جيت عاني و آتوسّل ثرثرة قيفاني=من مشاعر ذايبه في روحي المبريه
كل مااعنّز عليها ترتجف من شاني=تكفى تكفى لاتقدّ القلب بالشبريه
يعني ماتذكر وش اللي سوته يالعاني؟=يوم روحك في حطبها كسرة الجمريه
قلت فيني صرخةٍ تطشّرت باركاني=ساعديني ماخبرتك قاسيه صخريه
أدري أنه من غلاته في دجاي ابكاني=وادري انه من غرسني قامةٍ شعريه
مهرةٍ تبكي عليها مقلتين حصاني=لافقدها به تلاعب ثورة الجنيه
برمش عينه ابصم انه قانصي فتاني=وفي خدوده لعن ابوها فيضةٍ محميه
خدها ديباج كنّه نرجسٍ لبناني=بالنعومه واختلاط الحمره الورديه
بجمرتيها توت الاول والكرز بالثاني=وموطن الدراق فيها يستفزّ النيه
لاتغنّج في حروفه له يذوب لساني=ويتحرفن في فنون الجمله السحريه
جادلٍ لا جت تخطّا رجّحت ميزاني=بالغلا والود والتدليع والحنيه
وقذلةٍ على الجبين اللؤلؤ المرجاني=كنها خيوط الظلام بـــ,,(إبرة) الفجريه
اكتشف لاجت تغندر طقطقة سيقاني=ترتجف منها الفرايص مع زنود يديه
والفراش اللي بحرفه يستثير اغصاني=وفي رحيق اذني يبث النشوة الخمريه
ويوم ثارت هالقريحه وانثنت من شاني=اختلفت من الذهول وفتنة الحوريه

الوحشه اللي خيّمت في خيالي=دقّت بقلبي ألف هاجس وولوال
واحشني اللي مستفزّن هْبالي=واكبر قهر مقفي وهويعرف الحال
ادلّله كنّه شريدة عيالي=والبّسه من قافي ألفين خلخال
أغليه لو هو ماشرب من دلالي=واعزف على قانون دنياه موال
يكفيه إنّه مستثيرٍ سؤالي=ويكفيني أني اعشقه موت بهبال
هو رفّتي مع ربعتي مع خلالي=وهو واسط البيت المثولث ولا زال
زلزال بعده طامعٍ في جبالي=ياما بها خيّم وفي صخرها صال
عن ثدي حبه عاجزٍ عن فصالي=يبطي ولا يقدر يبعّدني أميال
غالي ورغم البعد سيد الغوالي=عندي ولا به شك ذره ومثقال
ودام انه اصبح من مزاين حلالي=وليّه عليه أربع جمالات وافضال
أشره عليه يْصير صدره شمالي =وينحت خيالي بين الاضلاع تمثال
وابسط حقوقي يستميت بدلالي=ويزرعني بعينه مساحات واغلال
لأني بنجم السما والعلالي=رفعته برغم الحواجر والاهوال
وأدري يموت بلحظةٍ من وصالي=بس القهر يقفي وهو يعرف الحال

الوايلي لا من برك لحموله=يشيلها لو هي( جبل ) معلوله
خلف ولد مشعان يوم اشعلها= أحرق بها أول فتيل الجوله
نار الشهامه ولعت بالراحه=والشاطي امحل وانتهى مفعوله
عشق التحدي والثقه والفكره= جيشه وشلفاه وصهيل خيوله
شاعر تراقص مفردات ابياته=من غمدها فكره بكر مسلوله
يذرّ عطر الحرف في مسمعنا=والذائقه من نخوته مبلوله
رجلٍ سرا حب عنزه في دمه=وحب القبايل والوطن والدوله
وريث ابن كلثوم أخذ من جده= شجاعته شعره مهابة زوله
لا من سلك له واديٍ وابحر به=الجن الازرق مايقرب حوله
لا من تعزوت (نوت) هو فارسها=ولعيونها اشناب الشعر مفتوله
وياللي نويت انك تدش اللعبه= احذر ترا كل الطرق مقفوله
هذا الشمالي به تعيش الهقوه=ومن هيبته روس العرب مذهوله
(علياي) جت لك زغردت لحضورك=ورويل تاقف وقفةٍ مـأموله
والنعم في كل العرب والأمه=والنعره بحجري ربت مقتوله
لكن شعر هالوايلي يطربني=وينوّخ بجوفي رحيق حموله
طموحه أكبر من حيازة بيرق= مبطي خذاه بطيبته وفعوله

مدري اضحك وإلا أبكي=لاجيت اتذكر أو أحكي
واذكر أول يوم العالم =مابه شكوى وما احدٍ يشكي
كنا مانعرفها الضيقة=نهار وليل بترويقه
مامن تفكيرٍ يشغلنا =واللي يعطش يشرب ريقه
كان الأستاذ ينبهنا=بالحيوانات يشبهنا
وفوق الألفاظ اللي قيلت=بالعصا كان يشرهنا
ولا جيت الظهر( أقرط )كتبي= وأمي دايم تجلس قربي
واحل الواجب واجاوب=حتى لو هو حل سلبي
ثم اتسلح بالنبيطة=واسوي بالحارة زيطه
اضرب هذا واكسر هذا=ومن ( الحيزي ) آخذ حيطه
للبيت ارجع قبل المغرب= وبوتي لترابه متشرب
من شقٍ فيه مضايقني=يلسعني هالبرد ويضرب
كنت ابطل أبطال الحارة= وكنت القايد وسط الغاره
ولما الدورية تلحقنا=كلٍ يزبن بيت الجاره
مع إنّ الفقر مرافقني= خلٍ وفي مصادقني
توأم رابي معي بحجري=ومن زود الحب ينافقني
أما اليوم احلف وبربي=إن الهم اندس بشربي
وانقبرت جملة أحلامي=واكثر هالناس اصبح صربي
كبرنا وكبرت ربكتنا= وزالت من فمنا ضحكتنا
وزادت وساوس سوستنا=كادت دنيانا ودكتنا
هم ديون وهم ادارة= واوهام الدنيا الدواره
أطلب ربي صبح وممسا=يبعد هالجثة عن ناره

