يا أمنية محروم توأد أمانيه=قبل العقل جيت وسبقني هبالي
ليل وجموح طموح عتمه مساريه=تضوي دياجيره على بيض فالي
حلمٍ عميق من الطفوله مباديه=ولسّاه مستوطن مساحة خيالي
جسمي مع الحاضر وروحي بماضيه=ومستقبله مجهول .. والراس عالي
الوقت يصمل بي وأنا صاملٍ فيه=إن شان ولا زان ماني مبالي
رغم الألم .. والياس .. والخوف .. والتيه=ما غيّرت مبداي سود الليالي
النفس ماهينه ولا راسي أحنيه=وان هنتها ياحيف نكسة عقالي
يعيّن بي الثنتين لاجيت أوطيه=طنخات جداني .. وطنية خوالي
شعري نهر طيشٍ وعذبه سواقيه=حدوده الجهرى وريحه شمالي
الصعلكه عيّت اتفارق معانيه=إتلازم لمبناه مثل الظلالي
تمرّد حروفه هي اللي تحليه=ما استعبدت لإعلام ولاّ ريالي
ماصرت به نخّاس ليعون قاريه=وش عاد لو ما كنت شاعر مثالي
بعيونهم .. لو قالوا ابليس مغويه= قلت أمرحوا : والناس ماله ومالي ؟.
بس المهم اللي من الناس هاويه=غصبٍ على أبو جد أهله صفالي

تعدّي مثل غيره ولا له معي تأثير=مواقف .. ونفسي عن هواها مصابرها
ليا صار مابه بصرة ولا بقى تبصير=وش اللي يقعدني وأنا الطرق سابرها ؟
أبي أعتبر نفسي مسافر يجد السير=خرابه وأنا مرار بالدرب عابرها
ولا لي بها منزال والشمس شمس عصير=تلاعيبها الغربان والفار شابرها
أعد الحقيقة ماعلي من هل التزوير=بخيصٍ بحاضرها ولا أجهل لغابرها
بعض ناس حولي مار ماله معي تقدير=وناسٍ أقدرها وهي في مقابرها
وناسٍ أعاملها كما معامل الخنزير=نجاسه... وناسٍ طيبها من أكابرها
وناسٍ قبل منطوقها تمعن التفكير=وناسٍ على الصفعه تلقّف صوابرها
أبشري لبالي راحته دامها تخيير=ونفسي على الرزلين مالله جابرها
ليا ضاقت دروبي يجيب الله التيسير=فلا ضيق لو ضاقت بوجهي معابرها
ولا كل مسجد لو يأذن بذانه خير=مساجد ضرارٍ لو تنادي منابرها
على كل حال المسألة ماتبي تفسير=طيور الرخم ما تنجني وانت خابرها
حثل والحثاله كيف أببديله التوقير=خلايق ثبرها الله وإبليس ثابرها
وجيهٍ كليحه ما يجي من واراها خير=من أول وهي بالطيب مقطوع دابرها
تدور على اللي حوله السو والتشهير=ويبسانه اشدوقه وجفت محابرها

مسفر الكثيري نقل موفق واختيار طيب
شكرآ لك