وهذه القصيدة الثالثة التي تسمى ( الشيخة)
للشاعر محمد بن حسين الدسم في الحكمة والموعظة من تجارب الحياة وهذه القصيدة الشاعر يوصي أخيه أبو زعزوع فيقول :

يا أخوي لك عندي وصاة مصيبـه
ترى وصاتي تلمس العقل وتصيب
ترى وصاة أخـوك مابـه معيبـه
ما دام أخوك مكمل العقل وامنيـب
لا بد أموت ولا ذرى تتقـي بـه
وأخشى توازى للدروب الضنابيب
سمـر الليالـي مـا تعلـم بغيبـه
ولا يعلم الا صاحب العلم بالغيـب
ودي تحّرص عن بلا كـل ويبـه
ويصير بك عرف وكمال وتأديـب
ولا المقدر صار مـا ينحكـي بـه
ما ينمحي هذا مـن الله مكاتيـب
أول وصاتي بالفـروض الوجيبـه
صوم وصلاة وأد كـل المواجيـب
وثاني وصاتي للأمـور الصعيبـه
أصبر وبأمر الله تهون المصاعيب
جرح عبي له مـا يكلـف طبيبـه
ولا فيه شي الا مضالـه تجاريـب
وثالث وصاتي تلعـةٍ ينعـدي بـه
تلقـى عليهـا بينـات المساريـب
واللي عدابه ذيب من بطن ذيبـه
ولا واحدٍ عدابها غير هـو ذيـب
ترى هذاك العرف من غير ريبـه
راعيه ما يطلب ولا لـه مطاليـب
ورابع وصاتي كثرة الهرج خيبـه
هرج بلا معناه مسموج وايخيـب
لا صار ما عندك علـوم غريبـه
وسط الرجال ترتب الهرج ترتيـب
وخامس وصاتي خفة الرجل عيبه
من كثر الدوجات يركض له العيب
أن كان ما عنـدك لـوازم تجيبـه
تنحر لزومك كان ما جاك واتجيب
وسادس وصاتي لك معزه وهيبـه
عليك بسفن البر حرش العراقيـب
ولا يعجبك زبد الغنـم والرويبـه
ترغب لحوش الضأن وتخلي النيب
راعي الغنم يشيب من قبل شيبـه
والبل معزة تجلي الهـم والشيـب
إلى اشلهب الوقت لو هـو حليبـه
يوصلك لديار الهنـا والتعاجيـب
وسابع وصاتي كان صابتك سيبـه
وتقدر على كثر الثمن والمطاليـب
بنت الحمولة والأصيـل العريبـه
اللي اقتناهن نال لـذة وترغيـب
واللي اقتنا بنت الـردي والهليبـه
أصبح بهم وجنب الربـح تجنيـب
والعوز يرث لـك مذلـه وريبـه
أردى الرجال اللي يسمونه السيب
عليك بالسقمة ولـو هـي تعيبـه
ما دام بك حيـل تنـط المراقيـب
ترى كثيـر المـال كلـن حبيبـه
ينقال له فت جاي لو ما فعل طيب
ومن قل ماله صار شنٍ أروي بـه
لو كان طيّب يكثرن به شواذيـب
وثامن وصاتي علمها ينحري بـه
ترى الدروب الفاسدة فعلها ريـب
درب الدنس والعايـزة والقريبـه
ترى هذيلن من كبـار العذاريـب
ثنتين من داخى عليهن احكي بـه
والعلم يضهر من أذان الأعاريـب
مداخي على عرضه مثل شق جيبه
ومداخي على وجهه تعيبه معاييب
وتاسع وصاتي عن مناقر شريبـه
لا صار ماهو من وساع المساريب
خلـه ويلقـا بالمـوارد لعيـبـه
عند الموارد يكثـرون اللواعيـب
ومن دوّر العيلات غربل نصيبـه
حسب حسابه من حساب المذاهيب
ومن ترك الشيطان حقه غدي بـه
ومن هاب طبات الملاعيب ما هيب
عن واحدٍ يبـلاك أو تبتلـي بـه
حديكـم يناحـر ديـار الأجانيـب
وعاشر وصاتي كان حلت مصيبـه
وبلاك ربك وابتلـوك المغاضيـب
أحذر تمضي مـا تسمـى غليبـه
أمض وتبيّن عن لحاق المشاعيب
أزبن على حصن الرجال الصليبـه
اللي يحلـون العقـود المناشيـب
اللي زبنهم ما يجـي لـه طليبـه
عده بعيطا عن سمـوم اللواهيـب
وعندي وصايـا للعقـول اللبيبـه
للي يضمه بالضلـوع المحاديـب
الضيف ضيف الله وصابه حبيبـه
أستقبل ضيفك في تهلي وترحيـب
قلط له الميسور وما هـان جيبـه
وأحلف عن المذخور دين المعازيب
وخويك اللي بالخـلا تبتلـي بـه
خيال ولا فوق عـوج المصاليـب
أو من مشى رجلي ولا له نجيبـه
أو عورة يبلا بهـا عالـم الغيـب
أصبر وراعي الصبر مشكور طيبه
عند اللي يدور الفخر والمراتيـب
وقصيرك اللي ما يصيبك يصيبـه
وصابه الله له كرامـه وتوجيـب
والعبد لا بد ما كتب لـه يصيبـه
واللي تجنب تايح الرمي ما صيب
الشيـوخ والحكـام زمـل منيبـه
بهم عمار وقضي لازم وتخريـب
ما ينومن من شان منهـم حليبـه
عقب الصداقه ينقلب كنه الشيـب
أهل خفايا وغيبهم مـا دري بـه
يتحدرجون بدون عيـب وتذنيـب
عشرانهم أهـل العلـوم العجيبـه
وصدقانهم مروين حـد المغاليـب
وأن كان ما حدا الثلاثـة تجيبـه
مالك بهم والدرب شرق وتغاريـب
خويهم ما يشتهـي نفـض جيبـه
حكاي وجهيـن يقـص العراقيـب
هـذي يوديهـا وهـذي يجيـبـه
وهذي يسويها بين صدق وتكذيب
واللي حكى بين الصحيب وصحيبه
مخرب ويخرب بين ناس اصاحيب
سوالفـه دايـم نميمـه وغيـبـه
ولا يستحي كوبان من كلمة العيب
راعي النقيلـي لا تـوارد قليبـه
خل الردي ما فاد قربه ولا ايثيـب
حذراك لا تنزل جوانـب شعيبـه
وبالك تحطه ياأبو زعزوع بالجيب