وينك غرقت بمحاجر عاصفة وحلي=اللي بها انتي تركتيني مع اشجاني
سراب حبك لمع في خارطة فصلي=وبازوكة الهجر هزّت قوة أركاني
مقدر أقاوم سريّة طرفك الكحلي=ياما سبت عقلي وفكري وشرياني
حبك فراتي ومن نبعه صفو نهلي=وبعدك ظماي وجفافٍ شطّب ازماني
للي يبيني حنونٍ ياسهل سهلي=بيديه قلبي واحاسيسي وسكاني
يجيه شهدي مصفّى من بطن نحلي=يشرب من اللي يبي من صافي ألواني
أغليه واتفنّن بحبه علي مهلي= والبّسه من قصيدي ماس تيجاني
واسلّه سيوف شعرٍ من صدر نصلي=واشنشله بالدلع من حرف مرجاني
بالحلم اشوفك ورودٍ بيض تضحك لي=والواقع المُرّ شيّبني وبكّاني
ابعترف للملا عن سالفة نطلي= ووشلون قلبك تنفس نشوة ادماني
إما يلوح الأمل في بارقة وصلي=وإلاّ احترق كل ابوي بنار بركاني
وينك غرقت بزوابع عاصفة وحلي=وانتي فضاي ورخاي وقيد سجاني

ثار بركان الغلا بالقلب يوم انه شهدها =مهرةٍ يوم نظرتني ابتدت معها القضيه
يوم مرتني وراحت انتشيت بعطر يدها =بس نظره !! صوبتني بالعيون النرجسيه
الحلا منها تنثر والطهاره في جسدها=والله اني من سواد عيونها شفت المنيه
الشعر كنه ظلامٍ لّس الظلمه لهدها= فوق برقٍ لاتجلى يجهر العشاق ضيه
والشفايف جمرتينٍ ذايبٍ فيها شهدها=والخشم سلة حسامٍ ضيع عزومٍ قوية
الجبين ان لاح ضوه أنكر الشمس وجحدها=في خدودٍ لونها لون الشفق بالمغربيه
لالمحت البسمه اللي لااضحت بين بردها=انتظر مشتاق سيف رموشها يقضي عليه
بد كل البيض صارت تلعب بقلبي وحدها= غصب عني جيت طايع لين قدمته هديه
الهموم ان كان غابت طايلٍ فيني أمدها=وش أسوّي دام حبه صايرٍ منّي وفيه
من فراق الزين روحي ساكنه باقصى لحدها =والجروح اللي بقلبي بعدها صارت طريه
شاعرك ياروح روحي والبيوت اللي قصدها= كلها فدوة عيونك والغلا والمقدريه
كل شيٍ في حياتي راحة النفس وسعدها=الطفولة والبراءة والعيون النرجسيه

آآآآه منك 00ومن غيابك كنّه (سيـوف رولـه)=وكنّ قلبي يالحبيبه0000 ( العـدو المفتـري )
حبكـم مجتـاح قلبـي آخـره مـع00 أوّلـه=ماتصدق ؟؟ شف دموعي غارقه في محجـري
كنت اكابر واذكر انـي منـي انـزاح الولـه=ليـن ماشفتـك ملكتـي أولـي مـع آخـري
ياشمالٍ// وسط قلـبٍ //صايـرٍ لـك بوصلـه=وكان شرقْ/ وغربْ /حوله مع جنوب فْلا دري
شاف قلبي مـن 00جنابـك مارمـاه وهولـه=ولو يقول بيوم عافك 00والله انـه ( منبـري )
لو تجي مقبل بخطوة ///جيتك اركض هرولـه=ولو يزود الشوق جمره/// تنذهل من منظـري
كل وقتٍ فـي غيابـك// سرمـديٍ مااطولـه=ولالقيتك انسى وقتي00 وسنتي 00وايا دهـري
نوب اشوفك قرب قلبـي// لابغيتـه اوصلـه=ونوب اشوفك عن ضلوعي// ابعد من المشتري
واكثر الأحيـان //صمتـك ممتلـي بالأسئلـه=من غموضك في وضوحك ضاع عقلي ونظري
انتي اطهر مُسكراتي00انتي أسهـل مُعضلـه=انتي أصعب أُمنياتي000انتي احـلام سهـري
وان عرفتك يالحبيبـه ///فيـك شـيٍ اجهلـه=لامتـى وانتـي بقلبـي واقفـه تتبختـري ؟/
ودامها صارت حياتي دون شوفـك //ممحلـه=وش تبين اكثر مدامه /// خنجرك وسط نحري

يوم جد الجدّ شفنا مازعيم إلا الزعيم=واثبت شروط الزعامه رغم تأثير الزحام
أثبت أنه قد حكيه ماهو بحكيه عقيم=يوم غيره كان غارق في متاهات الكلام
يالزعيم الصيرميّ الشاهق الفذ الفهيم=يكفي إنك للمعالي وأول الواجب وسام
يابو فهد تستحق المدح يالذيب العديم=والعواذل من فعولك عزمهم رايح عدام
شفتهم في أم عيني فحلهم أصبح سقيم=يوم قصّرعن شموخك في بلوغات المرام
أحتضنهم وسط صدرك أذكرك رجلٍ حليم=وأنت نورٍ مايهمك إسودادات الظلام
نار عزك أحرقتهم لين صاروا كالهشيم=وبحرك الطامي غشاهم حطهم تحت الركام
وصاعقة مجدك كوتهم واحرقتهم كالصريم=مادروا إنك تحب المجد والصف الأمام
ابو ثامر من ذهوله داخل أفكاره يهيم=فيوز مخّه إنحرق وأصبح يعاني إنفصام
بالكلام إذا حكا لك يبطش بروح الغريم=وبالفعايل حط راسه بالجحر مثل النعام
وجّهه يمشي معك إلا إذا اطريت الحريم=ياهو خوف أو هو تجاهل للمحبه والغرام
بس جوفه قلب طيب أسهل وصوفه رحيم=قلب يمشي باحترامه وفق تعليم النظام
واختيارك يابو ثامر لنّك أنسانٍ عظيم=والشعر باسمك شهق بك فوق هامات الغمام
ويالزعيم أفرح ونغنغ في بساتين النعيم=وبلّغ العذال حبي والتحيه والسلام

