أوصيك يافايز وأعطيك الأمثال=احفظ وصاتي لك وشلها للأزمان
أوصيك تقوى الله في كل الأحوال=ترى النصر بالله وفي حفظ الأركان
أحفظ ولي الكون به تصلح الحال=ينجيك عند الضيق لاصرت زملان
أن جاك فاسق في نبأ منه تهتال=أحذر تبين وابتعد عنه شيطان
بعض البشر ردك يخليه رجال=خليه بليا رد تهينه وينهان
هيكل بشر ومشيه مع الخلق دجال=دجال لا تخاويه وعنه ارفع الشان
أحذر ردي الجد أو خايب الخال=لاتعاشره ياابوك عشير نقصان
مايمنعه مبداه خلايف انذال= حذراك ثم حذراك مافيه وجدان
كنه خويلك وبالفعل محتال=احذر ابو وجهين في كل الأحيان
أذا أحتجته او حدك له الجال=يروغ روغة ناعم الذيل حصنان
ريموت مبرمج كاسيه صلصال=جهاز تسجيل على شد الأفتان
أعرف هماج الما لو حط بسحال=يبقا هماج ومشربه لوثة لسان
وشعاد لوصبوه بكاسه وفنجال=لاتشربه يا ابوك لوكنت ضميان
اشرب قراح الما قراح ازلال= ينقع على كبدك تقل روح رمان
الشمس ما تحجب في ضل غربال=والهرج ذوق وزبدة الهرج نيشان
وأفهم وصاة الزير بسيرة بني هلال=نصيحته لكليب في ماضي الأزمان
عشب الدمانه احذره ماهو منزال=وأم الجرا حذراك يالقرم خسران
خوة صديق بار تشرى بالأموال=صديق ضيق وبالمواقف بليهان
خلك معه صادق خويٍ ورجال=وجاز الخوي بالطيب أن شفت نقصان
هذي وصات ابوك من قبل ماشال= قبل الممات وقبل روعات الأذهان
وختامها يالله ياعالم الحال=تصلح عطاك وترزقه قوة أيمان