صدفه بلا ميعاد لا تسئل أش صار = صدفه رمتني بالرهيف الشطيري
أعجز عن المضمون في جوي أعصار = والجو معتم والهبايب تديري
صدفه تصادفنا على باب عطار = يا ابو حمد يلقرم شياً مثيري
والله يا رواف كن زارني زار = رجلي تبي الممشى وأزريت أسيري
تل الخفوق وثار بركان الأفكار = وفاضت حمم بركانها من ضميري
أصبر وصابر لين بيحت الأ سرار = وثعبان صبري صار سمه خطيري
صندوق صدري كنه وجار للنار = جمره تلظا كن يصلاه كيري
صابر ولا أدري وين ودته الأقدار = أسامر أحزاني ونومي حسيري
أظن تالي الصبر يوديني أشهار = محدد الرجلين فوق السريري
ماني بعالم غيب أو عالم أسرار = الغيب يعلم به ربٍ قديري
لكن مواري حالتي تخبر أخبار = مشيت عكس السير مخالف مسيري
|