انتثر عقد الفرح لك يالميس=والطهاره صارت لجسمك مقاس
لك حطبت الشعر واخترت النفيس=من ذهب شعري وكسرت النحاس
مع عيونك أكتمل معنى الأنيس =ووسط شعرك انهزم جيش الدماس
وفي شفاهك وش تركتي للهريس=والعسل منهن يعاني إنتكاس
لاوقفتي هالغلا لجسمك يقيس=ولامشيتي أرضك تبوس المداس
معك سبتي ينقلب عصر الخميس=وكل أيامي تُصاب بإلتباس
ولازعلتي ينقلب عشبي حميس=ومن زعلك تبكي جموع الحواس
وان ضحكتي يصبح الخافق حبيس=للسعاده والهنا قمة وساس
أنتي ابواب التفاؤل للتعيس=وانتي اُلفة مجتمع فتح وحماس
يالميس القلب ملكك يالميس=ودنيتي تاهت مع عيونٍ نعاس

أربع طعش سم ٍودمٍ تعدّن=في خيرهن وبشرهن لخبطنّا
ياهن خذن من حضنا ثم ودّن=وياكمّ مرّه بالأسا ورطنّا
وياكم بيتٍ بالصحاري تمدّن=وفيهن تغير كل شي بوطنّا
وفيهن عواصف للخلايق تحدّن=وأربع عجافٍ بالقهر مرمطنّا
نبني وكل مانرفع السقف هدّن= ندفع بلاهن لكن يشابطنّا
نرخي حبال المصلحه كان شدّن=وعلى جدار الغربله شخبطنّا
وإذا أنفتح باب الأمل له يسدّن=يعطن ولكن يسلبن ماعطنّا
وقبل العشا جاعن وفينا تغدّن=وحتى بروحتهن جكاره وطنّا
وعلى كثر ماهن لجسمي تقدّن=على كثر ماللمراجل فطنّا
وبعد الصبر طسن وبالغصب صدّن=وماتن عجافٍ بالقسا صفطنّا
والحمد لله يوم ولن ومدّن=وله نحتسب كل ماخذن وشفطنّا

الشعر ما00يشترى ولا00هو يباع=ولا بغيته انظمه جزلٍ رفيع
أجرعه وافلل أكواب النخاع=ومع سوائل دمي يجف ويميع
أبحر بدنياه والمعنى شراع=والسفينه فكرة الطرق السريع
دام هالوقت انتحر عهد الشجاع=والجبان الحر والسد المنيع
وقتٍ أقشر ساد به سقط المتاع=وانفرس ذيب المعالي والشجيع
ماألومك يوم مارست الخداع=وامتهنت الذل والفكر الوضيع
لو زمننا ينصف زنود النزاع=والله أنك لاصغر أصباعي تبيع
أيش أسوي باتسلى باليراع=مضرّي أفكاري على النظم البديع
دام يالأبله يضيق الأتساع=الشعر يبقى هو الرحب الوسيع
ينتشلك من المذله والضياع=ولايبي أجره على حسن الصنيع
ويالسفيه إحذر من دروب الضياع=لاتصير بواجهة شعري تضيع
أترك افكار الضلاله والضباع=وانتهج نهج العصيمي والمنيع
وكان ودك إنك بأمرك تطاع=لازم المأمور لامرك يستطيع

الطيب يفخر لاذكرت الشعالين=سباع الوغا ومشيبين الذيابه
شيوخ تعلوا فوق روس السلاطين=واللي يعاديهم غرق في عذابه
ياما كعموا روس العدا والشياطين=وعدوهم سم الأفاعي شرابه
معهم هل العليا صعوط المجانين=صدر الشموخ وبالشجاعه صبابه
ومدحي لابونايف هك الحر شاهين=النادر اللي كل رجلٍ لجا به
ليثٍ ولد ليثٍ حرارٍ أصيلين=ومن شاف وجهه زال وابل مصابه
رجل التواضع والشهامه وبعدين=وجهه بشوش وريح عز ومهابه
خيره غمر تل اليتامى المساكين=وطيبه غشى رجم الضعوف الغلابه
لرويل كنّه عطر ورد الرياحين=ووبل الشموخ اللي هطل من سحابه
زعل مشاري يافضاء المساجين=ياكتاب طيبن كل دارس قرا به
بالدين الاول في جموع الملبين=وكله خصال من صفات الصحابه
وقت الرخا وجهه سماحه وتطمين =ووقت الشدايد واقفن للقرابه
لاقصى رويلي يعسف العون ويعين=ويقاسمه فيما معه من زهابه
المدح يزهى بالشيوخ الكريمين=وزعل شمخ به دفتري والكتابه
حرٍ تفاخر به جموع الشعالين=وطريف تفقد روحها في غيابه

الصبر ضاق وضاق وأيضآ بعد ضاق=وأظن مابه صبر من بعد قانا.
حرمه وشيخ وعقبهم طفل منعاق=ياحسرتي وش عقب هذا شقانا
معقول عقب المجزره ماحدن فاق=الله يرحم مابقى من بقانا
إلى متى والمسلم يموت باحراق=وإلى متى صهيون سمه سقانا
ومتى نتغدا دم وفرود وطلاق=ومتى تجمع ربعنا وأصدقانا
نبي نخلي ليلها يصبح أشراق=ونشرق بعزة ديننا مع بقانا
ونتنا الوعد لا ألتفت الساق بالساق=في وقتها الرحمن وحده وقانا
من عقب ماكنا لهم ستر ورواق=يوم العروبه تفتخر بارفقانا
لكن الواقع ياخسارة هالأشواق=مافيه سافل واطيٍ مارقانا
من كف وقت شين ذقنا لنا طراق=والعلج في خرق المهابه لقانا
ويوم ابتدى كشف الحقايق والاوراق=صار الخلل باسلامنا وبتقانا.
على بعضنا عنف وهواش وخناق=وهذا سبايب أسودادة نقانا.
لبنان راحت قبلها راحت عراق=وما آقول غير الصبر ياتراب قانا

يرقص لي القاف لامن غرد احساسي=للي سكن في ربيع القلب طاريها
ريحة نفلها سرت مع سكة انفاسي=وشذا البحتري جروح الروح يبريها
صاحت: جموع الفتن دقت لي أجراسي=وين انت ياللي فلول الجهل يفنيها
جاها الزعيم وخذاها بعزمه القاسي=وهي زغردت له وعذب الشوق ماليها
قالت يبو تركي أنت القايد الماسي=وانت الذي صرختي بالجوف توحيها
حررتني من زمانٍ غابرٍ آآسي=وشرع الشريعه فرضته مع مباديها
هي الرياض الغلا هي لذة نعاسي=هي عاصمة عشقنا والقلب حاويها
بين امسها ويومها تاريخ متواسي=من حاضرٍ شاهقٍ لامجاد ماضيها
لبّستها من غلايه فاخر لباسي=وبدم قلبي أزمّلها وافاديها
افاخر بمجدها مابين جلاسي=دار الثقافه وبيت العلم يبنيها
هي أمنا هي أمانٍ راسخٍ راسي=بقيادةٍ عقدة الصعبات تنهيها
لا لا يهمك عقوق الجاحد الناسي=عندك رجالٍ تدوسه في مواطيها
وتحت امرك الروح ياضيي ونبراسي=ندعس خشومٍ خيانتها لاراضيها
هي عاصمة عزنا هي منبع احساسي=وجوري فؤادي يفوح بعبق طاريها

