قالوا تتوب وقلت بالطرف مصيوب,,والله ماتوب وصافي الخد ماتاب
قالوا تحملت المواثيم وذنـــــــــوب,,قلت الذنوب الها موازين وحساب
قالوا ترى مايفعل العبد مكتــــوب,,قلت أفهم اللي تذكرونه يالأصحاب
قالوا جهلت وعقلك اليوم منهــوب,,وكشفت سرك بين ربعك والأجناب
قلت الهوا لقلوب الأحباب مرغوب,,آيات حب صورت وسط الألبــاب
قالوابعقلك ضايع الفكرمنكــــــوب,,قلت المودة ماتداويها اللأطبـــــاب
عقلي معي ماني من العقل مسلوب,,انا الغريق وكل شئ لـه أسبــــاب
كان انكم تدرون باللي شفى أيـــوب,,وجدن سطا بالقلب والحب غــلاب
أنا غريق مع هـل الحــــب منسوب,,في زمـرة العشاق بالحب منصاب
ماطف لي زاد ولاريــد مشــروب,,الياصفالي صاحبي عسل الأنيـاب
يغضي بعيــنه وافهـم العلم مقـــلـوب,,واسري عليه بليلة نورها غـــاب
يرخص لي الغالي لياحل ماجــــوب,,وعن القرايب حـط لي ستروحجاب
وابعدعن الشــــكة ولانــوش له ثوب,,الاالحديث وقـرعة الناب بالنـــاب
أخاف يصبح زين الأوصاف معيوب,,وهوعليه من الشرف كــل جلباب
عرضه نظيف ابيض ولافيه عذروب,,ولا حكـوا فيه البعيدين واقــراب
عليه وجـدي فايق( ن) وجـد يعقوب,,وقلبي من اسبابه بوسط الحشا ذاب
يلــومني من لاشكى حـب نـبنوب ,,طـفل قــرونــه ماتغطيــه الأسـلاب
طفل نهب عقلي بضحكات وعجوب,,فتــان لقـلوب العشاشيق نهـــــاب
اصبح هو الغالب وانا فيه مغلـــوب,,غــــدا بعقلي بين شاري وجــلاب
ان كان شفته صفق القلب مرعوب,,بالصدر كــنه بين لاوي وجـــذاب
والدمع من فوق النظيرين مسكوب,,يخضر ديار ممحلة عقب الاجداب
(محمد بن احمد السديري)