولون .. يارب ..
. // .. يارب .. تصلح حالنا .. واتهدينا
وانا اصطبحت ولا طرالي .. أبد .. سب
// .. الين شفت اليوم .. بنت اللذينا
قدام خلق الله تشرب .. ( سفن أب ) ..!!
// .. يدري بها الله .. عاد .. لو مادرينا
ما حقها تشتيم .. ذي حقها .. د ب
// .. حرام .. هالأشكال .. منا .. وفينا
هذي هي .. اللي بالشهر مالها .. طب
.. يالله .. انا طالبك .. لا تبتلينا