الغلا مايقبل انصاف الحلول=وانهمار الشوق ماليني ملي
ودّي اروي بك قوارير الفضول=لاجل اطفّي هاجسٍ يغلي غلي
القصيد بهودجي فوق الذلول=زفّه الخافق لجيدك كالحلي
في وصالك تعشب فياض المحول=وغيث قربك يفلي همومي فلي
ومع حنانك ينقرض معنى الذبول=وينفجر ينبوع حبٍ ممتلي
وفي عيونك ضاع ترتيب الفصول=وسيف رمشك في عيوني مبتلي
النعومه واللباقه والقبول=والأناقه والجسم رقّة جلي
طيفها يجتاحني عرضٍ بطول =كنّها مخلوطةٍ مع صلصلي
هي مواثيق المحبه والأصول=وهي أكاسير الحياه ومعولي
مع شفاها ينهمر سيل الذهول=في شعيب القلب والفكر الخلي
وفي محاسنها مسافات الشمول =والبراءه في جسدها تنطلي
وش اعدّد وش اردّد وش اقول=مالي إلا آصيح (ياويلي ولي)
والغلا مايقبل انصاف الحلول=لنّ حبك مالي أحواضي ملي

يلعن أم الشوق وسنين الغرام=ويلعن أم الحب سابيني سبي
ياما عذبني بقلّ الأهتمام=وياما جرجرني على روس ركبي
سدّ حبي ينحني للانهدام=من زلازل جفوة عيون الظبي
ونور شوقي عذبه ليل العتام=والحزن ياخذ من الفرحه جبي
من عقب ماني على روس الأنام=عند ستّ اللي يلفّنّ العْبي
كنت فانوسه إذا جنّ الظلام=يوم ديجوره غزا قلب الغبي
كنت اظنّه من زرع قلب الحمام=بالبراءه واحتضانة مطلبي
وبالوهم إني على راس السنام=بذروته كنت آتصور مركبي
لين مابانت تقادير المقام=وانجلى غدرٍ بقلبه مختبي
واغتسل كوني عقب كحل العسام=واكتشفت نحاسي مْن اْصل ذهبي
وقتها حطيتها تحت الركام=وانتحر حبي وكشّر مذهبي
كل ذنبي اني بحبي إمام=وكاسة الإخلاص صافي مشربي
من يقدم قلبه بكف الغرام=في زمنّا يُعتبر أبله غبي
والوصيّه قبل توثيق الختام=عوّد لسانك على ذكر النبي

صاب الجوارح مِنْه تدمير شامل=في عالمه ضاعت وصوف التشابيه
تسع وثلاثينه غدوا غاز خامل=وهو أكسجينه لو غشا الجدب يحييه
من شفت وجهك كني انسان ثامل=من كاس زينه انسطلت بمحاريه
بالدلعنه والزين روعه وكامل=وديباج خدّه لبس الورد تشويه
شفت الكثير من الوجيه الخوامل=لكن وربي وجهك السيد البيه
ياليتني عنده مراسل وعامل=وإذا ندهني قلت: لبيّه لبيّه
لو كل ساعه ألمحه ونتزامل=والله ما آمله ولا اشبع تِحِلّيه
أقسم قسم ماني باحابي واجامل=لاقلت إنه سالبٍ عقل مغليه
لجروح قلبي والوساويس دامل=والقلب من صافي وريده يغذيه
لا تقطعينه يصبح القلب حامل=درزن همومٍ ترتكي في محانيه
بُعدك (خلف) والقلب منطوق (زامل)=رمزيةٍ هذي لشيٍ أعانيه
والفكر راهق واصبح من الهوامل=هايم على وجهه بصحرا موانيه
شف جوز عيني من فراقك أرامل=سوادهن من مخمل الحزن كاسيه
تجزأت روحي لادق العوامل=والقاسم الأكبر لها سكة التيه
أحيان أحس إني على البعد صامل=واقول وش لك بالغرام وتغليه
ولاشفت وجهك أرجع إنسان ثامل=وابوس كاسه وانسطل في محاريه

ورد الفرح في تربة القلب نامي=وفي وسط بستان الحشا صار مغروس
ثار القصيد وصار كل اهتمامي=وإذا نويته يصبح العقل ملحوس
وتلبستني شيطنة حكي دامي=وأحسّ راسي كله سيور وتروس
وليش لأ..؟ والشعر كله لسامي=اللي تورّط خده بصادق البوس
له بالحنايا بحر من شوق طامي=وغلاه مع دم الشرايين مهروس
من عند ربي صار ذروة سنامي=سند وعزوه لا انقلب عشبها طعوس
يارب فيه إنك تعلّي مقامي=يصير سهمٍ والمواجيب له قوس
وتجْعَلْه رمز لكل مفهوم سامي=واشوف بصماته على ارواح ونفوس
لاغبت عنّه ذقت جور المظامي=من شاف حالي كنها ذيب مفروس
وليا لقيته صرت مدري علامي=فجأه أصير لجسم الافراح ملبوس
هو البصر للعين كلس العظامي=وفي مسمعي صوته تراتيل طاووس
في ضحكته يجتاح صدري هيامي=ورمل الأسى من داخل الجوف مكنوس
لاشاف بيديّه كياس المرامي=باقصى شقاوه شفته يقبل الروس
وفي شيطنة طفلٍ برئٍ عصامي=يحوس فكري باسئله تربك الحوس
يقول وش بالقدس للحين ظامي=ووش فيه صهيون بكراماتنا يدوس
وعراقنا حزنه على الأرض زامي=وليش ماناخذ فلسطيننا دروس؟
وبيروت وش فيها غدت حقل حامي=للنسف والتدمير وارتع بها السوس
قلت ولدي وش رايك نشوف رامي=كبتن يسجل قول بالرجل والروس
بسبيس تون تصير طفلٍ نظامي=وش لك بشيٍ طعنته سمٍ بموس
والشعر لاصار يتغنا بسامي=يعشب وترتع به قناديل وشموس

تستاهلين اللي فرش لك شليله=واللي خيالك بين الأهداب ضمه
واللي شعل قلبه لحبك فتيله=واللي غرف لك من فناجيل دمه
يالزبده اللي موديه من صميله==يالدانه اللي هزت أمواج يمه
يااطهر ذنوبه ياشراع الفضيله=ياللي فضائه تحتويه وتلمه
وإذا عثر جرحه تفز وتشيله=كنه غريرٍ تحتويه وتضمه
ياغايته وش ماتكون الوسيله==يدعس على خشم الخطر مايهمه
لك بالحنايا دولتين وقبيله=ولك بالفكر شيخٍ ملك عرش أُمّه
عذب الفرات وضفتيه ومسيله=حبك إذا داعب فؤادي وخمه
يالمخلصه يالوافيه يالأصيله=ياسيدة حرف غرق في متمّه
حبّك حكاية ألف ليله وليله=لاضجّت بمسامعي صحت يمه
وإلا خيالٍ في بواطن كليله=تاريخ فكري حط راسه بكمه
أجل بعذره لو فرش لك شليله=لا صار فاعل وانكسى منك ضمّه

انكر وجودي،،، ولا انكر هدنة الخوّه=ياطيرنا الحر،،، والله ماتت الغايه
قال إكتفى لب قلبك،، قلت له توّه=وشلون أبااروى،، وجرحك نار مضمايه
من دجلتك وأول فراتك،،، لنا روّه=اباأحتضن سكره، ،،في آخر أقصايه
عاثوا بعرضك،، علوج الكفر والسوّه=كل مانسي أسفلي،،، يستنفر أعلايه
بغداد !!!ماعاد فينا ذرة،، مروّه=للذل وأردى الهوان ،،،زنودنا مرايه
لا ياابو جعفر~ إذا في عزنا هوّه=العلقمي// قبلنا للذل... دلايه
من بختنصر .،.إلى صدام متشوّه=تاريخ (يعرب) ،،،تلوث باغرب حكايه
ياعراق مافيه،،، (راق) ~لداءنا لوّه=يستبدل أشلاءنا،،، في (راس محايه)
اللي تبي (يابني أصفر) بنا سوّه=مادام غلظ العلابي (هرس) بردايه
نعرف من اسم النوادي كلمة (فتوّه)=ونتقن لحد الثماله (لحن علايه)
واجسادنا في يمين الجبن (دهدوّه)=ويراع عزك له النخوات،،، برايه
إلا على فكره،،، يقولون محلوّه=(هيفاء وهبي) غنوج وبالحلا آيه
غطت على حسن (أليسا) وانطفى ضوّه=وأحتلت الجو من (لوه) إلى (هايه)
عن نص شعري خرجت وعن غثا جوّه=لان الحقايق تحفر الهم (بادنايه)
إذا استوى في زمننا الحر والبوّه=واغلب الاذناب،،، للتيجان ~لهايه
حبل المراجل على بطن الكفن طوّه=ويامحجري بلله من دمعة بكايه
ياعراق؛ راق؛ الف... راق~ وماتت الخوّه=وملامحي،،، تفضح اللي مآآآت جوايه

أعتقد أني بحقك ماغلطت ولا خطيت=لكن أنتي تنحتين الهم في نفسٍ بريه
أذكر أني دوم صادق في هوايه لاوفيت=وأذكر أني في عيوني كبرياء ونرجسيه
حبك اللي مبتليني كيف أنا فيه أبتليت=وين أنا ربي رماني في ورودٍ مخمليه
كنتي الرمز الاساسي في فنون الأيتكيت=تخجلين الياسمينه بالعطور المشمشيه
أولّه بين البِني إن كان زين أو كان صيت=تسلبين الحُسن شهده من ميادين الخليه
كنتي الملجأ لجرحي لازعلت ولاشقيت=وكنتي أطهر نفس ذابت فيها روحٍ وايليه
وكنتي انفاس القصيده كل حرف وكل بيت=وكنتي أجمل في عيوني من زهور المزهريه
كنت أسكر في عيونك وارجع أثمل لاصحيت=وكنت أسهر مع حنانك في دماس المغربيه
تذكريني بالنخاوي لاثقل الحمل أرتكيت=يوم غيري كان غارق في دياجير الرديه
وأنتي أكثر من عرفني بالشدايد ماانحنيت=ماسجدت لغير ربي بالصباح وبالمسيه
انهمر بحروف شعري وابتكرها لابغيت=مثل جلمود الصخر لا جا مع سيول قويه
وانتقي عذب المعاني يوم أنا شفتك وجيت=واخجل الورد ونداه بحرفنه مع شاعريه
قلت يمكن (يالرويلي) كنت لحظتها سهيت=وارتكبت الذنب الاول في ترانيم المنيه
واحتضنت كتاب فكري صار كيت وصار كيت=وآتساءل عن سبايب صفرة ورودٍ نديه
وصرت أفتش في رفوفي وش عملت ووش جنيت=وما لقيت الحد الادنى من مفاهيم الجنيه
وقتها أيقنت اني لاعظم أسرارك لقيت=وأن كُثبان التّغلّي ماكنه بالمخمليه

طيف وتبسّم ينّط الهم من صدري=واتْطير من داخلي جحافل الحسره
وينوّخ القاف في قمرا سما شعري=والحرف غنّى وقامت ترقص الفكره
والشعر قيّدتْه وقال إغترف بحري=قلت البسيط اعشقه واتلذّذّ ببحره
والمفردة تنثني للشاعر السحري=تخطب غلاه وتحطَّ عقالها بنحره
حرّ القصيد اقنصه واطيّر الوكري= واحطب سمين المعاني واشتعل حبره
لاقمت أخط بيراعي واحتضر فكري=تلوح في دفتري بيارق الشهره
وارجع على (طيف) دنياي وسنا فجري=أبهر (مليح) ووريده وثمرة عمره
خنجر غياب البريئه يمتحن صبري=وفي شوفها تحتفل وتزغرد النظره
وان عرّضت لي بكشخة ثوبها الزهري=عدّاد قلبي شهق عشره على عشره
بعيونها عرشي وقضباني وقصري=وبخدودها برق يخجل كوكب الزهره
باصرارها تكتسح صندوقي الصخري=لا من رفضت وتغيّر منطق النبره
بجورٍ طفولي تجي تمسح على شعري=وبالونة الرفض شقّتها بْطرف إبره
كلمة يُبه من شفاها تحتضن حجري=وينبت بها الفُل حول الشيح والخُضره
وان تمتمت في كلامٍ يشبه العبري=مسامعي تضحك وتدمح لها العثره
وإن راسها قام يتْمرجح على صدري=إيداعب النوم جفني واْلعن السهره
تجتاح نفسي وتسبح في حلا نهري=وبْنخاع عظمي تجول بسائل الفقره
وان ضقت تحمل متاعب شيبت وِزري=وبالدمعه النرجسيَه تدفق العبره
تقول: بابا أعرْف أنك فِدا عُمري=وياليتني هالبياض بغرقة السمره
وماألبث إلا أواري همّي بقبري=واحضن غلاها والبّس خدها الحُمره
ياطيف أنتي عُصاره طهرت خَمري=لاشفتك أثمل وأهيم بعالم السكره
هي واختها ( في ّ) عزّن مملكة قدري=وتِتَرْجم احوالنا بحكاية الشعره*
والجيب لو كان خاوي فاضيٍٍ فقري=فيهن غناه ونهاية شرشحة فقره
(طيف) وتبسم يموت الهم من صدري=وتنساب من داخلي جحافل الحسره

تسع الكواكب مَلّت من الــْ مْطَاَرَدْ=وعزم القمر راسخ ولا آظنّه يْنيخ
وضجّْ الدلع في ثغر بسمة عطارد=يحقّ له دام إنّه صغيّر فريخ
وزُحل بحلقاته للاثواب سارد =والأرض باست جبهة العم مريّخ
وكوكب الزهره بين صادر ووارد=والمُشتري نايم على وسادة الشيخ
وسْهيل شفته خارج الحدّ عارد=عرّط بثوبه وكفشوه المطانيخ
والجدي بعد المرجله صار هارد=لنجم النعايم واحترف طاخ مع طيخ
وابا اسأل اللي نارها احساس بارد=وش فايدة شهدٍ بجواه زرنيخ؟
إلى متى ريم الغلا منك شارد=وإلى متى ثقلي بلا مُخ ومْخيخ
لكني أملك جأش واصرار طارد=مايتبع الهندوس أو شلّة السِّيِخ
لْشَعر الرّجوله والمواجيب فارد=ورطوبتي ضاعت بها قوة الصّيخ
تجغرفت نفسي نفيس الموارِد=وصندوق عزي اكتنز عرش تاريخ
لا زلت الأوّل ان نوى القلب يارِد=ولا زلت شامخ في زمان المناويخ
وتسع الكواكب هايمه بالْـــ مْطَارَدْ=بسّْ القمر هل تشرق الشمس ويْنيخ؟

يادرتي ست خلق الله=غلاك متسيد إحساسي
لاشفتك اهلين بالطلّه‏=تفترّ في داخل أنفاسي
ياما حلا القذله الهلّه=وعيون مع جرحها تواسي
والجسم موصوف بالدلّه=‏والساق مع برمته راسي
في شفّتينك دوا العلّه=ومن توتهن ينتشي كاسي
والبشره ورود مبتلّه=قصدير مخلوط بنحاسي
حُبك مؤشر ربح كلّه=لاهو بولينجر ولاتاسي
قلبي ربط طيفك بظلّه=ووقت العرا فاخر لباسي
لو الغلا يحتضن خلّه=‏ويبدّد القرب هوجاسي
تشفى بك جروح منسلّه=ويموت بيديك وسواسي
وتزين لعيونك الشَلّه=وقصيدي النادر الماسي
من دونك النفس مختلّه=يافخري وكل نوماسي
وبراغي القلب منحلّه=وقامت تدق اخطر أجراسي
يامادمحتي لي الزلّه=يوم عثرت أسبق أفراسي
ياكثر ماطحت بالملّه=لكن قويٍ ومتواسي
مبطي وانا ضد للذلّه=وقطّعتها بحدة أمواسي
ومن لامني قلت له لِلّه=ماآجوز عن لذّة نعاسي
وياقلبي ان ماانتهى قلّه=مخلوطةٍ في حجر ساسي
هيجنت ياستّ خلق الله=ونَبْتت ورودك مع انفاسي

يلعن أم الشوق وسنين الغرام=ويلعن أم الحب سابيني سبي
ياما عذبني بقلّ الأهتمام=وياما جرجرني على روس ركبي
سدّ حبي ينحني للانهدام=من زلازل جفوة عيون الظبي
ونور شوقي عذبه ليل العتام=والحزن ياخذ من الفرحه جبي
من عقب ماني على روس الأنام=عند ستّ اللي يلفّنّ العْبي
كنت فانوسه إذا جنّ الظلام=يوم ديجوره غزا قلب الغبي
كنت اظنّه من زرع قلب الحمام=بالبراءه واحتضانة مطلبي
وبالوهم إني على راس السنام=بذروته كنت آتصور مركبي
لين مابانت تقادير المقام=وانجلى غدرٍ بقلبه مختبي
واغتسل كوني عقب كحل العسام=واكتشفت نحاسي مْن اْصل ذهبي
وقتها حطيتها تحت الركام=وانتحر حبي وكشّر مذهبي
كل ذنبي اني بحبي إمام=وكاسة الإخلاص صافي مشربي
من يقدم قلبه بكف الغرام=في زمنّا يُعتبر أبله غبي
والوصيّه قبل توثيق الختام=عوّد لسانك على ذكر النبي

سحبت الدفاتر والقلم واصعب الألحان=وقمت احتضر فكري واجمّع مطر وبله
رشفت الخيال وتهت في عالم القيفان=أشطّب وأأّكس لا انبنت فكرةٍ سهله
بربّك تعالي وانظري وجهي الحيران=خيوط القهر نبتت على دمعةٍ وجله
وحالي بعد فقدك سكن قلبها الأشجان=وفُلّ الحشا خرّف غدت وردته ذَبْله
وكان الفراق بدفتر العمر لي عنوان=نسج خيطها قزّ القدر في زمن أبله
ابصبر مدامي أُخجل الصبر والكتمان=ولي عِبْرةٍ في سالفة عنتر وعبله
وإذا وحشة غيابك وراها غلا إنسان=أصيد بيميني وارفض حثالة الفضله
أصيب الهدف وارمي رغم حدة النيشان=وانوش السما واطبع على غيمته قُبله
وليّه تحفّظ ضدّ من يسرق الجيعان=لَو إنّي أجامل كبدي اتْصير مندبله
وأنا مثل منتي تذكريني رفيع الشان=احَفْظ الغلا وآموت من مبدأ النّطله
ْوربّي قِسَم رزقه على الصقر والسمّان=وْرزق الغواني من ورا دقّة الطّبله
حذاري يجرّك وحل زينك على ميدان=يغرّك ذهب سوره ويشنْقْكْ في حبله
صحيت فْـــطبل قلبي بصدري كما الطنّان=وتمتمت في نفسي هك القلب ياهبله
لعنت الغلا والحبّ واطلالة الشيطان=وبِست الغدر من جبهته وانحرق كِبله

اترك الأيّام تفعل ماتريده=وارضْ باللّي كاتبه ربّ العبادي
واثبت بوجه الأعاصير الشديده=وانحت نجوم التفاؤل بالسوادي
لو تشوف المُعضله رقطاء عنيده=بالصبر تفنى متاريس العنادي
والصلاة كنوز الافعال الحميده=لـــْديننا الإسلام هي ساس العمادي
من تركها نال من ربي وعيده=يُحشر بزمرة ثمود وقوم عادي
وسُنّة المهدي لحوضه هي =من لزمها رافقه يوم التنادي
ووالدينك هُم مطرك وهُم رعيده=ينزرع في بِرّهم فُلّ الأيادي
والقناعه كنز للنفس المجيده=ماس لايفنى نموّه بازديادي
إقنع ولو كنت من تحت الحديده=رزقك وياتيك من بحرٍ ووادي
والأمانه قلب الاخلاق ووريده=ترتفع بك فوق هامات المرادي
والصداقه خلطة الحب السعيده=لااستقرت في شرايين الفؤادي
والحماقه جمرة الجهل الوقيده=تحرق الأحمق تحت قدح الزنادي
والغدر هو مكمن الجرح وصديده=لا سكن بك يكسر زنود الشّْدادي
يابن آدم إجعل اعمالك مُفيده=يسترك فعلك إذا صاح المنادي
احفظ اشعاري ورددها نشيده=وابتعد عن كل شيطانٍ وسادي
واترك الأيّام تفعل ماتريده=مايجيك إلاّ قدر ربّ العبادي

الحُب أنتي درّته وبحوره=وجواهره واْلماسه المنثوره
أنتي لحبي رحلته والغايه=وفي لب جوفه صورةٍ محفوره
ياسيّدة عرش الحلا والرقه=ياأرض قلبي بالغلا ممطوره
إذا غنجتي وانتثر ورد اسمي=مات الغنج في فاتنات شتوره
وان سلهمت عينك برمش ناعس=ضجّ الرمد في خُضرة المنصوره
والخدّ متورّط معاه المغرب=ضيّع حَمَارْه واستفزّ شعوره
ورمشك يوم انّه بسّْ شايف حاله=يحقّ له ليه البشر مقهوره؟
وخاتم سْليمان إنرسم في فمّك=وشفايفك فصّه وشهد زهوره
كنّ العسل ذايب على مبسمهن=من جمر ورّطهن بواهج نوره
وفي دايرة وجهك يتوه الهاوي=والبدر يخجل من بياض نحوره
لا من مشيتي ياحلاة المشيه=كأن تحتك كاسة مكسوره
كل الشوارع تحتفل لاجيتي=وتقبل أقدامك وهي معذوره
وإذا وقفتي والبني من حولك=شفت المرديان جانب المعموره
ماكنت أظن أنك سكنتي روحي=حتى رفعت الكلمه المجروره
وقمت أحْطْب ضلوعي وباقي جرحي=وأشعل بها لاجلك فتيلة سوره
وحيرت تحليلي ووصفة طبي=وماتت أمامي خبرة الدكتوره
بس الصراحه ماخبرت بوقتي= فتاه مثلك ماهي بمغروره
ومازلتي بقلبي جواهر ماسه=وارضية أرضه بالغلا ممطوره

من تجيبه أمه بقرص العواصف=ماتهمه انحرافات.... الرياح
أكره إني أُسأل وبعدين آصِف=وان وصفت آعدّي خطوط السماح
مُشكلة صدقي يجي كالرعد قاصف=يزأر بوجه المْناهَق والنباح
سهل شعري لاصعب الأفكار راصف=واحترفت الطاهر العذب القراح
عزّتي ترفض أكاذيب التراصُف=وين يلقى الندّ مُختار الصحاح؟
بين قلبي والعقل مبداْ التناصُف=بين ضبط النفس واطلاق السّراح
لخاطر الشعر وعيونه جيت خاصف=له من الوان الركاكه والجِراح
نجمة التمثيل عندي بنت واصف=وعند غيري يمكن اختاروا صباح
والمَقامه امتهنها الشيخ ناصف*=وكل حرفه تنتظر شرط النجاح
الفضا 00مع غانية بست المقاصف=والقفص إصبع على زناد السلاح
لاهِنا باوقف وما للنفس واصف=بانتهي سمعت حيّعل الفلاح
قاله اللي داس شريان العواصف=واكتنز صلف الهبايب والرياح

يُمّه وتزْهر نواويري على فمّي=ولك يلبس الشعر ياقوته ومرجانه
غلاك عتّق مع أول قطره بدمّي=ياروح نبضه ويشمومه وريحانه
شرفك ربي على خوالي وعمّي=ومن تحت ماطاك فاحت ريحة جنانه
ياكثر ماخف في نفسك ثقل همّي=وياكثر ماقسدرت لقياك شريانه
ياما سهرتي توسّدتي طرف كُمّي=يوم أن نفسي بوحل الغم غرقانه
وياما صبرتي وقاسيتي شقى زَمّي=لاصحت من علةٍ بالحلق شرقانه
ويوم انتثر تبلشين بغربلة لمّي=وتجمّعيني بطهرٍ نظف أزمانه
ريحة حنانك سطت في قافلة شمّي=وصارت مقرّه وترميزه وعنوانه
يايمّه ان غاب زولك زارني غمّي=واهيم في عالم الحرمان واشجانه
وفي شوفتك واحتضانة صدري وضمّي=أحس إني ملكت الحب واوطانه
بِرّك عنه مايتوه الجاهل الأُمّي=وياليتني أمتلك ببرجه وميدانه
أنتي جواهر ثمينه غاصت بيمّي=وإنتي سما القلب يا قطبه وميزانه
لرضاك (أُفٍ) تجي مع ذلتي سمّي=مادام ربي ربط عفوك برضوانه
أُمّي نعم سيّدة كل البشر أُمّي=في خافقي تملك عروشه وتيجانه
يُمّه يذوب الشهد من مَنحلة فمّي=لاغرّد الصوت باسمك واطلق ألحانه

القلب شقنًَََه شطار الجنابي=والعقل صابه من قسى الوقت تشويش
وكني معلق فوق حدب الحرابي=وعشش غراب البين بالنفس تعشيش
كل مااندمل جرح يتجدد صوابي=والجسم من مخلب قهر جاه تخميش
إلى متى والذل نامي ورابي=وبين الأمم نوضع على سطر تهميش
ذيب الغدر من زود فتكه عوابي=ووجه العروبه إرتوى بالتناميش
مدري متى نرقى عروش الروابي=ومدري متى ننزع عن وجيهنا الخيش
ياصابرين إسمك على وجه بابي=مايقهره بالصدر نقطه وتفتيش
تكثف أسمك في محاجر سحابي=وامطر مرارة علقمه في ثرا بويش
تبطين في صبرك مدام الدوابي=تعيث فينا ورسمتنا دراويش
لا ترتجي فزعة غلاظ العلابي=اذانهم تحتاج صيخٍ وتشييش
ماهمهم ياغير ترس المخابي=والعالم تدور على لقمة العيش
سبة مصابك طار مني غرابي=وغرنوقي أبلشني بكثر المطاريش
ودمعك لمحته وانكسر كل ما بي=والجو صابه من جروحك تغابيش
عارك تلحًفنا يابنت الجنابي=وبالوحل لبسنا حجول ودناديش
ياصابرين إن كان جالك جوابي=عقبك حرام إنا على أرضنا نعيش!!!

بيارق عزة الإسلام حماها ربنا الرحمن=تكفل يحفظ القرآن مجيدٍ في حمى لوحه
كريمٍ عادلٍ واحد عظيمٍ مقتدر منان=عفوٍعن خطا عبده والزلات مدموحه
إذا هالشعر ماساهم بفرجة كربة الإنسان=وربي مايفيد الحرف لا نبضه ولا بوحه
إذا ربي يقويني أبدخل معمعة (بدهان)=وأحاول بعد رب الكون (مجيد) آعيد له روحه
بداية نطلب ونرجي ورود العفو من (قبلان)=رسول الأمه الهادي عفا عن ناس مفضوحه
وريحة جنة الفردوس تحت ستارة الغفران=ودنيانا كلها رحلة قصيره ترطش ملوحه
ترى عتق الرقاب من الفعول اللي تعز الشان=تصير ليا انعرض فعلك من حر الحشر دوحه
ويا (عبد المجيد) إصبر يزين الوقت مهما شان=لقلبك ربك يقيض سخيٍ يدمل جروحه
وأبااطلب كلٍ يساهم يفك القيد والقضبان =ولا تحقر صغير الفعل عند الله000 بحبوحه
ألا يااهل الكرم جتكم وعود المصطفى العدنان=بجنه عرضها عرض السما والارض 000ممنوحه
ياربي رده لأمه مطهر من سلا الشيطان=وتحطه في ربيع القلب بالشريان مرجوحه
كتبت الحرف ماأرجي إلا رحمة الرحمن=عساه مأديٍ دوره ويشفي نفس مجروحه

مدري خطا كلي أو أرباع نصفي=أونصف ربعي ...وازنٍ عقل سقراط
صرت آتحير بين رسمي ووصفي=وفي داخلي عالم جمع عدة أنماط
رصفت دربي وآآآه ياكل رصفي=كاني خسرت بدنيتي سبعة أشواط
غلاك بأول ضلع يذري ويسفي=وبآخر ضلوعي إرتسم طفل نطاط
ورياح حبك تسكن بجوف عصفي=وتبني بقلبي بالشرايين فسطاط
وطاري فراقك هو دماري ونسفي=والقلب بيدينك غدا خيط فراط
وياالفاتنه كانك نويتي بقصفي=رفات تمثالك على موقدي شاط
من بعد خضه قالوا المي يصفي=والجلد يبهت من كثر ضرب الاسواط
اللي يبيني يحتمل مُر عسفي =مايقبل الهدنه ولا ربع الاشراط
ومدري عن اللي داخل أقواس نصفي=ياهو هبيل أو هي مفاهيم سقراط

جيت مشتاق وشعوري قلب خلي حركه=وقبل لااسكن في ثراها ساكنه هي بالضمير
جيتها والشوق طفلٍ في يديني أمسكه=وكل ماضايق جروحي بالسفر هي تستجير
جيت ساري مايشوف إلا الثريا بفلكه=مانقل هم الليالي دامها فوقه تنير
الغزال الفاتن اللي كل عرقٍ تفتكه=وكل طابور المشاعر من غلاها يستثير
هي تغيب وطيفها في رمش عيني تتركه=يكتسي رمشي ثياب ويلبس بشوت النظير
لاوقف يهتز جسمه بي تثور المعركة=بين ضحك وبين حزن وبين شر وبين خير
فتنةٍ ربي خلقها للعقول المدركة=والشعاع اللي كساها يهتدي فيه الضرير
كل ماشالت سواد الليل عجزت تشبكه=فوضويٍ به شقاوة عيل وطفلٍ صغير
عن صباحٍ نور فجره دمر الليل أهلكه=فاتنه كل الصبايا من حلاياها تغير
كن قلبي في يديها خاتمٍ لو تفركه=مارده يصرخ أحبك كل كلي لك أسير
هي جنوني والجنون أن طار محدٍ يمسكه=وهي فضولي واشتياقي وآخر أنفاس العبير
كل دربٍ به ضياعي ناعس الطرف سلكه=بالعيون وبالخدود وتحت طعنات الحرير
لعن أبو جد المشاعر كان ماجت تكتكه=ولعن أبو شعرٍ تعنا وانكسر دون الغرير
أستريني يالقصيده كان ماانتي مدركه=أنها ست القصيد وأول الحب الأخير
ديرةٍ تمشي عليها كل خطوة ببركه=لكل شبرٍ في ثراها لكل غصن لكل طير.
وحق ذاك الحي يفخر يوم صارت تسلكه=دامها داخل ضلوعه يصبح الحي الأمير
وهي معي لو كنت ساكن في شمال المملكه=نسمةٍ تلعب بقلبي بالحنايا تستدير